Đơs tàm pơrjum, Củ tịc Hội đồng Ñân zân ƀòn dờng Hà Nội ồng Nguyễn Ngọc Tuấn pà git, Thường trựk Hội đồng Ñân zân ƀòn dờng neh sùm kơlôi sơnơng, cih dờp ală mờng chài, broă lơh geh cồng nha bơh Quôk hội, Ủy ƀan Thường vụ Quôk hội dê; lùp sền broă lơh bơh 2, 3 càr, ƀòn dờng dê nàng pơn jat tai tam gơl pa broă lơh jat sền jat gùng dà pràn kơldang, song dơpă, ngan ngồn, jak chài, geh cồng nha, lơh jat ală jơnau cih bơh adat boh lam dê mờ bơta geh ngan bơh ƀòn dờng dê nàng bơsong ală broă: “Hà Nội neh ai tơlik jơnau sồr bè ală kơrnuat pal jat tàm broă lơh jat jơnau pơn dut jat sền, do là bơta geh ngan geh ai tơlik nàng sền sơ wì yal anih lơh broă geh gơnoar in bè lùp sền, ủy ƀan sền sơ wì mờ ală anih lùp khàu gròi sền, lơh glài ală broă lơh tìs kơn jơ̆. Broă lơh jat ală jơnau pơn dut jat sền kung là tơl khà nàng anih lơh broă in lam lơh gròi sền, sền sơ wì kwang bàng mờ sền sơ wì tàm pơrlòng, pà phan ƀàn…”

Kơlôi rơcang bè broă tìp mat cau tĕ khà gam geh uă bơta yau, ờ hềt tam gơl pa, ndrờm bal, Ƀí thư Tỉñ ủy Long An, Củ tịc Hội đồng Ñân zân ồng Nguyễn Văn Được đơs dùl bơta geh ngan tàm broă tìp mat cau tĕ khà, hơ̆ là: lài do, broă bơyai lơh ală dơ̆ tìp mat bơh ală kwang bàng Quôk hội, kwang bàng Hội đồng Ñân zân kâp càr, kơnhoàl, xã dê bơyai lơh is. Bơta do lơh gơbàn pơhì pơhà, hoàc huơr: “Tơngai lơh broă do, Thường trựk Hội đồng Ñân zân càr Long An lơh nền pơgồp bal ală dơ̆ tìp mat cau tĕ khà. Bè hơ̆ den gơtùi dong tềm pềr priă jền mờ ờ huan roh uă tŭ jơ. Bơta do neh geh cau tĕ khà ring bal”.

Phó Củ tịc Hội đồng Ñân zân ƀòn dờng Đà Nẵng mò Nguyễn Thị Anh Thi den pà git, ƀòn dờng Đà Nẵng lam lơh tơrlòng lài broă bơyai lơh gơnoar atbồ tiah drà jat Nghị quyết bơh Quôk hội dê, jat hơ̆, 8 quận mờ 45 sơnah ƀòn ờ gam geh Hội đồng Ñân zân tai. Bè hơ̆ den tàng broă lơh tìp mat cau tĕ khà tàm bơta lơh tơrlòng lài broă lam lơh broă lơh gơnoar atbồ tiah drà kung geh tam gơl pa mờ lơh niam: “Broă lơh tìp mat cau tĕ khà tàm bơta tơrlòng lài lơh broă lơh gơnoar atbồ tiah drà kung geh tam gơl pa. Pơn rơ là Thường trựk Hội đồng Ñân zân ƀòn dờng bơyai lơh geh cồng nha 3 broă lơh “Hội đồng Ñân zân mờ cau tĕ khà”. Bơh hơ̆, uă bơta ờ niam, ală broă gơlik geh geh sền gròi uă tàm ƀòn dờng geh di tŭ bơsong gờñ, lơh jat jơnau sồr, bơta kơp kờñ dipal bơh cau tĕ khà dê”.

Đơs tàm pơrjum, Củ tịc Quôk hội ồng Vương Đình Huệ đơs nền, nam 2022, Quôk hội, Ủy ƀan Thường vụ Quôk hội, ală anih lơh broă bơh Quôk hội, Hội đồng Ñân zân ală kâp dê jơh nùs tam gơl pa, tơnguh bơta niam, cồng nha lơh broă jơh bal bè broă lơh lơh adat boh lam, jat sền, lơh nền ală broă kuơmàng bơh dà lơgar mờ ală tiah dê. Nam 2023, Củ tịc Quôk hội ồng Vương Đình Huệ sồr Hội đồng Ñân zân ală càr, ƀòn dờng lam lơh jat niam 6 kơnòl broă tờm, tàm hơ̆, kơlôi sơnơng, tam gơl, bơ tơl nàng lam lơh ring bal ală gùng dà pa bơh Đảng, Dà lơgar dê, ngan là ală Nghị quyết bơh Ƀộ Cíñ trị dê bè bơtàu tơnguh lơh sa- mpồl bơtiàn ală tiah dê.

Bơt bơtàu mờ lam lơh broă lơh jat sền nam 2023 dipal, nền nòn mờ geh cồng nha, lơh niam kơnòl broă gròi sền gơnăp gơnoar tàm kâp hơ đơm, rơcang sơndră sa kuề sa kuà, broă ờ niam, pơhì pơhà. Kuơmàng, nam 2023, Quôk hội mờ Hội đồng Ñân zân geh bơyai lơh ai sră pin dờn gơ wèt mờ ală cau bơh Quôk hội, Hội đồng Ñân zân pồ halà kĭ tơn pồ. Ƀộ Cíñ trị pa ai tơlik jơnau sồr sồ 96 bè broă ai sră pin dờn gơ wèt mờ ală gơnoar broă, gơnoar đơng lam bồ, atbồ tàm anih lơh broă cíñ trị: “Sồr Hội đồng Ñân zân lam lơh jat niam Jơnau sồr sồ 96, ală sră nggal bơh Quôk hội, Ủy ƀan Thường vụ Quôk hội dê mờ jơnau git wă broă ai sră pin dờn là broă lơh tờm bơh kơnòl broă tờm dê, bơh hơ̆, bơt bơtàu broă rơndap lơh mờ ală broă lơh geh cồng nha, mùl màl nàng lam lơh jat nền nòn, pleh bơta mìng đơs, ờ lơh ngan ngồn”.

Hội đồng Ñân zân pal at gơnoar broă kuơmàng tàm broă tam gơl pa đơng pơlam tàm kâp hơ đơm jat gùng dà tam gơl pa, geh cồng nha, tơrgùm atbồ bơtàu tơnguh; gàr niam broă lài ngan ki ngàm Sơnua boh lam mờ adat boh lam, tơnguh bơta loh làng, kơnòl mblàng lơh loh mờ bơta tus bal bơh làng bol dê; pơgồp bơnah bơt bơtàu rài hàñ cíñ drơng làng bol, làng bol lơh tờm, gơnoar adat boh lam, mờng chài, tam gơl pa, jak chài, sàng goh, song dơpă, loh làng, pơn jat tai tơnguh nùs nhơm drơng làng bol mờ lơh gơlik anih ƀuơn ƀuài nàng mpồl lơh sa kă bro in lơh broă.