Trồ tơngai, bi Ksor Y Viên tàm ƀòn Hwing, sàh Ea Hiao bal mờ pơ-ùr sơnka sền gàr sầu riêng tam bơrlŭ bal tàm suơn kơphe. Bi pà git, sầu riêng pa tơnhào ai hìu nhă in geh mờr 100 tơlăk đong. Kờp bal jơh kơphe, suơn ơnàng 1 lồ 1 sào do, hìu nhă bi geh 350 tơlăk đong tàm nam do. Bi Y Viên kah wơl, bi bao tàm nam 2015mờ 3 sào ù mè bèp pà, ùr bơklao bi lơh broă ơpah ndang, prăp priă mờ càn tai bơh anih priă jền nàng blơi ù, bơcri tàm broă lơh sa. Priă càn anih priă jền neh dong kờl bi lơh broă geh cồng nha.

Bi rơcang càn tai nàng geh dùl khà priă tơl dờng, nàng lơh broă lơh sa suơn dờng gơjăt bal ndơ̆p, geh bal tam phan mờ ròng phan: “Bol añ gam ròng kơnrồ mờ rơ̆p tăc nàng bal mờ priă càn lơh wàng nàng ròng sur. Hìu nhă kơ̆p kờñ anih priă jền geh ai càn tai di pơgăp 300 tơlăk đong nàng tam gơl phan tam, phan ròng, mờ tơngai càn tàm 5 nam. Geh priă, bol añ tơm anih priă jền in mờ geh priă nàng drơng oh kòn in lòt bơsram”.

Di lah pơn drờm mờ Y Viên den ồng Kpă Liêm tàm ƀòn Hwing, sàh Ea Hiao, càr Dăk Lăk sơlơ gŏ loh làng bơta kwơ màng bơh broă ai càn priă lơh sa suơn sre ƀòn lơgar dê. Di lah tàm nam 1997, ồng mìng geh càn mờ khà 5 tơlăk đong nàng lơh jăt broă lơh sa dềt, jơnau kờñ là tơn jơh jơgoh, den tŭ do khà priă càn geh ai neh tus 500 tơlăk đong. Mờ khà priă do geh ồng bơcri tàm broă lơh 6 lồ 5 sào ù, mờ mờr 7 rơbô tờm kơphe, 150 tờm sầu riêng mờ 500 ñjrong tiêu. Mìng is tàm kàl tơnhào nam do, suơn tam phan hìu ồng dê ai geh di pơgăp 15 tấn kơphe, 10 tấn sầu riêng mờ 2 tấn tiêu, priă geh di pơgăp 3 tơmàn 200 tơlăk đong.

Jăt ồng Kpă Liêm yal, bal mờ khà càn priă gơguh, tơngai bơsong sră nggal kung geh tơrmù uă ngan tài kơnờm bơh broă tam gơl sồ. “Lài do lòt càn priă pal roh 3 ngai hơ̆ sồng gơtùi geh càn priă tài sră nggal pal lơh uă ngan, pal lòt công chứng, tiah kis hơ̆ sồng lòt tus anih priă jền gơtùi càn priă. Tŭ do den mhar bloh. Mpồl ai càn priă tàm sàh Ea Sol lài do, ƀùi drim lòt sền, ƀùi mho tus anih priă jền lơh sră nggal càn priă. Đơs bal, tàm ngai tơn gơtùi càn geh priă, ƀuơn ngan”.

Sàh Ea Hiao geh bă ù ơnàng rơlao 361 kơi sồ vuông, mờ 7 rơbô 100 hìu, 31 rơbô 400 nă làng bol, tàm hơ̆ làng bol jơi bơtiàn ờ gal cau geh rơlao 52%. Tàm rơndăp ù tiah pa càr Dăk Lăk dê, sàh Ea Hiao gơwèt tiah pràn lơh sa tiah đah Tô càr dê, do là tiah rơ̆p tơnguh bơta pràn lơh sa suơn sre. Jăt ồng Huỳnh Văn Vịnh, Phó Chủ tịch Anih duh broă Làng bol sàh pà git, nàng lơh jăt mùl màl broă rơndăp ù tiah geh ai, priă càn ai broă lơh sa suơn sre ƀòn lơgar in là kwơ màng lài ngan. Gơnoar atbồ sàh gam pơgồp bal mờ đah anih priă jền, ai bơta ƀuơn nàng làng bol in geh càn priă.

Ồng Huỳnh Văn Vịnh pà git tai: “Tŭ làng bol tus nàng kĭ dờp ală sră pơ-àr càn priă, Anih duh broă Làng bol sàh sồr pràn ngan Anih lơh broă Drơng broă lơh sră pơ-àr gơnoar atbồ dà lơgar mờ Jơdŭ lơh broă Lơh sa sàh dê tơrgùm bơsong sră nggal làng bol in tàm bơh 1 tus 2 jơ là lơh gơs. Dan mờ anih priă jền ai lài ală khà priă càn, tàm hơ̆ uă ngan là ală khà priă càn sa priă cồng ờ uă, dong kờl hìu rơƀah, hìu nhă geh sră dong kờl mờ làng bol jơi bơtiàn ờ gal cau tàm tiah ngài tus càn priă”.

Lơh jăt broă dong kờl ai càn priă lơh sa suơn sre mờ ƀòn lơgar tàm càr Dăk Lăk, Agribank là mpồl lơh broă geh gơnoar lam lài, lơh tờm. Mìng is tàm tiah đah Tô càr Dăk Lăk, neh geh kờp jơh khà priă jơnkah dồs 19 rơbô 500 tơmàn đong mờ rơlao 29 rơbô nă cau càn priă; tàm hơ̆ 2 rơbô 800 nă cau càn là làng bol jơi bơtiàn ờ gal cau, mờ khà priă jơnkah dồs 1 rơbô 872 tơmàn đong. Jăt ồng Nguyễn Văn Tùng, Phó Kwang Lam bồ Agribank tiah đah Tô càr Dăk Lăk pà git, lơh jăt Jơnau lơh nền sồ 55 bơh Chính phủ bal mờ anih priă jền kấp hờ đang bè càn priă lơh sa suơn sre ƀòn lơgar, tàm ală nam do, bơdìh mờ broă tơrgùm priă ai lơh sa suơn sre, ƀòn lơgar in, anih priă jền sền kwơ broă dong kờl làng bol jơi bơtiàn ờ gal cau tàm tiah ngài, geh priă bơcri tàm broă lơh sa, ròng phan. Bal mờ broă ai càn priă, broă lơh rài kis lơh sa mpồl bơtiàn kung geh mpồl lơh broă sền gròi, pơgồp bal dong kờl làng bol kơl jăp rài kis, bơtàu tơnguh lơh sa.

Ồng Nguyễn Văn Tùng pà git tai: “Anih priă jền tàm do lơh 15 broă lơh, broă dong kờl ai càn priă sa priă cồng ờ uă, geh priă cồng ờ uă rơlao mờ priă cồng ai càn bè ờs bơh 1 tus 2% tàm 1 nam, ai cau càn là cau dùl nă să, tàm hơ̆ geh làng bol jơi bơtiàn ờ gal cau. Ală broă dong kờl do uă bơta ngan, bơh hìu ơm, rài kis tus mờ lơh sa, kă bro lơh sa suơn sre, tam phan, ròng phan, ròng phan tàm dà mờ blơi măi mok lơh broă… Den tàng, jăt tơl jơnau kờñ tàm mùl màl bơh cau càn priă dê, gơtùi rơwah gơdờp bal mờ tus càn priă ƀuơn niam rơlao”.

Bơh ală khà priă càn di pal, uă hìu làng bol jơi bơtiàn ờ gal cau tàm tiah ngài càr Dăk Lăk neh geh tam priă nàng bơcri tàm broă lơh sa, ròng phan, rơhời lik klàs rơƀah, brồ guh lơh pas. Priă càn ờ mìng dong kờl tam gơl rài kis tơl hìu nhă mờ gam pơgồp bal tàm broă tơrgùm bơta ờ ndrờm bal bơtàu tơnguh, bơ̆t bơtàu ƀòn lơgar ngai sơlơ pas gơs pràn kơl dang, tơnguh nùs nhơm pin dờn bơh Làng bol dê tàm ală broă dong kờl bơh Đảng, Dà lơgar. Do kung là dùl tàm ală tơngu me tờm pơgồp bal nàng càr Dăk Lăk bơtàu tơnguh mhar, kơl jăp tàm tơngai pa.