Rơndăp broă lơh 8 bơh Mpồl Tam klăc Cau ùr Việt Nam dê đơng lam neh lơh jăt ngai sơlơ geh cồng nha rlau jơnau ring bal ùr klau mờ bơsong ală broă jal mhar gơ wèt mờ cau ùr mờ kơnòm dềt. Nàng gàr niam broă neh lơh geh mờ cồng nha rlau tai tàm tơngai dơ̆ II (bơh nam 2026- 2030), Tiến sìh ồng Lê Ngọc Thắng ai gĭt puan broă kờñ pal geh bơsong dùl bă nền nòn. Lài ngan là Pơgồp bal ùr klau halà bơcri priă is taih? Jăt ồng Lê Ngọc Thắng den neh tus tŭ kờñ pal tam gơl bồ tơngoh kơlôi sơnơng. Dilah lài do broă pơgồp bal ùr klau tàm ală broă lơh ndai là kờñ ngan nàng tơngguh uă jơnau gĭt wă, den bè jŏ jòng, ring bal ùr klau kờñ pal geh ai lài bơcri priă is.

"Jăt añ den, broă ring bal ùr klau là bơh nggùl bơnah mpồl bơtiàn dê…Sơlơ ờ huan pơgồp bal sơlơ niam, tài bơh ring bal ùr klau kờñ pal geh sền là dùl broă lơh ai lài bơcri priă is, ờ gŏ di mìng là jơnau tàm dong kờl bal ờ”.

Broă dơ̆ bàr là broă gơdờp mờ lơh tam gơl pa wơl sră pơ àr gơnoar ătbồ. Broă tơrmù dipal mpồl lơh broă mìng gam bàr kâp gơnoar ătbồ ƀòn lơgar là kâp càr mờ kâp sàh geh jơnau lùp dờng bè rơndăp tăp sèng bơh Mpồl Cau ùr dê mờ pràn jak broă lam lơh jăt bơh kwang bàng kâp hơđơm dê. Bơta do gơ sồr pal sơlơ bơsram tàp, tơngguh uă pràn jak broă lơh ai mpồl kwang bàng Mpồl Cau ùr kâp càr mờ kâp sàh in nàng khi mùl màl wă wờng mờ lam lơh rơndăp broă lơh geh cồng nha.

Broă dơ̆ 3 là jơnau sồr sền wơl jơh broă lơh jak chài. Jăt Tiến sìh ồng Lê Ngọc Thắng, kờñ pal geh dùl bơta sền wơl jơh broă lơh 10 nam (2021- 2030) dùl bă jak chài mờ mùl màl tàm rài kis geh ngan nàng hơ jơnau lùp: Rơndăp broă lơh 8 neh mùl màl lơh gơlik geh ală tam gơl lơi sền bơh đah ring bal ùr klau ai cau ùr jơi bơtiàn dồ êt nă cau in taih? Ală jơnau sền swì do rơ̆p là cơng tàng kơ̆ kơl jăp ngan ai broă rơndăp nền broă lơh dong kờl tàm tơnơ̆ do in.

Mờ broă dơ̆ puan là lơh bal is mờ ală broă mpồl bơtiàn jal mhar. Ring bal ùr klau ờ gơtùi tam cah is mờ ală broă jê bồ jê tơngoh bè bau gờñ, bau mờ cau rềp jơi nòi bal, jơnau ùr bơklau tàm sang tŭ cau ùr lòt lơh broă ngài, sơgràm aniai bĭc bài halà tăc blơi cau. Rơndăp broă lơh 8 kờñ pal gĭt nền mờ bơsong ală broă do, sền hơ̆ là dùl bơnah ờ gơtùi ờ geh tàm gùng lòt jàu gơnoar ai cau ùr in.

Tiến sìh ồng Lê Ngọc Thắng sồr tơngai tus kờñ pal lơh dùl bă tơl làm mơya pal di broă di anih. Pơn jăt tai jăt di ală jơnau kờñ tờm ngan: tơngguh uă jơnau gĭt wă, sền gàr gơnoar mờ bơta kwơ dipal mờ kơrnoăt boh lam, sền gròi rài kis phan bơna, nùs nhơm mờ is ồn là tơngguh uă gơnăp gơnoar lơh sa ai cau ùr in.

Broă lơh dong kờl jơi bơtiàn bơta tờm là ală gah, uă broă, lơh gơdờp tus kòn bơnus- ờ mìng 53 jơi bơtiàn dồ êt nă cau lơm mờ jơh bal mpồl bơtiàn cau Yoan dê tai. Gơ geh măt jơh tàm ală gah lơh sa, niam chài, bơto bơtê, tơn jơh jơgloh tơrmù rƀah. Den tàng bè hơ̆, ală rơndăp broă lơh tàm Broă lơh Jơnau kờñ Dà lơgar kờñ pal geh sền swì dùl bă jơh ală bơta. Bè jơnau kơlôi lơh, añ ring bal mờ broă jăt di jơnau kờñ, cau mờ ƀòn lơgar neh gĭt nền tàm broă lơh, is ồn là ai là ală ƀòn lơgar kal ke ir ngan in.

Rơndăp broă lơh 8 ờ mìng là dùl broă lơh lơh broă lơm mờ là cơng tàng tơnggŏ loh làng ai bơta jơh nùs lơh ngan cíñ trị dờng bơh Đảng mờ Dà lơgar dê. Mờ gơnoar broă lơh lài bơh Mpồl Tam klăc Cau ùr Việt Nam dê, broă tơrgùm tàm ală broă loh làng, bơsong ală broă jal mhar mờ rơhời wèt tus sền ring bal ùr klau là dùl broă lơh bơcri priă tơn rơ̆p là gùng lòt nàng lơh gơlik geh ală tam gơl jŏ jòng, bơceh gơs dùl mpồl bơtiàn ndrờm bal.