Ala mat Cíñ phủ, Ƀộ trưởng Ƀộ Bơto bơtê mờ Bơsram ồng Nguyễn Kim Sơn yal Jơnau yal jơnau lơh nền bơcri priă Broă lơh jơnau kờñ dà lơgar lơh pa, tơnguh bơta niam bơto bơtê mờ bơsram tơngai bơh nam 2026 tus nam 2035 geh kờp jơh ală bơnah priă hìu jà tă pơgồp nàng lam lơh Broă lơh tơngai bơh nam 2026 tus nam 2035 mờr 580 rbô tơmàn đong. Sền sơwì tơngume do, Anih duh broă Lơh kơnòl broă sùm Quôk hội sồr anih rơcang cih kờñ pal kơlôi sơnơng, kờp dŭ nền nòn ală bơta pal geh, gàr lam lơh ngan ngồn jơnau kờñ tus nam 2030 geh 30% hìu bơsram mầm non, hìu bơsram pe kâp, ai dà Mỹ gơ gơs là dà đơs dơ̆ 2 mờ tơnguh tus 100% tàm nam 2035. Gơ rềng tus kờp jơh priă jền hòi jà tă pơgồp nàng lam lơh Broă lơh tàm jơh gùt tŭ tơngai 10 nam bơh nam 2026 tus nam 2035 là pơgap rlau 580 rbô tơmàn đong jat sră yal bơh Cíñ phủ, Anih duh broă Lơh kơnòl broă sùm Quôk hội dê sồr kờñ pal rơndap ai priă bơcri di mờ jơnau kờñ mờ bơta pràn ai priă bơcri, gàr niam gơtùi lơh ngan ngồn, geh cồng nha. Sền sơ wì broă hòi jà ală bơnah priă bơcri bơdìh nàng tơrmù ƀà bơta kơn jơ̆ kes priă, lơh pràn bơcri priă jat broă lơh lơh bal dà lơgar mờ nă să is PPP tàm broă bơt bơtàu phan bơna, blơi măi mok, phan ngui.

Ai jơnau đơs bè broă lơh, Củ tịc Quôk hội ồng Trần Thanh Mẫn sồr pal broă rơndap lơh jŏ tơngai, đơs lài gùng dà bơtàu tơnguh bơh mpồl bơtiàn, drà lơh broă dê tàm tơnơ̆ do, geh jơnau sồr bè bơta chài măi mok sồ, bơta chài pal geh nàng gàr bơta geh uă cau sền gròi mờ cồng nha jŏ jòng, tơngume plah rah rài; tơrgùm tàm ală broă tờm, jal mhar bè tam gơl sồ, bơto bơtê broă lơh geh bơta niam uă, bơto bơtê tàm tiah sar lơgar ngài, tiah làng bol jơi bơtiàn dồ êt nă cau. Bơdìh hơ̆ tai pal đal git loh jơnau kờñ mờ priă jền bơh broă lơh jơnau kờñ mờ ală broă lơh dê, ală jơnau lơh nền sùm bơh Ƀộ Bơto bơtê mờ Bơsram dê; git nền loh làng cau sền gròi lài tơrgùm tàm tiah kal ke, jơi bơtiàn dồ êt nă cau, bơto bơsram mầm non, bơto bơsram đại họk, nàng geh broă lơh ai priă bơcri dipal. Củ tịc Quôk hội ồng Trần Thanh Mẫn sồr: “Geh ală broă lơh niam nàng gơ hòi gơ jà ală mpồl lơh sa kă bro, ală mpồl bal, cau nă să is tus bal tàm broă bơcri priă tàm gah bơto bơsram. Añ đơs bơta do hơ̆ sồng kuơmàng, ai mìng kơlôi tàm kes priă dà lơgar den ờ geh uă, mờ bol he pal lơh bè lơi nàng mpồl lơh broă bal đah dà lơgar mờ nă să is PPP tàm bơt bơtàu phan bơna, blơi măi mok, phan ngui. Geh uă hìu bơsram bơh lơgar ndai dê bơcri priă tàm lơgar he, nàng kơnòm bơsram tàm lơgar ờ lòt hờ lơgar bơdìh nàng bơsram. Dilah bơta niam uă den oh kòn he dê tus do rơp tơrmù priă tă bơsram uă ngan”.

Geh git, tàm Dơ̆ pơrjum dơ̆ 10, Quôk hội rơp tam gơl rơndap ù tiah bal dà lơgar tơngai bơh nam 2021 tus nam 2030, broă rơndap lơh tus nam 2050, tàm hơ̆ geh ală tơngume lơh gơs jơnau cih adat boh lam ală jơnau lơh nền bơh Đảng, dà lơgar dê, jat Củ tịc Quôk hội den kờñ pal kah nàng gàr bơta ring bal đah broă lơh mờ rơndap ù tiah bal dà lơgar mờ ală adat boh lam geh gơ rềng; mờ kung sồr tơrgùm jơh 3 broă lơh nàng kờñ pleh gơ tàm rơndap rơndồl cau kờñ bơcri priă, tơngume bơcri priă, tàm pơdờn ndrờm bal geh cồng nha. Dùl dơ̆ tai Củ tịc Quôk hội kơp kờñ, broă lơh bañ lơh rah rài mờ pal tơrgùm tàm ală broă tờm, jal mhar. Phó Củ tịc Quôk hội ồng Nguyễn Khắc Định ring bal mờ broă pal ai tơlik broă lơh mờ đơs là, broă lơh jơnau kờñ dà lơgar là ală broă ndrờm pal dà lơgar, pal tơrgùm bơcri priă nàng lơh gơlik bơta tam gơl pràn tàm dùl tŭ tơngai loh làng: “Tàm do añ gŏ geh 3 bơta tam gơl pràn: dùl là phan bơna, dơ̆ 2 là jak chài măi mok mờ tam gơl sồ, dơ̆ 3 là bơta dà Mỹ. Mơya bơta añ kơp kơnờm den 2, 3 broă ờ gŏ đơs tàm do. Hơ̆ là ală jơnau lơh nền tàm pơrjum he dê ndrờm đơs là bơto bơtê kòn bơnus, là dờng pràn tơl làm. Mơya kơnòm bơsram tus re dà kung ờ git sơl. Bơto sră pal gơ jat bal mờ bơto kòn bơnus, bơto broă lơh. Kơnòm pa tàu, kơnòm dềt lơh jat di 5 jơnau Wa Hồ bơto: Kờñ dà lơgar, kờñ cau dùl lơgar bal, bơsram jak, lơh broă jak. Mơya bơsram den digơlan jak, geh oh den ờ hềt jak, mơya lơh broă den ờ hềt jak”.

Bè hơ̆ den tàng, jat Phó Củ tịc Quôk hội ồng Nguyễn Khắc Định, bal mờ broă bơto sră, bơto kòn bơnus kung pal rơndap tap sèng wơl ală hìu bơsram nàng gàr bơta ơnàng ală hìu bơsram in lam lơh ală broă lơh ndai nàng kờñ lơh jat ală jơnau sồr pơlam tàp bal ai ală oh in. Mblàng lơh loh ală broă mờ ală kwang geh jơng tàm Anih duh broă Lơh kơnòl broă sùm Quôk hội đơs, Ƀộ trưởng Ƀộ Bơto bơtê mờ Bơsram ồng Nguyễn Kim Sơn pà git, bè priă jền lam lơh broă lơh, tàm tŭ sền sơwì uă dar, bơta kờp dŭ ală bơnah priă jền, Ƀộ Priă jền neh pal kờp dŭ ală bơta priă jền mờ Cíñ phủ neh yal Quôk hội den pal kờp dŭ tus bơta pràn gàr tơl priă jền: “Bè kờp sền ală tơngume đah adat boh lam, broă lơh krơi is tàm broă lơh jơnau kờñ. Bol hi kờp sền, mơya bơta do den uă ngan geh priă jền nàng lam lơh ală tơngume jat gùng dà ai tơlik bơh Jơnau lơh nền tàm pơrjum sồ 71 dê. Pơn yơu, Jơnau lơh nền tàm pơrjum sồ 71 geh ai tơlik lài gùng dà, broă lơh krơi is do”.

Ală jơnau tàm cribơyai tàm Dar pơrjum dơ̆ 51 ai gŏ, ală tơngume bơh broă lơh jơnau kờñ dà lơgar bè lơh pa bơto bơsram tơngai bơh nam 2026 tus nam 2035 gam đơs di uă bơta sền gròi cau tĕ khà dê; cồng nha ngui priă jền rlau 580 rbô tơmàn đong, bơta pràn lam lơh ngan ngồn ală jơnau kờñ bè bơto wơl dà Mỹ, tam gơl sồ halà gàr tơl phan bơna mờ ală bơta pơlam tàp bơta chài tơl làm ai kơnòm bơsram in.