Broă lơh ờ tă priă bơsram, dong kờl priă tă bơsong pal gàr bơta tàm pơnring kes priă bơh càr, ƀòn dờng dê

VOV4.K'Ho - Tàm pơrjum dơ̆ 9, Quôk hội khoă XV, ală cau ala mat cribơyai tàm jơnum bè Jơnau rơcang cih jơnau lơh nền tàm pơrjum bơh Quôk hội dê bè ờ tă priă bơsram, dong kờl priă tă bơsram gơ wèt mờ kơnòm mầm non, kơnòm bơsram pe kâp, cau bơsram jơnau bơsram kâp pe tàm ală hìu bơsram tàm lơgar he. Uă cau ala mat đơs nền, do là broă dong kờl cèng bơta niam chài, bơta niam bơh gơnoar atbồ dê, gàr bơta ring bal tàm broă bơsram sră. Bulah bè hơ̆, pal sền sơ wì nền nòn bơta tàm pơnring kes priă bơh ală càr, ƀòn dờng dê, ngan là tiah kal ke tŭ lam lơh jat jơnau lơh nền tàm pơrjum do.

Video Player is loading.
Current Time 0:00
/
Duration 0:00
Loaded: 0%
Progress: 0%
Stream Type LIVE
Remaining Time -0:00
 
1x

Jat ală cau ala mat đơs, broă bơt bơtàu mờ ai tơlik Jơnau lơh nền tàm pơrjum bơh Quôk hội dê bè ờ tă priă bơsram, dong kờl priă tă bơsong gơ wèt mờ kơnòm mầm non, kơnòm bơsram pe kâp, cau bơsram jơnau bơsram kâp pe tàm ală hìu bơsram dà lơgar là cơng tàng ai broă cih dờp, lơh jat ală jơnau pơn dut bơh Ƀộ Cíñ trị, Jơnau lơh nền tàm pơrjum bơh Mpồl đơng lam Đảng dà lơgar dê bè broă bơto bơtê mờ bơsram, pơgồp bơnah gàr lơngăp lơngai rài kis mpồl bơtiàn, tơrmù bơta ơnòng kơn jơ̆ priă jền ai ală hìu bơnhă geh oh kòn gam bơsram tàm ală hìu bơsram bơh mầm non tus kâp 3 in. Bulah bè hơ̆, ală cau ala mat kung gam kơlôi rơcang bè bơta gơtùi lơh jat ngan ngồn ală gùng dà, broă lơh, bơta dong kờl mùl màl tàm jơnau rơcang cih Jơnau lơh nền tàm pơrjum, tàm hơ̆ geh bơta priă jền lam lơh. Mò Nguyễn Thị Lan, Mpồl cau ala mat Quôk hội ƀòn dờng Hà Nội tă pơgồp jơnau đơs: “Añ kung ring bal mờ broă ai kes priă dà lơgar. Bulah bè hơ̆ den pal sền sơ wì nền nòn bơta pràn tàm pơnring kes priă càr, ƀòn dờng dê, ngan là ală càr ờ hềt gơtùi tàm pơnring is kes priă den Cíñ phủ kung pal geh bơta kờp dŭ lài, pà bơ tơl wơl nàng gàr priă jền ală càr do in, nàng pleh bơta broă dong kờl den niam mơya tài tơl priă jền den tàng broă lam lơh digơlan lơyài halà ờ ring bal”.

Mò Siu Hương, mpồl cau ala mat Quôk hội càr Gia Lai geh jơnau đơs: “Tơl càr geh dùl bơta geh ngan krơi is. Geh ală càr gam kal ke, pơn yơu bè Gia Lai, tŭ do rlau 60% là kes priă dà lơgar tàm pơn ring, den tàng añ dan pal geh jơnau lơh nền loh làng rlau bè gùng dà broă lơh tam pà priă jền bơh kes priă dà lơgar nàng lơh bè lơi broă dong kờl niam ngan bơh Đảng, dà lơgar he dê geh lam lơh dồ bă niam ngan rlau jơh”.

Bơh mờng chài bơh ƀòn dờng dê neh lam lơh niam broă lơh dong kờl priă tă bơsram ai kơnòm dềt, kơnòm bơsram bơh mầm non tus ơdŭ 12 in, ồng Trần Chí Cường, cau ala mat Quôk hội ƀòn dờng Đà Nẵng đơs là, broă dong kờl pal ring bal, mùl màl: “Ờ tă priă bơsram den hìu bơsram dà lơgar geh khà mùl màl den ƀuơn rlau, mơya tŭ do cih khà dong kờl ai kơnòm bơsram bơdìh hìu bơsram dà lơgar in den khà dong kờl bơh Mpồl duh broă làng bol lơh nền, kal ke ngan ai broă dong kờl in, khà dong kờl bè lơi kung là dùl broă geh ai tơlik. Bè Đà Nẵng tă bơh kes priă nàng dong kờl ală kơnòm bơsram bơdìh hìu bơsram dà lơgar in làndrờm mờ khà priă tă bơsram mờ kơnòm bơsram hìu bơsram dà lơgar geh dong kờl, ờ gơtìp lin. Bè hơ̆ den gơ geh dùl khà ndrờm bal ai broă lam lơh in”.

Bè gùng dà, broă lơh tă dong kờl, ồng Nguyễn Đại Thắng, cau ala mat Quôk hội càr Hưng Yên dan: “Tàm jơnau lơh nền tàm pơrjum tă dong kờl tơn ai cau geh dờp kuơ in. Jat bơta kơlôi sơnơng añ de den kơlôi sơnơng gơtùi tă tơm den bơh ală hìu bơsram rơp dipal rlau, he geh gùng dà broă lơh sền sơ wì, geh mpồl jat sền nàng yal. Ngan là pal geh mpồl jat sền, sền sơ wì tàm ală hìu bơsram geh cau geh dờp bơta dong kờl. Dùl là bơh hìu bơsram nàng tă dong kờl tơn ală sau in. Bàr là ờ kờp tàm priă tă bơsram, bè ờs là 10 đong, mơya priă bơsram geh dong kờl 3 đong mìng dờp 7 đong gời”.

Tă pơgồp jơnau đơs bè Jơnau lơh nền tàm pơrjum bơto bơsram wơl mầm non ai kơnòm mẫu giáo bơh 3 tus 5 sơnam in, bàr pe nă cau ala mat đơs, tàm sơnam do, ală oh ờ hềt lòt bơsram uă ngan là kơnòm dềt tiah sar lơgar ngài, tiah uă kal ke. Dilah jơnau lơh nền tàm pơrjum geh ai tơlik den rơp pơgồp bơnah gàr ring bal tàm broă bơto bơsram bơh kơnòm dềt tàm ală tiah dê. Bulah rơp pal bơcri uă rlau ai phan bơna, măi mok, cau pơgru… mơya pal sền do là bơta sền gròi kuơmàng ngan rlau jơh bơh bơta bơtàu tơnguh dê, là jơnau geh lòt bơsram gờñ, jơnau bơcri priă sền gròi phan sa tơl pràn nàng lơh nền tus jơnhua să jan, bơta niam khà kờp làng bol tơnơ̆ do. Jat ồng Phan Văn Mãi, cau ala mat mpồl ƀòn dờng Hồ Chí Minh đơs, bal mờ kes priă dà lơgar pal geh ală gùng dà broă lơh hòi jà mpồl bơtiàn tă pơgồp tàm gah do: “Jơnau bè bơta tă pơgồp bơh mpồl bơtiàn dê nàng bơtàu tơnguh bơto bơsram mầm non là kuơmàng ngan, dilah ờ den rơp là bơta kơn jơ̆ ai kes priă in. Bol he pal kơlôi sơnơng mờ geh ală broă dong kờl ngac ngar rlau nàng hòi jà bơta tă pơgồp bơh mpồl bơtiàn dê. Pơn yơu bè bol he geh ai tơlik bơta jàu ù ờ sa priă halà ai 0 đong nàng lơh ală hìu bơsram mầm non halà ờ”.

Viết bình luận