Đơs tàm dơ̆ bơyai lơh, Củ tịc Quôk hội ồng Vương Đình Huệ ai lơh ngoh rơngac ngan tềng đap ală bơta tă pơgồp, bơta phi să, bơta roh rui bơh làng bol, kwang bàng, cau ling dê tàm dơ̆ tam dră mờ trồ tiah lơh aniai, ồs sa, bơta ờ niam, rềs àr mờ cồng nha jak ngan, ală krơh niam geh pơn rơ gơguh jak tàm srơh jơh gùt làng bol tus bal rơcang sơndră, crùh ồs sa mờ dong kờl rềs àr.

Củ tịc Quôk hội ồng Vương Đình Huệ đơs là, at tê bal, pơgồp bal bơta pràn mờ ală mpồl lơh broă geh gơnoar tàm broă lơh rơcang sơndră, crùh ồs sa mờ dong kờl rềs àr là bơta tus bal gal ngan bơh ală rơnàng Làng bol dê. Pơn rơ bè: Mpồl rơcang sơndră, crùh ồs sa mờ dong kờl rềs àr atbồ is thị trấn Lạc Dương, càr Lâm Đồng mờ nùs nhơm lơh broă is, pơn đơl jơh pràn tus bal rơcang sơndră, crùh ồs sa mờ dong kờl rềs àr; bè bi Nguyễn Hữu Đốn neh khin cha, phi să dong kờl cau tàm dơ̆ ồs sa gơlik geh tàm ƀòn dờng Phan Thiết, càr Bình Thuận pa do; Mpồl dong kờl bơh sơn rờp FAS Angle mờ jơnau đơs “dong kờl kòn bơnus là gùng dà kis” neh dong git nđờ rbô nă cau gơtìp rềs àr, bơta ờ niam mờ pa do neh pơgồp bơnah dong klàs geh uă cau tàm dơ̆ ồs sa lơh gơbàn jơnau gơ lời wơl kơn jơ̆ ngan tàm sơnah ƀòn Khương Đình, quận Thanh Xuân, ƀòn dờng Hà Nội… Do là ală broă lơh niam ngan, lơh gơ rề uă nùs nhơm khin cha, ờs mờng bơh yau “kờñ cau bè kờñ să tờm he” bơh jơi bơtiàn he dê.

Tàm broă lơh do, jờng rơ ală broă lơh niam bơnĕ, ală broă lơh khin cha, ală bồng nha jak ngan bơh ală mpồl lơh broă mờ làng bol dê tàm broă lơh rơcang sơndră, crùh ồs sa mờ dong kờl rềs àr mờ kah kơlôi ală làng bol gơtìp rềs àr, kah ưn ngài ală kwang bàng, cau ling mờ làng bol neh khin cha, phi să huĭ să tờm he dê nàng crùh ồs sa, dong kờl rềs àr tàm tơngai lài.

Tàm tơngai tus, bơta ồs sa, bơrtoh, broă ờ niam, rềs àr digơlan gam gơlik geh kal ke, ờ gơtùi git lài, ngan là tàm ală hìu ơm bal jơnhua cờn, hìu ơm geh uă hìu dềt, hìu làng bol geh ngui nàng ơm pơgồp bal mờ lơh sa, kă bro broă drơng ala, drà, anih tơrgùm gal cau. Jat Củ tịc Quôk hội đơs, bơta do sồr Mpồl Kảñ sát rơcang sơndră, crùh ồs sa mờ dong kờl rềs àr bal mờ ală kâp, ală gah broă lơh pal sơlơ tơnguh rlau tai bơta rơcang lài nền nòn, wil tơl mờ jak chài ngan gơ wèt mờ broă lơh do. Củ tịc Quôk hội ồng Vương Đình Huệ đơs: “Pal sền dờng màng broă lơh rơcang sơndră, ai rơcang sơndră là tờm, bơh hơ̆ dong tơrmù khà dơ̆ ồs sa mờ hoàc huơr tài bơh ồs sa lơh gơbàn, ngan là bè kòn bơnus, sền gàr màng kis bơh làng bol dê là sền gàr lơngăp lơngai kòn bơnus, là jơnau kờñ dờng ngan rlau jơh bơh sền gàr lơngăp lơngai, rơndap tap sèng ring lơngai, bơtàu tơnguh dà lơgar dê; gàr niam mờ gàr sùm ală bơta pal geh bè lơngăp lơngai rơcang sơndră, crùh ồs sa ai tơl anih, tơl ƀòn làng bol ơm kis, tơl hìu bơnhă in; sơlơ tơnguh broă lơh pơlam mờ yal tơnggit jơnau, mblàng yal, bơto bơtê làm uă, nền nòn, lơh sùm jơnau git wă adat boh lam, bơto pơlam bè bơta chài rơcang sơndră crùh ồs sa, ngan là bơta chài rơcang sơndră mờ ồs sa ai làng bol in, lơh geh cồng nha jat jơnau đơs “4 tơn tàm dùl anih” (hơ̆ là đơng pơlam tơn, mpồl lơh broă tơn, phan bơna tơn, phan bơta mờ dong kờl tơn tàm dùl anih); lơh gơs mờ lam lơh uă ală broă lơh, srơh bè: Mpồl ală hìu bơnhă rơcang sơndră crùh ồs sa, anih crùh ồs sa mpồl bơtiàn; hòi jà làng bol tơnguh bơta rơcang gàr lài, lơh jat nền nòn ală broă lơh rơcang sơndră di tŭ mờ rơcang sơndră ồ sa, bơrtoh dùl bă geh cồng nha ngan rlau jơh”.

Bơdìh hơ̆ tai, lam lơh kờp sền jơh, sền rơ wì bơta lơngăp lơngai rơcang sơndră crùh ồs sa tàm gùt lơgar, ngan là gơ wèt mờ ală ù tiah, ală anih geh jơnau pơhìn gơlik geh ồs sa bơrtoh uă; pơn jat tai kờp sền ală jơnau cih bè adat boh lam lơh gơs, tam gơl, bơ tơl di tŭ, dipal, gơtùi lơh geh cồng nha ngan ngồn ală tơl khà bè rơcang sơndră, crùh ồs sa.

Củ tịc Quôk hội tơngkah, pal di tŭ jờng rơ, pơn jờng, lam lơh uă ală krơh niam, ală pơn rơ gơguh jak; mờ kung sơlơ tơnguh rlau tai broă lơh jat sền, lùp sền, sền sơ wì; di tŭ git gŏ, bơsong, lơh glài kràñ ală broă lơh tìs tàm broă lơh rơcang sơndră, crùh ồs sa mờ dong kờl rềs àr.

Di dơ̆ do, Củ tịc Quôk hội ồng Vương Đình Huệ hòi jà ală kâp, ală gah broă lơh mờ jơh gùt làng bol tơnguh rlau tai jơnau git wă, kơnòl bè broă lơh rơcang sơndră, crùh ồs sa mờ dong kờl rềs àr, sền do là kơnòl broă kuơmàng, pal lơh sùm, ờ gŏ di sền ờ sơp; tơl nă làng bol, tơl hìu bơnhă lơh jat tĕ ală jơnau cih bơh adat boh lam dê bè rơcang sơndră, crùh ồs sa.