Tàm 11 nhai bơh nam 2022 dê, mpồl lơh broă geh gơnoar càr Kon Tum neh gŏ 83 dơ̆ lơh tìs Adat Lơh broă brê bơnơm, kŭp rlau 419 khối dơm chi ală bơta, bă brê gơtìp mus rlau 32 lồ. Tàm dơ̆ lùp bơh Hội đồng Ñân zân càr Kon Tum dê, kwang bàng ồng Trần Bá Tuấn yal bè dơ̆ pơneh ờ niam ngan gơlik geh tàm ù tiah kơnhoàl Ia H’Drai mờ Sa Thầy mờ dơm chi gơtìp koh kơl tus gĭt nđờ rhiang khối, ồng đơs ngan neh geh bơta ờ jơh nùs ătbồ, lơh broă ờ jơh kơnòl mờ geh tŭ là tàm tu yu bal mờ bol mus kơl brê. Ồng Trần Bá Tuấn, đơs: Mờ dơm chi gơtìp koh kơl uă bè hơ̆, dilah bol he lơh niam broă lơh pơgồp bal, gĭt nền loh làng kơnòl ătbồ bơh ală anih lơh broă, ală tiah dê, tàm hơ̆ cau tờm brê, sền gàr brê, gơnoar ătbồ tàm tiah hơ̆...den ờ gơtùi geh dùl nă cau mờ mŭt tàm brê mờ mus kơl mờ khà dơm chi uă bè hơ̆ ờ. Mờ dilah mus kơl uă bè hơ̆ den jun pơndiang lik bơh brê lòt tus gùng bè lơi taih? Kung gam sơl ală trạm ală gah tai den pal gĭt nền kơnòl bơh ală trạm ală gah dê bè lơi?

Hơ tềng đăp Hội đồng Ñân zân càr Kon Tum, ồng Nguyễn Hữu Tháp, Phó Củ tịc Ủy ƀan Ñân zân càr Kon Tum đơs nền lời gơlik geh ală dơ̆ lơh tìs Adat Lơh broă brê bơnơm tài bơh broă đơng lam, sồr lơh bơh kâp ủy, gơnoar ătbồ bàr pe tiah dê ờ hềt geh sền gròi dipal; Kơnòl bơh bàr pe nă kwang bàng lơh broă lơh ătbồ sền gàr brê dê ờ hềt uă; Gam jơnau ờ gŏ ătbồ, tu yu bal dùl nse bal mờ cau mus kơl, jun pơndiang dơm chi tìs mờ adat boh lam; Broă dong kờl gah broă lơh brê bơnơm gam ờ hềt dipal; Pràn jak ătbồ bơh bàr pe nă cau tờm brê dê gam ờ hềt pràn jak...Bè broă bơsong sền gàr brê, ồng Nguyễn Hữu Tháp, pà gĭt: Ủy ƀan Ñân zân càr rơ̆p pơn jăt tai sồr ală ngàñ mờ ală tiah, să tờm tơn là kâp kơnhoàl mờ kâp xã nàng sền gàr geh brê. Tơnguh tai gơnoar broă kơnòl broă bơh cau tờm brê mờ mpồl cau sền gàr brê dê. Tơnguh rlau tai broă lơh lòt sền, gròi sền, ngan là tàm ală kàl lơh mìr lơh sươn. Ủy ƀan càr rơ̆p geh broă rơndăp lơh nàng tơnguh tai broă lơh lòt sền, gròi sền mờ sồr ală tiah bơh kơnhoàl tus xã mờ ală mpồl cau nàng gŏ, lơh glài mờ kwơmàng là lơh glài kràñ ală cau lơh tìs.

Ồng Nguyễn Hữu Tháp, Phó Củ tịc Ủy ƀan Ñân zân càr Kon Tum kung đơs nền, pơndrờm bal dùl tŭ mờ nam 2021, jơnau lơh tìs Adat Lơh broă brê bơnơm tàm ù tiah càr dê neh gơmù jơh bal bè khà dơ̆, bă brê gơtìp mus kơl mờ dơm chi gơtìp mus kơl. Tàm nam, càr neh lơh glài mờ priă 63 dơ̆; lơh glài kŭp jàm 17 dơ̆ mờ gam lùp khàu, lùp khàu wơl 23 dơ̆. Bè kơnòl neh lơh glài 27 nă cau, tàm hơ̆ geh 16 nă kwang bàng. Anih Cah rña làng bol ală kâp neh ai tơlik cah rña 4 dơ̆, lơh glài 20 nă cau lơh tìs mờ kờp jơh bơta lơh glài là 347 nhai ơm jàm, 65 nhai ơm jàm tàm hìu mờ lơh glài lơh gĭt gơjrañ sang glài ờ krơ̆ jàm 60 nhai.