Tàm ƀòn Kđoh, sàh Cư Pơng, càr Dăk Lăk, broă lơh mblàng yal bè ngai tĕ khà geh lam lơh bơh nhai 11 nam lài. Bal mờ yồng ƀăng rôn, áp phích tàm ală gơl gùng tờm, yal tàm loa pờ tơlik jơnau đơs, gơnoar atbồ tàm ƀòn lơgar gam lơh pràn mblàng yal tơn bơh pơrjum ƀòn, pơrjum mblàng yal adat boh lam. Mờ kung pơnđàng jơnau tơnggit, sră nggal mblàng yal tàm ală pang mạng sàh hội mờ gah yal tơnggit jơnau dơlam is mpồl nàng tàm tơrbŏ bal, yal di tŭ làng bol in.

Ồng Y Hoh Niê, Cau lam bồ Mpồl lơh broă Mặt trận ƀòn Kđoh pà git, tơngume mblàng yal tơrgùm tàm broă pơlam cau tĕ khà lơh gơnoar tĕ khà di jơnau sồr, rơ wah ală cau tơl bơngă pin dờn, tơl pràn jak nàng ala mat làng bol in: “Mblàng lơh loh làng bol in git mờ lòt tĕ khà di nàng sac rơ wah ală cau ala mat ngan ngồn geh tơl nùs nhơm niam, geh tơl pràn jak nàng ala mat làng bol in, lơh broă geh kơnòl nàng cèng wơl bơta kuơ mờ dong làng bol geh rài kis niam rlau. Bol hi rơp cih dờp ală jơnau sồr lơh, gùng dà pơlam bơh kâp hơđang dê mờ mblàng yal wơl làng bol in nàng loh di, nàng dơ̆ tĕ khà geh lơh niam bơnĕ, geh cồng nha”.

Bơh broă lơh mblàng yal, ală jơnau yal tơnggit bè tĕ khà geh mblàng yal, pơnđàng loh làng, cau tĕ khà kung pơyua bơta kơp kờñ tàm ală cau ala mat rơp geh sac rơ wah, hơ̆ là ală cau geh tơl ală bơta pal geh jat jơnau cih bơh adat boh lam dê, mờ kung pal wă wờng bè bơhiàn ờs mờng, rềp làng bol mờ gơtùi đơs jơnau đơs ƀòn lơgar he dê. Mè Lip dê, ơm tàm ƀòn Ea Klok, sàh Cư Pơng đơs: “Añ kơp kờñ dơ̆ tĕ khà mờr tus rơp sac rơ wah cau geh tơl nùs nhơm niam, geh tơl pràn jak, sùm sền gròi tus làng bol, ờ tam cah rƀah lơ ời halà pas sơm. Sùm ơm rềp làng bol, wă wờng bơhiàn ờs mờng, git rài kis làng bol dê, gơtùi đơs jơnau đơs làng bol kòn cau he dê”.

Jat Anih duh broă tĕ khà càr Dăk Lăk yal, tus tŭ do, cribơyai dơ̆ 1 neh ring bal 28 nă cau geh yal tơnggit tơlik mat tĕ khà nàng pồ 15 nă cau ala mat Quôk hội khoă XVI, tàm hơ̆ rơndap tap sèng geh 5 nă cau jơi bơtiàn dồ êt nă cau, 9 nă cau ùr mờ 1 nă cau kơnòm să. Gơ wèt mờ cau ala mat Mpồl duh broă Làng bol càr, mat cribơyai geh 148 nă cau nàng pồ 84 nă cau ala mat. Tàm kấp sàh, gùt càr kờp dŭ pồ 2 rbô 445 nă cau ala mat Mpồl duh broă Làng bol.

Tàm ƀòn lơgar, jơnau sồr bè rơndap tap sèng cau ala mat, ngan là cau ùr mờ cau jơi bơtiàn dồ êt nă cau, geh ai tơlik loh làng ngan bơh tàm tŭ tơngai cribơyai tơn. Mò H’Hương Ƀkrông, Củ tịc Anih duh broă Mặt trận dà lơgar Việt Nam sơnah ƀòn Ea Kao, càr Dăk Lăk đơs là: “Gơnoar broă bơh cau ùr dê ngai sơlơ geh sền dờng màng, rơp ala mat ai jơnau đơs bơh cau tĕ khà he dê, đơs bơta kơp kờñ làng bol dê, is ồn, tàm hơ̆ là cau ùr. Bè hơ̆ den rơndap tap sèng cau ùr, cau jơi bơtiàn dồ êt nă cau là dùl rơndap tap sèng pơgồp bal dipal, gàr niam ai gơnoar kuơ bơh cau ùr mờ cau jơi bơtiàn dô êt nă cau dê in tàm broă tus bal tơlik mat tĕ khà. Do kung là bơta ai tơnggŏ gơnoar mơya kung là kơnòl kơn jơ̆ ngan gơ wèt mờ tơl nă cau geh yal tơnggit tơlik mat tĕ khà”.

Tàm tŭ tơngai geh bơta tam gơl bè ù tiah mờ rơndap tap sèng làng bol tơnơ̆ tŭ tơmut bal, broă lơh rơcang tĕ khà tàm càr Dăk Lăk geh git nền là kơnòl cíñ trị tờm ngan, sồr pal geh bơta rơcang lài mờ pơgồp bal nền nòn đah ală kâp, ală gah broă lơh. Broă kờp sền, tam gơl rơndap tap sèng, cau mờ khà cau tơlik mat tĕ khà geh lơh nền nòn, di jơnau sồr, lơh bơnàng jă ai ală broă cribơyai pơn jat tai in.

Jat mò Cao Thị Hòa An, Phó Đơng lam Đảng duh broă sùm Tỉñ ủy càr, Củ tịc Mpồl duh broă Làng bol càr, Củ tịc Anih duh broă tĕ khà càr Dăk Lăk, ală broă rơcang gam geh lơh ndrờm bal, gàr jơnau sồr bè rơndap tap sèng mờ jơnau pal geh bơh cau ala mat dê: “Ală broă tus tŭ do den Anih duh broă tĕ khà kung geh bơta tàm pơgồp bal mờ rơcang lài lơh gơs niam mờ gờñ lài mờ tŭ tơngai hơ pơrgon. Tàm tơngai tus, pơn jat tai ală broă gàr niam jat broă rơndap lơh, rơndap tap sèng cau mờ jơnau pal geh cau ala mat jat di jơnau sồr”.

Gàr niam rơndap tap sèng là cau jơi bơtiàn dồ êt nă cau mờ cau ùr tàm trĕ khà ờ mìng lơh jat jơnau sồr bơh adat boh lam dê, mờ gam pơgồp bơnah gàr kơ̆ bơta pin dờn cau tĕ khà dê tai. Mờ ù tiah krơi is bè làng bol ơm kis bè càr Dăk Lăk, broă gàr niam rơndap tap sèng tàm tŭ tĕ khà rơp lơh gơlik bơta niam nàng ngui niam gơnoar broă ala mat bơh anih lơh broă làng bol pồ dê, lơh gơlik bơta ring bal tàm ală rơnàng làng bol.