Jat ală cau ala mat, nàng lơh geh khà gơguh lơh sa rlau 10% gùt nam bơh khà 7,84% tŭ do, Anih duh broă Làng bol càr Dăk Lăk kờñ pal gờñ bơt bơtàu jơnau rơcang mùl màl, git nền loh ală rơndap broă lơh gơn kơnờm, priă bơcri rơp ai mờ ală broă lơh lơh gơlik bơta tam gơl pràn. Ồng Lê Văn Cường - Lam bồ Mpồl Niam chài - Mpồl bơtiàn Mpồl duh broă Làng bol càr Dăk Lăk dê sồr: “Añ sồr Anih duh broă Làng bol càr pal đơs loh là 6 nhai lồi nam rơp geh broă lơh lơi, rơndap broă lơh lơi, ai priă bơcri lơi nàng gàr gơtùi lơh geh gơguh lơh sa kờp bal gùt nam geh bơh 10,02% rlau hơđang”.

Mblàng lơh loh ală bơta gơ kòl tus gơguh lơh sa, ală cau ala mat Mpồl duh broă Làng bol càr Dăk Lăk đơs là, tàm jơh bal gah ù tiah, sră pơ àr gơnoar atbồ, ndrờm geh uă bơta kờñ pal bơsong. Mò Bùi Thị Hà Giang - Bí thư Đảng ủy, Chủ tịch Mpồl duh broă Làng bol sàh Ea Drăng, càr Dăk Lăk đơs bơta geh ngan tàm sàh: “Bơta niam nùs làng bol mờ mpồl lơh sa kă bro dê tàm broă lam lơh sră pơ àr gơnoar atbồ là ờ hềt niam. Dơ̆ 2 là broă lơh atbồ dà lơgar bè ù tiah, lơh sră ngui ù kung bè ală broă rơndap lơh ngui ù geh bơh anih suơn dờng lơh sa suơn sre, brê bơnơm gam gơtìp uă ngan bơta gơkòl mờ bol he digơlan kal ke ngan lam lơh kơnòl broă bơtaù tơnguh lơh sa sàh bol hi dê đơs is, càr dê đơs bal”.

Dơ̆ pơrjum Mpồl duh broă Làng bol càr Dăk Lăk dê geh lơh tơnơ̆ tŭ càr yal Rơndap ù tiah mờ lam lơh geh cồng nha Pơrjum hòi jà bơcri priă. 25 rơndap broă lơh, kờp jơh priă bơcri rlau 40 rbô 200 tơmàn đong neh geh lơh sră cơng tàng bơcri priă. Ală rơndap broă lơh bơcri priă gam geh lơh tàm càr Dăk Lăk kung geh bă ù lơh dờng ngan. Bulah bè hơ̆, jat cau ala mat Huỳnh Gia Hoàng - Phó Kwang lam bồ Sờh Priă jền càr Dăk Lăk, nàng tă pơgồp ngan ngồn ai gơguh lơh sa in, jơh gùt anih lơh broă chính trị kờñ pal lơh broă kràñ cê rlau, bơsong bơta ờ niam bè ai ù lơh rơndap broă mờ ai priă bơcri: “Nàng ai priă bơcri dà lơgar, pal git nền do là kơnòl broă bal bơh jơh gùt anih lơh broă chính trị dê. Is ồn là tơrgùm tàm broă ai ù lơh rơndap broă. Ờ hêt geh nam lơi mờ priă jền lời ai bơcri priă dà lơgar in uă bè do. Den tàng kâp ủy, gơnoar atbồ kâp hơ đơm, is ồn là gơnoar atbồ kâp sàh, sơnah ƀòn pal git nền do là kơnòl broă tờm geh lơh sùm nàng lam lơh tàm jơh gùt tơngai lơh broă”.

Ală cau ala mat ring bal đơs, Dăk Lăk gam uă tŭ niam bơtàu tơnguh tŭ ù tiah bơtàu tơnuguh geh rề ơnàng, rơndap ù tiah neh geh yal mờ bơta sền gròi bơh ală cau bơcri priă dê ngai sơlơ uă. Bulah bè hơ̆, tŭ niam mìng gơtùi gơ gơs bơta gơn kơnờm gơguh lơh sa tŭ ală bơta gơ kòl bè bơcri priă dà lơgar, ù tiah, rơndap ù tiah, sră pơ àr gơnoar atbồ mờ gùng dà, broă lơh ngan ngồn geh tă bơsong di tŭ tàm ală nhai lồi nam.