8 jơnau rơcang cih adat neh geh tơrgùm cribơyai, tă pơgồp jơnau đơs, geh: Adat tàm pơrlòng giă (tam gơl); Adat tàm pơrlòng giă jơtài (tam gơl); Adat Hìu ơm (tam gơl); Adat bơtàu tơnguh mpồl lơh sa kă bro dềt mờ dimơ; Adat tam gơl, bơtơl bàr pe bơta bơh Adat Kă bro phan, Adat tàm pơrlòng, Adat atbồ kă bro phan mờ lơgar ndai, Adat Sền gàr gơnoar kuơ cau ngui sa; Adat blơi wơl, ngui wơl jơtài; Adat tam gơl, bơtơl bàr pe bơta bơh Adat lơngăp lơngai, kloh niam lơh broă dê mờ jơnau rơcang cih Adat tam gơl, bơtơl bàr pe bơta bơh ală adat bè tàp pràn să jan, lòt nhơl, hìu prap mờ sền sră, lơma, phan lời wơl niam chài, yal tơnggit, sră ƀăo.

Gơ wèt mờ jơnau rơcang cih Adat tàm pơrlòng giă jơtài (tam gơl), ala mat Sờh Sền gàr adat boh lam càr Dăk Lăk đơs là, jơnau rơcang cih mìng rơp pa ơm tàm broă cih tơrgùm kờp ală ƀộ, gah broă lơh dà lơgar mờ Anih duh broă Làng bol kâp càr, ờ hềt lơh loh kơnòl mùl màl tơl anih lơh broă dê: “Bơta 9 bè kơnòl atbồ dà lơgar gơ wèt mờ tàm pơrlòng giă jơtài kờñ pal geh bơ tơl, jàu Chính phủ cih cih mùl màl tơngume do nàng lơh loh tơngume atbồ dà lơgar, mờ kung lơh loh ƀòn lơgar, anih lơh broă lơi geh kơnòl, dong Anih duh broă Làng bol càr tàm broă lam lơh kơnòl broă do”.

Tă pơgồp jơnau đơs tàm jơnau rơcang cih tam gơl, bơ tơl bàr pe bơta bơh Adat Kă bro phan dê, ală cau ala mat sồr cih mùl màl rlau kơnòl loh làng, yal mat phan bơna, broă drơng ala gơ wèt gơnoar mìng is dà lơgar dê, gàr loh gơnăp gơnoar mờ ƀuơn ƀuài tàm lam lơh jat. Ồng Hồ Văn Dũng, Phó Lam bồ Chi cục sền swì dia phan lik mờ mut tiah XIV geh jơnau đơs: “Jơnau cih bè do mìng ơm wơl tàm broă là Ƀộ geh kơnòl yal loh làng mat phan bơna, broă drơng ala gơ wèt gơnoar mìng is, ờ hềt đơs tus broă anih lơh broă geh kơnòl cih, yal mat phan bơna, broă drơng mìng gơnoar is ồn, nđờ jơnau cih hơ̆ den gơ wèt anih lơh broă hơ̆. Sồr bơtơl jơnau cih là mùl màl, nàng gàr loh gơnăp gơnoar mờ kơnòl bơt bơtàu mờ lơh gơlik bơta ƀuơn tàm lam lơh jat”.

Gơ wèt mờ jơnau rơcang cih Adat tam gơl, bơtơl bàr pe bơta bơh Adat lơngăp lơngai, kloh niam lơh broă, bơta geh ală cau ala mat sền gròi là rề ơnàng cau blơi sră sền gàr rềs àr lơh broă, kòp broă lơh pal geh pơgồp bal mờ gùng dà dong kờl dipal. Jat hơ̆, kờñ pal kơlôi sơnơng cih loh bơta dong kờl bơh kes priă dà lơgar halà Kes priă sền gàr rềs àr lơh broă, kòp broă lơh gơ wèt mờ khà priă tă bơh mpồl cau lơh broă ờ geh sră pơrgon lơh broă gơ wèt hìu bơnhă rƀah, ndrờm bè cau rƀah halà ơm kis tàm tiah làng bol jơi bơtiàn dồ êt nă cau, dong broă lơh gơtùi lơh geh cồng nha tŭ lam lơh jat.

Bơdìh hơ̆ tai, ală cau ala mat sồr sền swì bơta tờm kờp khà priă tă, khà dờp bơta dong kờl sền gàr rềs àr lơh broă, kòp broă lơh dê gơ wèt mờ cau lơh broă tàm ală ƀòn lơgar gơ wèt tiah 2, 3 mờ 4, tàm hơ̆ geh Dăk Lăk. Broă bơt bơtàu khà ngui nàng tam gơl khà priă nhai neh tă priă sền gàr rềs àr mpồl bơtiàn halà khà dong kờl êt ngan kờñ pal geh kơlôi sơnơng nàng gàr niam gơnoar kuơ cau lơh broă gơtìp gơmù bơta pràn lơh broă tài rềs àr halà kòp broă lơh in. Ồng Nguyễn Phú Lập, Phó Chủ tịch Mpồl ala mat Cau lơh broă càr Dăk Lăk geh jơnau đơs: “Tŭ bol he neh cih bơh khà priă nhai bơh sơn rờp gơ gơs khà priă nhai bơh sơn rờp bă tiah dê den bol he rơp kờp khà bơh chờm nđờ bơnah rhiang tàm khà dong kờl hơ̆. Nàng tŭ geh rềs àr, gơ wèt tàm khà gơmù bơta pràn lơh broă den bol geh rơp geh khà bè hơ̆. Den loh làng tŭ lơh jat tàm adat den sền gàr rềs àr mpồl bơtiàn rơp tơm priă ƀuơn rlau, nàng pleh ală bơta tŭ priă ờ huan uă mơya pal lòt lơh sră pơ àr bòl glar ngan tŭ gơlik geh rềs àr lơh broă halà kòp broă lơh”.