Ală ală cau ala mat ring bal mờ bơta jal mhar kờñ pal geh bơh broă tam gơl, bơtơl ală adat boh lam nàng kờñ lơh sir adat boh lam, lơh jat jơnau kờñ ngan ngồn, is ồn là tàm tŭ tơngai lơh pràn tam gơl sồ, tam gơl wơl sră pơ àr gơnoar atbồ mờ bơt bơtàu gơnoar atbồ ƀòn lơgar bàr kâp. Tă pơgồp jơnau đơs tàm jơnau rơcang cih Adat git jơnau yal, ồng Bùi Thanh Toàn, Kwang lam bồ Sờh Jak chài mờ măi mok càr Dăk Lăk đơs là, kờñ pal lơh loh rlau tai broă bơsong bơh adat dê, ngan là jơnau pơryan “anih lơh broă dà lơgar” mờ cau geh kơnòl yal jơnau tơnggit. Mùl màl tŭ do kung gam bơta sơmờm gơnoar halà pleh ờ bài yal jơnau tơngit. Ồng Bùi Thanh Toàn đơs bơta geh ngan mờ sồr bơ tơl jơnau cih loh làng broă lơh glài broă lơh tìs, kung bè kơnòl bơh cau ngui jơnau tơnggit dê tŭ geh yal: “Kơrnuat lơh glài ngan là neh gơ ơm tàm ală adat boh lam, ală jơnau cih ndai. Bulah bè hơ̆ jat añ kung kờñ pal đơs sùm tàm adat do. Ai tàm do den uă ngan là sền gŏ cau tờm yal jơnau tơnggit, mơya tơnơ̆ hơ̆ dilah añ lơh tìs jơnau tơnggit hơ̆ den añ rơp gơtìp lơh glài bè lơi. Ngan là tàm adat boh lam do ờ gơtùi cih mùl màl broă lơh glài mơya kờñ pal geh dùl jơnau đơs sùm là rơp geh adat boh lam ndai lơh glài”.

Bal mờ tơngume do, bàr pe nă cau ala mat sồr kờñ pal cih mùl màl rlau ală bơta ờ bài yal jơnau tơnggit nàng pleh sơmờm jơnau tài bơh “ndơp ndơr dà lơgar”. Mờ kung kờñ pal yal jơnau tơnggit bơh măi mok sồ mờ sơlơ tàm yal tơnggit jơnau đah ală anih lơh broă. Tŭ do kung gam bơta “tàm pồn” jơnau tơnggit đah ală gah lơh broă, lơh kơryan tus broă geh git jơnau yal làng bol dê.

Gơ wèt mờ Adat dong kờl kơrnuat boh lam, mò Lê Thị Thanh Thủy, Phó Kwang lam bồ Sờh Sền gàr adat boh lam càr Dăk Lăk đơs là, kờñ pal rề ơnàng cau geh dờp bơta dong kờl mờ tơnguh bơta niam broă drơng ala. Den tàng, adat boh lam kờñ pal bơ tơl mpồl cau dờng sơnam kis dồ nă să, cau gơtìp aniai bơh bơta tam lah tam lơh tàm hìu bơnhă tơmut tàm mpồl geh dong kờl kơrnuat boh lam di tŭ, mờ kung tam gơl gùng dà broă lơh priă jền nàng gơ hòi gơ jà cau chài cah rơña, cau geh jơnau git wă jrô tus bal: “Dilah gàr bè ờs jat jơnau cih yau den kal ke ngan nàng gơtùi hòi jà cau chài cah rơña jak halà cau geh jơnau git wă jrô bè adat boh lam geh bơta jơh nùs tus bal tàm broă dong kờl kơrnuat boh lam, is ồn là tàm ală tiah kal ke, lơh gơ rềng tus bơta niam broă drơng ala kung bè bơta geh dờp ring bal adat boh lam bơh làng bol dê. Sờh Sền gàr adat boh lam dan bơt bơtàu dùl gùng dà broă lơh priă jền gàr tơl priă jền ai broă lơh dong kờl kơrnuat boh lam in, is ồn là tàm ală tiah sar lơgar ngài, tiah kal ke pơgồp bal mờ broă dong kờl dipal gơ wèt mờ cau lam lơh kơnòl dong kờl kơrnuat boh lam”.

Đơs pơn dut dơ̆ pơrjum, mò Nguyễn Thị Thu Nguyệt, Phó Kwang lam bồ Mpồl cau ala mat Quôk hội càr Dăk Lăk đơs niam nùs nhơm geh kơnòl, bơta niam ală jơnau đơs tă pơgồp dê. Mpồl cau ala mat Quôk hội càr Dăk Lăk rơp tơrgùm wil tơl ală jơnau đơs nàng kơlôi sơnơng, lơh sir tơngume tus bal cribơyai tàm dơ̆ pơrjum Quôk hội do, pơgồp bơnah tơnguh bơta niam ală rơndap lơh adat boh lam, lơh bè lơi nàng tŭ ai lơh jat rơp mhar geh ngui ngan ngồn tàm rài kis mờ lơh geh cồng nha.