Dùl tàm ală tơngume geh cau lơh broă sền gròi là broă gàr niam gơnoar kuơ sền gàr rềs àr mpồl bơtiàn tàm bơta mpồl lơh sa kă bro gam lơyài tă priă. Ồng Cao Văn Bi, Chủ tịch Mpồl Ala mat cau lơh broă kâp hơđơm dùl mpồl lơh sa kă bro tàm sơnah ƀòn Tuy Hòa, càr Dăk Lăk dan kờñ pal geh broă lơh nàng cau lơh broă ờ gơtìp gơ rềng tus gơnoar kuơ tŭ mpồl lơh sa kă bro ờ hềt lơh gơs kơnòl broă tă priă sền gàr rềs àr mpồl bơtiàn: “Jơnau lơh nền 158 Chính phủ dê den sền gàr rềs àr mpồl bơtiàn mìng yal tŭ tơngai mờ mpồl lơh sa kă bro neh tă priă cau lơh broă in. Bè hơ̆ den cau lơh broă gơtìp hoàc huơr. Den tàng kung kờñ dan là lơh bè lơi nàng yal tŭ tơngai tă priă cau lơh broă dê in tus tơngai ơm rlô lơh broă. Gam 2 nhai, 3 nhai halà 1 nam mờ mpồl lơh sa kă bro ờ hềt tă priă den dà lơgar, anih lơh broă he dê geh kơnòl ai bơnah priă hơ̆ mpồl lơh sa kă bro dê nàng cau lơh broă ờ gơtìp gơ rềng”.

Tàm pơrjum, ală jơnau đơs bơh đoàn viên, cau lơh phan, cau lơh broă sa priă nhai dà lơgar, cau lơh broă mờ kwang bàng ala mat cau lơh broă dê tơrgùm tàm ală kal ke gam ai tơlik tàm rài kis, broă lơh mờ tŭ lam lơh ală broă lơh gơ rềng tus cau lơh broă. Pal sền ngac là bơta broă lơh tàm tŭ tơngai jơnau sồr bè bơta chài lơh broă, bơta chài sồ ngai sơlơ uă; bơta lơyài tơm priă nhai, lơyài tă priă sền gàr rềs àr mpồl bơtiàn; jơnau kờñ hìu ơm mpồl bơtiàn, hìu ơm wơl cau lơh phan in mờ ală bơta gơ kòl tàm broă geh dờp ală broă lơh gàr lơngăp lơngai rài kis.

Broă lơh bè bơta bơto bơtê broă lơh mờ broă lơh tàm ƀòn lơgar, ồng Nguyễn Quang Thuân, Phó Kwang lam bồ Sờh broă dơlam is càr Dăk Lăk pà git, ai geh broă lơh, tơnguh priă lơh geh mờ gàr kơ̆ kơljap rài kis cau lơh broă in là dùl tàm ală kơnòl broă mờ càr sền gròi ngan: “Lài ngan, càr neh pơgồp bal mờ ală sờh, gah broă lơh bơt bơtàu broă rơndap lơh bơto bơtê, tơnguh bơta chài lơh broă cau lơh broă in tàm tơngai tus. Mờ kung dong kờl mpồl lơh sa kă bro tàm tơrbŏ bal broă lơh, sền gròi tus ală hìu bơnhă jơgloh rƀah, mờ uă broă lơh bè ai geh broă lơh tơn tàm ƀòn lơgar, tàm tơrbŏ bal cau lơh broă bơdìh càr mờ ai cau lơh broă lòt lơh broă tàm lơgar ndai, tàm hơ̆ geh cau lơh broă jat tơngai pơrgon”.

Bal mờ broă bơsong ală bơta gơ kòl bè broă lơh, tam gơl sồ geh git nền là dùl tàm ală broă lơh nàng kờñ tơnguh bơta niam drơng broă, dong làng bol mờ cau lơh broă git broă lơh ƀuơn rlau, ngan là ală broă lơh bè sền gàr rềs àr mpồl bơtiàn. Ồng Tạ Đức Hậu, Phó Kwang lam bồ Sền gàr rềs àr mpồl bơtiàn càr Dăk Lăk pà git, gah sền gàr rềs àr mpồl bơtiàn gam rơhời tam gơl broă lơh drơng broă, dong cau lơh broă geh dờp ală bơta dong kờl ƀuơn rlau: “Gah sền gàr rềs àr mpồl bơtiàn git nền tam gơl bơh drơng broă jat bơta rơndap lài gơ gơs drơng broă rơcang lài. Tơnơ̆ tŭ geh anih yal jơnau tơnggit kloh niam den bol hi rơcang lài tàm tơrbŏ mờ anih yal jơnau tơnggit dà lơgar bè làng bol ơm kis nàng git gŏ ală bộ yal mat cau lơh broă gam ờ hềt di, ờ hềt ndrờm bal den bol hi rơcang lài pơyua mat ală cau lơh broă gam tìs anih lơh broă atbồ cau lơh broă in kung bè nàng cau lơh broă in di tŭ git, tam gơl wơl”.

Đơng lam Anih duh broă Làng bol càr Dăk Lăk đơs nền, ală tơngume geh cribơyai tàm pơrjum ờ mìng ơm wơl tàm broă hơ wơl tơl jơnau lùp mờ gam ai tơlik jơnau sồr pơn jat tai bơsong tơnơ̆ tìp mat tơm boh bơr. Anih duh broă Làng bol càr Dăk Lăk cih dờp, sồr ală anih lơh broă geh gơ rềng kơlôi sơnơng mờ bơsong. Mờ kung sồr sơlơ tìp mat tơm boh bơr tơn đah gơnoar atbồ, mpồl lơh sa kă bro mờ cau lơh broă; pơgồp bal mờ mpồl ala mat cau lơh broă nàng gròi sền rài kis phan bơna, nùs nhơm mờ sền gàr gơnoar, bơta kuơ dipal bơh đoàn viên, cau lơh broă dê.