Tơnơ̆ uă poh lòt lơh broă tàm dà lềng, ơhò cau lơh ka Đỗ Văn Tiến dê ơm tàm sơnah ƀòn Hoài Nhơn Đông, càr Gia Lai rê wơl anih ơhò ơm dồ bă lơngăp lơngai, di jơnau sồr mờ khoang ơhò bềng tơn ka. Jat ồng Tiến, broă lơh ka tàm dà lềng tŭ do ngai sơlơ geh ală jơnau sồr kràñ ngan. Ală broă lơh bè tras, kup phan ờ geh sră ai gơnoar, tras, kup phan tìs bă tiah, tìs broă, sơrlèt rlau tiah nhàr geh ai gơnoar; ờ gàr sùm tềl tơnggŏ măi mok jat sền gùng lòt; ờ cih halà cih ờ song jơnau yal pah ngai tras, kup phan; ngui broă lơh, phan tras, kup ờ geh ai halà tras, kup phan tìs tàm tiah dà lềng lơgar ndai… ndrờm gơtìp lơh glài kràñ ngan. Bè hơ̆ den tàng, broă git nền ală jơnau sồr, jơnau cih neh gơ gơs kuơmàng ngan tàm pah dơ̆ lòt lơh ka tàm dà lềng: “Chính phủ neh ai tơlik uă Jơnau lơh nền, mpồl ling sền gàr tiah nhàr lơgar, mpồl sền swì broă lơh ka pah nhai ndrờm mblàng yal tus làng bol lơh ka tàm dà lềng bol hi in. Kơp kờñ jơh tơl nă cau lơh jat nền nòn, sră pơ àr wil tơl, tras, kup phan ờ gŏ di lơh tìs nàng Việt Nam bol he dê mhar tă “Sră rơmit” nàng tac hờ lơgar ndai phan tàm dà lềng lơh geh uă cồng nha niam”.

Kung bè uă cau lơh ka ndai, cau lơh ka Nguyễn Hữu Kính ơm tàm jơnum 3, Bãi Xếp, sơnah ƀòn Quy Nhơn Nam neh đềt mềr jơh rài kis mờ dà lềng, bè hơ̆ den tàng broă lơh jat adat boh lam ờ mìng là nàng pleh gơtìp lơh glài, mờ gam nàng sền gàr is să tờm he mờ gàr wơl broă lơh sa dồ bă jŏ jòng: “Bol hi geh Pôs đồng Ling sền gàr tiah nhàr lơgar mpồng nhàr lơgar mblàng yal bè adat boh lam, bè lơh jat ală jơnau sồr pal jat tàm dà lềng nàng làng bol in git loh mờ lơh jat gơ in di, ờ gŏ di lơh tìs jơnau sồr, jơnau cih. Bơh ală phan bơna den lơh ngan nàng lơh jat di adat boh lam geh mblàng yal. Ưn ngài ngan bơh sền gròi bơh mpồl ling sền gàr tiah nhàr lơgar dê bè ai bol hi in git ală jơnau sồr, jơnau cih bal, nàng bol hi in lơh jat”.

Đại úy Lê Văn Hòa, Lam bồ Anih gròi sền Mpồl ling sền gàr tiah nhàr lơgar Mũi Tấn pà git, tus do, Jơnau lơh nền Chính phủ dê sồ 246 cih lơh glài lơh tìs sră pơ àr gơnoar ătbồ tàm gah phan tàm dà rơp ai lơh jat ngan ngồn mờ ala ală Jơnau lơh nền Chính phủ dê lài hơ̆. Bè hơ̆ den tàng, mpồl lơh broă bol hi sùm mblàng yal cau lơh ka in tŭ khi lơh sră pơ àr nàng ơhò lơh ka geh lik mờ mut tàm anih ơhò ơm: “Gơ wèt mờ jơnau cih, jơnau sồr pa bè lơh glài lơh tìs sră pơ àr gơnoar ătbồ tàm gah IUU den mpồl lơh broă  bol hi neh lam lơh mblàng yal tơrgùm bal tus cau lơh ka tơnơ̆ ală dơ̆ lòt tras, kup phan tàm dà lềng rê wơl, tơrgùm tàm anih ơhò lơh ka ơm. Gơ wèt mờ ală cau lơh tìs jơnau cih, jơnau sồr den mpồl lơh broă rơp lơh glài kràñ jat jơnau cih adat boh lam dê, mờ kung yal gơnoar atbồ ƀòn lơgar in nàng ătbồ bal cau lơh ka lơh tìs nàng gàr broă lơh tă sră rơmit Việt Nam dê”.

Ai gơ wèt mờ Pôs đồng ling sền gàr tiah nhàr lơgar Mpồng nhàr lơgar anih ơhò ơm Quy Nhơn, mpồl ờ mìng mblàng yal tàm anih ơhò lơh ka ơm, tiah ơhò plung ơm mờ gam lam lơh uă dơ̆ mblàng yal adat boh lam tàm ală ƀòn lơh ka. Tơngume tơrgùm tàm ală kơrnuat lơh glài mờ broă lơh glài bơ tơl gơ wèt mờ ală broă lơh tìs geh cih tàm Jơnau lơh nền Chính phủ dê sồ 246. Trung tá Vũ Đức Tuệ - Lam bồ Pôs đồng Ling sền gàr tiah nhàr lơgar Mpồng nhàr lơgar anih ơhò ơm Quy Nhơn pà git: “Tơnơ̆ pah dơ̆ yal tơnggit jơnau, mblàng yal rơp dong làng bol lơh ka git loh ală jơnau cih adat boh lam dê, bơh hơ̆ tơnguh jơnau git wă lơh jat mờ mblàng yal wơl cau pròc mhàm tờm in tàm tŭ lơh jat. Bơh email, màh QR bol hi neh ai lơh jat tus làng bol, den kơp kờñ làng bol yal jơnau tơnggit tàm màh QR nàng bol hi sồr mpồl lơh broă in đal git, bơsong jat jơnau cih”.

Gia Lai tŭ do geh 3 rbô 147 nơm ơhò tàm khà kờp jơh 3 rbô 152 nơm ơhò tras, kup phan tàm dà lềng neh crăp phan jat sền gùng lòt jat jơnau sồr.

Ồng Nguyễn Anh Dũng - Phó kwang lam bồ Mpồl atbồ anih ơhò lơh ka ơm càr Gia Lai pà git, broă lơh mblàng yal geh lam lơh sùm, tŭ ơhò rơcang lik bơh anih ơhò ơm tus tŭ mut wơl tàm anih ơhò ơm. Kơnờm bơh hơ̆, cau lơh ka ngai sơlơ rơcang lài lơh jat ală jơnau cih, jơnau sồr bè tras, kup phan tàm dà, ngan là ală jơnau sồr bè ờ ai tras, kup phan jat IUU: “Bơh tơngai lam lơh, làng bol neh git wă bè IUU den tàng tŭ rê wơl anih ơhò ơm ndrờm lơh jat niam bè lơh broă kung bè tras, kup phan, lơh jat ală jơnau sồr geh ai tơlik. Tus tŭ do, jơh ală ơhò plung ndrờm lơh jat niam lơm, tơngai tus, bol hi pơn jat tai lơh ngan pơgồp bal mờ làm gah pơlam làng bol tai bè cih wơl jơnau yal pah ngai điện tử nàng làng bol in lơh sir rlau tai bè tam gơl sồ mờ ală jơnau lơh nền càr dê neh ai tơlik”.

Jơnau lơh nền Chính phủ dê sồ 246 rơp ngan ngồn geh ai lơh jat bơh ngai 18/8 do. Broă sơlơ tơnguh tai mblàng yal, sŏk sền mờ lơh glài broă lơh tìs geh ală mpồl lơh broă geh gơnoar git nền là broă lơh kuơmàng nàng kờñ tơnguh jơnau git wă lơh jat adat boh lam cau lơh ka dê, kơryan bơta tras, kup phan jat IUU, pơgồp bơnah bal mờ gùt lơgar tă jơnau tơngkah lài “Sră rơmit” bơh Anih duh broă châu Âu dê gơ wèt mờ gah lơh phan tàm dà Việt Nam dê.