Là dùl tàm 4 sàh ờ duh pal tơmut bal jat Jơnau lơh nền rơndap tap sèng mpồl lơh broă sră pơ àr gơnoar atbồ, sàh Quảng Hoà geh càr Lâm Đồng jàu ing 55 nă cau lơh broă sa priă nhai dà lơgar. Mơya tơnơ̆ rlau 1 nhai lơh broă, sàh mìng geh 32 nă cau lơh broă sa priă nhai dà lơgar, ờ tơl tus 23 nă cau lơh broă sa priă nhai dà lơgar. Ồng Hoàng Trung Diện, Củ tịc Anih duh broă Làng bol sàh Quảng Hòa pà git, bơta do neh lơh gơbàn tus bơta ờ geh cau at gơnoar broă mờ bơta “tơm bồl” tàm broă lơh kwang bàng: “Kuơmàng tàm broă lơh rơndap ai kwang bàng đơng lam ală cơldŭ, mpồl lơh broă. Cơldŭ lơhbroă tus tŭ do ờ hềt geh phó lam bồ cơldŭ lơh broă mờ ờ hềt geh lam bồ cơldŭ lơh broă, mìng geh 2 nă kwang bàng là cau lơh broă ờs mờng drơng broă sră pơ àr, cau atbồ broă sền gròi tă dơ̆ ngui priă jền. Anih duh broă Làng bol sàh sồr 2, 3 nă kwang bàng tàm mpồl lơh broă Đảng kung bè đah Mpồl duh broă rê dong kờl anih duh broă in tàm tŭ đơng lam lơh broă”.

Tàm tŭ geh sàh bè Quảng Hòa gam ờ tơl ngan cau lơh broă sa priă nhai dà lơgar, sàh Krông Nô, càr Lâm Đồng den gam ơm tàm bơta ờ git lơh bè lơi tŭ mìng tàm Anih tờm niam chài tàp pràn să jan sàh dê neh geh tus 26 nă cau lơh broă sa priă nhai dà lơgar. Ồng Huỳnh Long Quốc, Củ tịc Anih duh broă Làng bol sàh pà git, tơnơ̆ tŭ lam lơh tơmut bal 3 mpồl lơh broă sră pơ àr gơnoar atbồ, geh: sàh Dăk Drô, Tân Thành mờ ƀòn drà dềt Dăk Mâm, kơnhoàl Krông Nô, càr Dăk Nông yau, sàh Krông Nô pa dờp bè ờs bơta geh ngan Anih tờm Niam chài tàp pràn să jan bơh kơnhoàl yau, lơh gơbàn bơta cau lơh broă den uă mơya broă lơh den dồ êt: “Tŭ do, broă den ờ geh, oh mi kwi kuơ ngan. Ală sàh ndai geh crơng gơs ală anih tờm broă drơng ala dà lơgar bè do halà ờ nàng tam pà oh mi rê ală sàh ndai, ai tŭ do 26 nă cau ờ geh broă nàng lơh. Sa priă nhai dà lơgar mờ ờ lơh broă lơi, càr pal geh broă lơh dong kờl sàh in nàng tă bơsong bơta gơ kòl do”.

Tơnơ̆ nhai sơn rờp lơh broă gơnoar atbồ 2 kâp, càr Lâm Đồng ơm dơ̆ 4 gùt lơgar bè khà sồ sơñio niam nùs broă drơng ala dà lơgar. Bulah bè hơ̆, broă rơndap ai kwang bàng ờ hềt di cau, di broă, tiah den jơngkah, tiah den ờ tơl kwang bàng lơh broă mờng chài neh lơh broă lơh bơh gơnoar atbồ kâp sàh dê ờ hềt lơh geh cồng nha bè bơta kơp kờñ. Mùl màl, gùt càr geh 93 sàh, sơnah ƀòn ờ geh kwang bàng lơh mìng dùl kơnòl broă bè măi mok yal jơnau tơnggit; 60 sàh, sơnah ƀòn ờ tơl cau lơh broă gah phan kuơ geh is mờ tiah ơm kis, 33 sàh, sơnah ƀòn ờ tơl cau lơh broă gah atbồ bơt bơtàu..

Nàng bơsong bơta do, càr Lâm Đồng neh lơh dơ̆ ai rê sơn rờp mờ 260 nă kwang bàng mờng chài kâp càr mù dong kờl kâp sàh. Bal mờ hơ̆, càr kung crơng gơs 12 mpồl lơh broă tơn tus sàh, sơnah ƀòn dong kờl bơsong kal ke, bơta gơ kòl bơh gơnoar atbồ sàh, sơnah ƀòn dê. Sờh broă dơlam is mờ Mpồl kơrnuat boh lam Mpồl duh broă làng bol càr Lâm Đồng kung gam lơh broă rơndap lơh yal kâp geh gơnoar in pơn jat tai jàu ing khà cau lơh broă sa priă nhai dà lơgar nàng gơnoar atbồ kâp sàh in crăp rơcang broă tàm ntrờn kwang bàng lơh jat jơnau sồr broă lơh mờng chài dê.

Ồng Đỗ Văn Chung, Kwang lam bồ Sờh broă dơlam is càr Lâm Đồng pà git, càr kung gam lơh pràn broă rơndap tap sèng, rơndap mpồl lơh broă sră pơ àr gơnoar atbồ tàm ală sàh nàng broă lơh bơh gơnoar atbồ ƀòn lơgar 2 kâp dê ngan ngồn tơrmù lơyah, geh cồng nha: “Tềng đap mat pal kờp sền 124 sàh, sơnah ƀòn, tiah is ồn geh dùl sră cih mat mờng chài lơh broă bơh tơl nă cau dê nàng geh bơta tàm ntrờn. Lơh bè lơi lài ngan tàm dơlam ală sàh di mờng chài lơh broă. Dơ̆ 2 là tàm ală sàh lài do nàng tàm pơdar, ntrờn nàng sàh do dong kờl sàh ndai hơ̆ sồng lam lơh sac rơ wah”.

Di tŭ đal git loh bơta “tìs gơnoar broă, ờ di broă – tiah den jơngkah, tiah den ờ tơl” kwang bàng tàm kâp sàh, càr Lâm Đồng gam pơn jat tai kràñ cê lơh broă nàng mpồl lơh broă sră pơ àr gơnoar atbồ sàh, sơnah ƀòn ngai sơlơ geh lơh sir, kwang bàng lơh di broă, di mờng chài he dê mờ làng bol geh drơng niam rlau.