Jat ală jơnau lơh nền rơndap tap sèng, rơndap wơl thôn bơh Anih duh broă Làng bol sàh Sơn Tây Hạ, càr Quảng Ngãi dê, thôn Ka Năng rơp geh tơmut bal mờ thôn Ra Tân mờ thôn Bà He nàng tơng gơs thôn pa geh sơnđan Ka Năng. Tơnơ̆ tŭ tơrgùm dùl, thôn pa kờp dŭ geh 293 hìu bơnhă làng bol mờ 1 rbô 30 nă cau, gơ gơs là dùl tàm ală thôn geh khà kờp làng bol uă ngan bơh sàh dê.

Tŭ do, Ka Năng là thôn geh khà kờp làng bol êt ngan rlau jơh tàm 3 thôn kờp dŭ tơrgùm dùl. Do kung là tiah sar lơgar ngài, tiah mờ làng bol jơi bơtiàn dùl êt nă cau geh uă rlau mờ broă lòt rê kung gam uă kal ke. Làng bol thôn Ka Năng uă ngan là làng bol kòn cau Ca Dong mờ H’rê, priă lơh geh tờm ngan là bơh lơh sa suơn sre - brê bơnơm mờ ală bơta chi tam bè keo, prìt sơ kò, bùm lô Nhật Bản, tiêu mờ kơphe. Ală mpồl làng bol ơm kis ơm rah rài tàm ù tiah dòr bơnơm lơh broă tơrgùm làng bol tus bal pơrjum thôn mùl neh ờ ƀuơn, tŭ do rơp sơlơ kal ke rlau tŭ ù tiah geh rề ơnàng. Ồng Đinh Văn Loại, lam bồ thôn, Bí thư Chi bộ thôn Ka Năng pà git: "Sàh kung neh ai tơlik lài gùng dà ai Hìu niam chài thôn Ka Năng lơh anih nàng geh măi mok, ngan là măi tính kơ ƀàng, ƀuơn ai broă lam lơh sră pơ àr in. Mờr tus, lài ngan là pơrjum ală thôn, tiah làng bol ơm kis nàng rơcang tơmut bal thôn. Tàm gơnoar broă là Bí thư Chi bộ, să tờm añ pal lơh krơh lài, tơnơ̆ hơ̆ tus hìu bơnhă, lơh krơi lài tàm broă lơh jat ală jơnau lơh nền, gùng dà, broă lơh Đảng dê nàng làng bol in đòm jat”.

Sàh Sơn Tây Hạ geh tơng gơs bơh bơta tơrgùm dùl pe sàh là Sơn Tinh, Sơn Màu mờ Sơn Lập lài do. Jơh gùt sàh geh rlau 5 rbô 600 nă cau, tàm hơ̆ làng bol jơi bơtiàn dùl êt nă cau geh rlau 93% khà kờp làng bol. Ù tiah ơnàng rlau 136 kơi sồ vuông, uă ngan là dòr bơnơm, uă tiah sùm gơtìp wềl is tàm nhai mìu càl rbut dờng. Tàm bơta bè hơ̆, broă rơndap tap sèng thôn ờ mìng jat tàm jơnau sồr bè khà hìu bơnhă làng bol.

Jat ală jơnau lơh nền bơh sàh dê, bơh 12 thôn tŭ do rơp rơndap tap sèng wơl gam 8 thôn. Bulah bè hơ̆, ờ di jơh ală thô ndrờm geh tơmut tàm mpồl pal tơrgùm dùl. Ală thôn Mang Rễ, Xà Ruông, Nước Kỉa, Hà Lên mờ Tà Vinh geh sồr gàr bè ờs tài ù tiah kal ke, làng bol ơm kis rah rài mờ ơm ngài tiah tờm sàh dê. Ồng Cao Quốc Tiến, Bí thư Đảng ủy sàh Sơn Tây Hạ pà git: "Tŭ lam lơh tơrgùm dùl thôn, gơ wèt mờ ală thôn ơm ngài, gơl gùng rê tus tiah tờm sàh dê geh tiah gơguh tus rlau 25 kơi sồ gùng bơnơm. Tàm tŭ hơ̆, khà kwang bàng tàm thôn kung kal ke ngan sơl. Jat jơnau sồr bơh tŭ tơngai pa dê, kwang bàng pal wă wờng, git ngui măi mok yal jơnau tơnggit den tàng do ngan ngồn là bơta kal ke sàh in tàm broă sac rơ wah kwang bàng thôn tàm tơngai tus. Bulah bè hơ̆, tơl broă rơp geh lam lơh rơhời. Tŭ do, tam gơl sồ neh geh lam lơh tus tàm thôn mờ ală jơnum măi mok sồ mpồl bơtiàn. Mờr tus, sàh rơp pà măi tíñ ai jơh ală thôn in nàng lam lơh ală sră pơ àr gơnoar atbồ ờs mờng ngan rlau jơh”.

Ờ mìng tàm tiah kơh bơnơm, tàm tih drà, broă rơndap tap sèng kung geh kờp dŭ bơh bơta krơi is bè làng bol ơm kis mờ rài kis mpồl bơtiàn. Tàm sơnah ƀòn Đức Phổ, bơh 25 jơnum làng bol ơm kis tiah drà tŭ do rơp gơmù gam 15 jơnum làng bol ơm kis tiah drà tơnơ̆ tŭ rơndap tap sèng wơl. Sơnah ƀòn gam lam lơh ai jơnau đơs làng bol lài mờ tŭ lơh sir sră nggal yal kâp geh gơnoar in sền swì. Ồng Trần Ngọc Sang, Chủ tịch Anih duh broă Làng bol sơnah ƀòn Đức Phổ pà git, broă rơndap tap sèng geh kơlôi sơnơng nền nòn jat bơnàng jă nhàr ù tiah, niam chài mờ bơhiàn ờs mờng làng bol dê: "Tàm tŭ rơndap tap sèng ală jơnum làng bol ơm kis tiah drà, Mpồl Lơh kơnòl broă sùm kung bè đơng lam Anih duh broă Làng bol mờ ală anih lơh broă neh kờp dŭ nền nòn ngan ală bơta bè ù tiah kung bè bơhiàn bơh yau làng bol dê. Broă rơndap tap sèng ală jơnum làng bol ơm kis tiah drà geh lơh jat jơnau pal jat, hơ̆ là ală jơnum làng bol ơm kis tiah drà ờ tơl khà hìu bơnhă jat jơnau sồr rơp tơmut bal mờ jơnum làng bol ơm kis tiah drà rềp bal, geh nhàr ù tiah rềp bal, mờ bơhiàn bơh yau gơ mờr ndrờm bal”.

Jat broă rơndap lơh bal neh geh Anih duh broă Làng bol càr Quảng Ngãi kĭ ring bal, gùt càr rơp tơrmù 549 thôn, jơnum làng bol ơm kis tiah drà. Tơnơ̆ rơndap tap sèng, gùt càr gam 1 rbô 161 thôn, jơnum làng bol ơm kis tiah drà, gơmù rlau 32% khà bơh chờm. Bulah bè hơ̆, tơnơ̆ ală khà hơ̆ ờ mìng là broă tơrmù khà thôn, jơnum làng bol ơm kis tiah drà. Jơnau kờñ dờng rlau là bơt bơtàu mpồl atbồ dipal, lơh broă geh cồng nha mờ dipal mờ broă lơh gơnoar atbồ ƀòn lơgar 2 kâp.

Jat ồng Trần Đình Dũng - Phó Lam bồ Cơldŭ bơt bơtàu gơnoar atbồ, Sờh broă sơlam is càr Quảng Ngãi, tàm tŭ lam lơh, càr sền gròi uă ngan tus ală bơta niam chài, jơi bơtiàn mờ bơta is ồn ù tiah nàng kờñ lơh gơlik bơta ring bal tàm làng bol: "Broă jàu bal bơh Chính phủ dê sồr, gơ wèt mờ thôn là bơh 300 hìu bơnhă rlau hơđang, ai gơ wèt mờ jơnum làng bol ơm kis tiah drà bơh 350 hìu bơnhă rlau hơđang. Bơdìh hơ̆ tai, gơ wèt tàm bơta geh ngan, bơta krơi is bơh tơl tiah dê, Chính phủ jàu càr in pơlam mùl màl. Gơ wèt mờ tiah làng bol jơi bơtiàn dồ êt nă cau, tiah kơh bơnơm, tiah uă kal ke halà tiah geh bơta ù tiah gơ wềl, kal ke, tàm tŭ rơndap tap sèng kung gam pal sền gròi tus ală bơta jat yàng, jơi bơtiàn mờ niam chài nàng tơnơ̆ rơndap tap sèng, ală mpồl lơh broă ndrờm bal rlau, lơh gơlik bơta ƀuơn ai broă lơh atbồ, đơng lam lơh jat tàm kâp hơ đơm”.

Rơndap tap sèng thôn, jơnum làng bol ơm kis tiah drà ờ mìng là tơrmù khà halà tơrmù mpồl lơh broă sră pơ àr gơnoar atbồ. Do gam là broă kờp dŭ nền nòn nàng ờ mìng lơh jat jơnau sồr atbồ tàm tŭ tơngai pa, mờ gam sền gàr bơta tàm tơrbŏ bal mpồl bơtiàn, bơta niam chài mờ lơh gơlik bơta ƀuơn ai làng bol in tàm rài kis pah ngai. Mìng tŭ ring bal ală bơta hơ̆, broă rơndap tap sèng den hơ̆ sồng ngan ngồn lơh geh cồng nha mờ lơh gơlik bơnàng jă ai gơnoar atbồ kâp hơ đơm in lơh broă geh cồng nha rlau tàm tơngai tus.