Mpồl cau ala mat Quôk hội càr Gia Lai bơyai lơh Pơrjum tìp mat cau tĕ khà tơnơ̆ dơ̆ pơrjum dơ̆ Dùl, Quôk hộ khoă XVI jat broă lơh tìp mat tơn pơgồp bal mờ pờ tơlik tàm internet tơrbŏ tơn tus ală sàh, sơnah ƀòn. Tàm pơrjum, cau tĕ khà 2 mpồl tĕ khà neh đơs uă broă gơ rềng tus bơcri priă lơh phan bơna gùng lòt, bơta dong kờl ai làng bol in, gàr niam ờdo ờdă rài kis mpồl bơtiàn, bơsong sră pơ àr gơnoar atbồ, rơndap ai cau lơh broă ờ drơng mìng dùl kơnòl, bơta dong kờl gơ wèt mờ kwang bàng gah Đảng ntrờn ai rê hờ ƀòn lơgar, bơta dong kờl ai cau chài mờ ală mpồl niam chài bơh yau in. Uă cau tĕ khà ai tơnggŏ bơta sền gròi tus pràn jak đơng lam bơh gơnoar atbồ ƀòn lơgar dê tŭ kâp sàh mờr geh jàu tai uă gơnăp gơnoar. Cau tĕ khà đơs là, broă bơsong sră pơ àr gơnoar atbồ tàm 2, 3 tiah gam lơyài, ờ hềt geh bơta rơcang lài; bè hơ̆ den tàng kâp sàh kờñ pal tam gơl pa bồ tơngoh atbồ, tơnguh kơnòl drơng broă làng bol, pleh lời làng bol pal lòt rê uă dơ̆ bè tŭ do.

Đơs tàm pơrjum, Phó Củ tịc Quôk hội ồng Nguyễn Hồng Diên cih dờp ală jơnau đơs jơh nùs, di mờ bơta geh ngan bơh cau tĕ khà dê mờ pà git, Mpồl cau ala mat Quôk hội càr Gia Lai rơp pơgồp bal wil tơl nàng pơyua tus ală anih lơh broă geh gơnoar in sền swì mờ bơsong: “Bơh tơrgùm jơnau đơs, bol hi sac rơ wah ală broă gơ gơs 2 mpồl tờm: lơh sa – bơcri priă mờ mpồl lơh broă sră pơ àr gơnoar atbồ - gùng dà broă lơh dong kờl. Nggùl ală jơnau đơs, jơnau dan do gơ wèt gơnoar bơsong bơh kâp càr mờ kâp sàh dê; kơp kờñ ngan ală oh mi đơng lam sàh, sơnah ƀòn kờñ pal tơrgùm uă ngan rlau jơh nàng bơsong, tài mùl màl tŭ do, gơnoar bơh kâp sàh, sơnah ƀòn dê là dờng ngan. Is ồn, Cíñ phủ gam cribơyai bè broă pơn jat tai tơrmù uă ngan rlau jơh ală bơta sră pơ àr gơnoar atbồ gơ wèt kâp dà lơgar nàng jàu ai kâp hơ đơm in. Den tàng kơnòl mờ gơnoar broă bơh kâp sàh dê tàm tơngai tus rơp geh tơnguh uă ngan. Sàh, sơnah ƀòn là tiah tìp mat mờ lơh broă tơn mờ làng bol, den tàng pal lơh ngan, pal rơcang lài nàng bơsong jơh ală broă ngan ngồn gơ rềng tus rài kis làng bol dê”.

Tàm sàh Phúc Thọ Lâm Hà, càr Lâm Đồng, Phó Kong kơnòl Anuh duh broă niam chài mờ mpồl bơtiàn bơh Quôk hội dê, gơ wèt Mpồl cau ala mat Quôk hội càr Lâm Đồng neh tìp mat cau tĕ khà tơnơ̆ Dơ̆ pơrjum dơ̆ Dùl, Quôk hội khoă XVI. Tàm nùs nhơm làng bol lơh tờm, song dơpă, cau tĕ khà ai tơnggŏ bơta ring bal dồ nùs mờ cồng nha dơ̆ pơrjum, mờ kung đơs uă kal ke, bơta gơ kòl tàm ƀòn lơgar.

Uă jơnau đơs, jơnau dan bè bơta bàr pe rơndap broă lơh gam lơyài lam lơh tàm tŭ broă lơh ai wơl ù den geh lơh jal mhar, lơh gơbàn bơta ờ suk, kơlôi rơcang tàm làng bol. Cau tĕ khà kung đơs, broă bơsong sră pơ àr gơnoar atbồ gam ờ niam, lơh làng bol pal lòt rê uă dơ̆; mờ kung dan sền gròi bơcri priă lơh, lơh niam wơl gùng lòt ƀòn lơgar, lơh gơlik bơta ƀuơn ƀuài ai lòt rê, jun pơndiang phan bơna mờ geh dờp ală broă drơng ala lơh sơnơm, bơto bơsram tàm tiah sar lơgar ngài.

Đơs tàm pơrjum, ồng Lâm Văn Đoan đơs niam nùs nhơm geh kơnòl, ală jơnau đơs jơh nùs bơh cau tĕ khà dê; đơs nền, Mpồl cau ala mat Quôk hội càr rơp pơn jat tai cih dờp wil tơl nàng pơyua tus Quôk hội, Cíñ phủ mờ ală ƀộ, gah broă lơh dà lơgar in. Mờ kung sồr ală sờh, gah broă lơh, ală tiah sơlơ tàm pơgồp bal, tơrgùm bơsong jơh ală broă gơ wèt gơnăp gơnoar, pleh jŏ jòng lơh gơ rềng tus gơnoar kuơ dipal làng bol dê.

Tàm càr Dăk Lăk, ồng Ngô Trung Thành – Phó Kong kơnòl Anih duh broă adat boh lam mờ sền gàr adat boh lam bơh Quôk hội dê bal mờ Mpồl cau ala mat Quôk hội càr Dăk Lăk neh tìp mat cau tĕ khà ală sàh Krông Bông, Cư Pui mờ Hòa Sơn. Cau tĕ khà dan dà lơgar sền gròi bơcri priă lơh gùng lòt tàm ƀlàng sre, bơ tơt rbòng dà, anih ƀồm dà, rbòng dà tàm ală sàh sùm gơtìp dà tih dà lìu; lơh niam ală gơl gùng lòt tàm ală sàh, ală thôn neh gơbàn ờ diơng; lơh mhar tơngai hơ pơrgon ală broă lơh gùng lòt, rbàng gam geh lơh jŏ jòng. Bơdìh hơ̆ tai, cau tĕ khà kơp kờñ geh gùng dà broă lơh ai lài rơ wah pơgru ai tiah sar lơgar ngài in, gờñ ai lơh jat jơnau sồr bè gơnoar broă, bơta dong kờl ai kwang bàng thôn, ƀòn in; mhar tam pà priă bơcri dà lơgar mờ priă bơcri ală broă lơh jơnau kờñ dà lơgar nàng kờñ lam lơh geh cồng nha jơnau kờñ gơguh lơh sa 2 nơm khà; pơn jat tai sền gròi tus broă lơh glòm tơlir ù gời, sền gàr brê mờ lơh niam sồ siă tiah ƀòn lơgar.