Do là Pơrjum Cau ala măt Quôk hội mìng lơh dùl kơnòl broă dơ̆ 07 bơh Quôk hội khoă XV dê, tàm bơta jơh ală anih lơh broă cíñ trị gam jal mhar lam lơh ală kơnòl broă pơn jăt tai rơndăp tăp sèng mpồl kwang bàng mpồl lơh broă. Bè broă do, Củ tịc Quôk hội ồng Trần Thanh Mẫn pà gĭt, tơngai dơ̆ 1, ală ƀộ gah, anih lơh broă neh rơndăp tăp sèng tơrmù dipal mpồl lơh broă, tơngai dơ̆ 2 lơh tam gơl wơl Sơnoa boh lam, lơh wơl bàr pe adăt mờ rơndăp tăp sèng 50% ală mpồl lơh broă sră pơ àr gơnoar ătbồ càr dê. Dơ̆ pơrjum dơ̆ 09 digơlan pơrjum tàm mờr 2 nhai, tàm tơngai do rơ̆p ai jơnau đơs làng bol bè tam gơl wơl Sơnoa boh lam. Is ồn, bơh lồi nhai 04 tus bồ nhai 05, Anih duh broă Lơh kơnòl broă sùm Quôk hội kung rơ̆p pơrjum dar nàng rơndăp tăp sèng mpồl lơh broă sră pơ àr gơnoar ătbồ kâp sàh. Củ tịc Quôk hội ồng Trần Thanh Mẫn đơs sùm: “Ală cồng nha niam ngan, tam gơl pràn tàm broă lơh adăt boh lam tàm dơ̆ pơrjum dơ̆ 07 mờ dơ̆ 08 mờ dơ̆ pơrjum ờ bè ờs dơ̆ 09 pa do neh đơs nền bơta di ngan bơh jơnau sồr tam gơl pa bồ tơnggoh kơlôi sơnơng tàm broă lơh bơ̆t bơtàu kơrnoăt boh lam kung bè bơta kwơ rềp mềl mờ rài kis geh ngan, kwơmàng bơh ală Pơrjum mờng lơh dùl kơnòl broă dê tàm broă gàr niam bơta niam ală rơndăp broă lơha dăt tŭ yal mờ Quôk hội in. Añ sồr, pal pơn jăt tai bơsram kơlôi sơnơng jrô mờ lơh jăt geh cồng nha jơnau sồr tam gơl pa bồ tơngoh kơlôi sơnơng lơh kơrnoăt boh lam, nàng sơrbăc mhar ai jơnau sồr Đảng dê gơ lòt mŭt ngan ngồn tàm rài kis. Ală dăt kờñ pal lơyah, tơrgùm wơl, gơtùi lơh jăt, geh cồng nha, lơh pràn tam pà kâp, tam pà gơnoar. Bè ală broă lơh lơh adăt, anih lơh broă yal kong kơnòl tus lồi dŭt gơ wèt mờ rơndăp broă lơh adăt tus dì tŭ geh Quôk hội pờ tê ring bal”.

Tàm pơrjum, ală Cau ala măt Quôk hội mìng lơh dùl kơnòl broă neh cribơyai bè rơndăp broă lơh Adăt Lơh sa mờ măy mŏk măy mŏk sồ. Cau ala măt mò Nguyễn Thị Thu Nguyệt, Mpồl Cau ala măt Quôk hội càr Dăk Lăk sền bal ring bal mờ jơnau rơcăng cih adăt, geh ală tơngume pa ngan tơnggŏ tàm ală jơnau cih bơh adăt boh lam dê, bè jơtài sồ, lơh gơlik phan bơna măy mŏk sồ, drơng broă măy mŏk sồ…Tă pơgồp jơnau đơs loh làng tàm jơnau rơcăng cih adăt, Cau ala măt mò Nguyễn Thị Thu Nguyệt đơs là, jăt tơngume Bơta 10 neh cih dùl jơnau sồr gàr niam lơngăp lơngai ai lơh broă lơh sa mờ măy mŏk măy mŏk sồ in, mơya bơnah cih bè lơngăp lơngai internet mờ sền gàr jơnau yal tơnggĭt gam bal bal ir, ờ geh bơta loh làng bè đah jơnau sồr bơta chài mờ ală broă lơh ătbồ: “Tàm tam gơl sồ ngai sơlơ bơtàu tơngguh den jơnau yal tơnggĭt să is mờ jơnau yal tơnggĭt mpồl lơh sa kă bro gơgơs dùl jơtài kwơmàng ngan, mơkung là jơnau kờñ lơh aniai bơh ală jơnau pơhìn bơh đah bơdìh dê. Broă ờ tơl ală jơnau sồr bơta chài loh làng, ală broă lơh gròi sền kràñ rơ̆p gơlam tus ală rềs àr, roh rui, gơtìp cau gĭt halà gơtìp lơh aniai jơnau yal tơnggĭt, den tàng bè hơ̆, añ sồr Mpồl rơcăng cih den tàng ală jơnau cih ală jơnau sồr loh làng bè lơngăp lơngai internet mờ ală jơnau cih do jăt tàm ală jơnau sồr ală lơgar dê kung bè ală jơnau sồr bơh Ƀộ Kwang àng mờ Ƀộ Jak chài mờ Măy mŏk neh ai lơh jăt lài do”.

Ai Cau ala măt ồng Phạm Trọng Nghĩa, Mpồl Cau ala măt Quôk hội càr Lạng Sơn, sồr: “Sền swì bơtơl broă dong kờl bơtàu tơngguh lơh sa mờ măy mŏk măy mŏk sồ nàng kờñ gàr niam gơnoar tờm ù tiah dà lơgar tàm anih internet, gàr niam lơngăp lơngai internet, lơngăp lơngai jơnau yal tơnggĭt, lơngăp lơngai yal tơnggĭt jơnau bơh mpồl cau mờ să is dê. Do là 1 tàm 5 nùs nhơm sồr lơh tàm Jơnau lơh nền tàm pơrjum sồ 57. Dơ̆ bàr là sồr sền swì, bơtơl broă dong kờl nàng kờñ tơrmù bơta ờ ndrờm bal sồ nàng tơl nă làng bol in, ngan là mpồl cau lơh bơn ờ pràn bè làng bol jơi bơtiàn dồ êt nă cau tàm tiah sar lơgar ndai, tiah gam kal ke geh dờp ngui bơh bơta bơtàu tơngguh bơh lơh sa mờ măy mŏk măy mŏk sồ dê tàm lơgar he".

Iăt kơno mờ yal lơh loh ală broă mờ ală Cau ala măt Quôk hội dê đơs, Ƀộ trưởng Ƀộ Jak chài mờ Măy mŏk ồng Nguyễn Mạnh Hùng đơs nền, Đảng mờ Dà lơgar neh gĭt nền lơh sa mờ măy mŏk măy mŏk sồ là lơh sa mờ măy mŏk tờm ngan, geh bơta jŏ jòng mờ is ồn dipal mờ jơnau tơl pràn Việt Nam dê, geh gơtha lơh nền nàng bơtàu tơngguh lơh sa sồ mờ mpồl bơtiàn sồ đơs bal tàm rài pa.

Đơs tàm dar pơndŭt pơrjum, Phó Củ tịc Quôk hội ồng Trần Quang Phương cih dờp, đơs niam ngan bơta tus bal wil tơl, kơnòl uă bơh ală Cau ala măt Quôk hội mìng lơh dùl kơnòl broă, ală anih lơh broă geh gơrềng dê. Ală cau ala măt Quôk hội mìng lơh dùl kơnòl broă neh geh bơta rơcăng tơngume wil tơl, ală jơnau đơs geh bơta bơ̆t bơtàu tơl, tơrgùm bal, mblàng sền jrô ngan.