Jăt ală cau ala măt đơs, dà jơh tơhìr geh sơdàng là dùl tàm ală jơnau lơh gơbàn kòp kơn jơ̆ kĭ lơmă ir, do là ală phan bơna kal ke ngan gĭt bơnah sơdàng geh tàm dà. Cau ala măt mò Nguyễn Kim Thúy, gơ wèt Mpồl Cau ala măt ƀòn dờng Đà Nẵng mblàng đơs bè do: Broă ngui ir phan hùc geh sơdàng lơh gơlik jơnau pơhìn khà dùl lơh gơbàn kòp ờ lơh bơtờp, bè: gùng mhàm plai nùs, đồm sơdàng…tài gơguh bơnah sơdàng tơmŭt tàm să uă rlau uă dơ̆ kờñ pal geh. Den tàng bè hơ̆, Mpồl Lơh sơnơm Dunia mờ ală mpồl lơh broă sền gàr pràn kơldang să jan, tă pơgồp jơnau đơs mờ Cíñ phủ ală lơgar jăt ngui broă lơh tă dia tàm phan hùc geh sơdàng, nàng pơlam gùng broă lơh ngui sa in.

Ală cau ala măt dồ nùs bal bè broă tơngguh tai dia pal tơm gơ wèt mờ bơta phan ơlak, ƀièr nàng tơrmù ƀà bơta ngui uă ir ơlak ƀièr. Bulah bè hơ̆, nàng tơrmù ƀà làng bol ñô ơlak, ƀièr ờ mìng mờ broă ngui phan ngui dia lơm mờ kờñ pal tơngguh tai broă lơh glài mờ priă, pơgồp bal mblàng yal, lơh glài mờ priă. Ală cau ala măt dồ nùs bal tơngguh dia jăt tŭ tơngai gơ wèt mờ ơlak, mơya gơ wèt mờ ƀièr pal kơlôi nền tŭ tơngai. Cau ala măt Mpồl cau ala măt ƀòn dờng Hà Nội dê, ồng Hoàng Văn Cường, sồr: Bol he pal sền wơl gùng dà broă lơh tơngguh bè dia gơ wèt mờ ƀièr. Jăt añ den bol he pal tơngguh, mơya khà tơngguh uă ngan rlau jơh là ơlak pràn, tơnơ̆ hơ̆ êt rlau là ơlak hơđơm 20 độ mờ êt rlau tai là khà mờ ƀièr. Bè hơ̆ den hơ̆ sồng dipal.

Bè bơtơl khà dia jơnhoa ngan rlau jơh gơ wèt mờ bơta phan jràu, jăt ală cau ala măt đơs, kờñ ngan pal tơngguh dia jràu. Tài bơh chu jràu lơh gơlik 28 mpồl kòp. Kờp dŭ, Việt Nam geh rlau 84 rbô 500 nă cau chơ̆t tài bơh chu jràu tơn mờ 18 rbô 800 nă cau chơ̆t tài gơrềng bơh cau chu jràu. Bulah bè hơ̆, sồr kờp sền wơl dồ bă nền nòn, ngan là gơrềng gơ wèt mờ tiah kă bro mờ mpồl lơh sa kă bro, ai tơl bơta ai jràu blơi kơñau bơh lơgar ndai in. Ồng Trịnh Xuân An, gơ wèt Mpồl Cau ala măt càr Đồng Nai, sồr: Añ sền gròi hơ̆ là gơrềng gơ wèt mờ làng bol mờ ală mpồl lơh sa kă bro lơh jràu. Tŭ do, ală mpồl lơh sa kă bro tă pơgồp kes priă rơndăp ơm dơ̆ pram, dơ̆ prao, mơya dilah bè do den rơ̆p ai tơl bơta ai bơta lin bơta kwơ uă ir, den lơh rơhơn dơh ai kă bro kơñau in, gơrềng tus jơh bal broă sền gàr dà lơgar, lơngăp lơngai. Do là bơta pal kơlôi sơnơng ngan, kơlôi sơnơng wơl tŭ tơngai gơ in dipal, nàng bol he rề geh dia mơkung sền gàr geh ai mpồl lơh sa kă bro in geh tiah lơh broă, mơkung ờ lơh gơrềng tus làng bol lơh tàm gah broă lơh sa sươn sre mờ is ồn là pleh lơh rơhơn dơh ai kă bro kơñau in.

Tàm pơndang tàm Hìu pơrjum, ồng Trương Trọng Nghĩa, gơ wèt Mpồl Cau ala măt ƀòn dờng Hồ Chí Minh, mblàng đơs: Ñchi gơlơh ờ gĭt nền là tus nam 2045, 100 nam tơnggơs lơgar den Việt Nam rơ̆p gơgơs dồ dà lơgar ờ chu jràu. Ală dà lơgar ndai kung gam wèt tus là dà lơgar ờ chu jràu. Añ ring bal là pal kơlôi sơnơng nền tŭ tơngai, mơya añ đơs là pal kràñ cê jơh nùs tàm jơnau do mờ ờ gơtùi đơs là tài bơh ngòt kă bro kơñau mờ bol he lơh ƀa ră ƀa rài tàm jơnau do.

Mblàng lơh loh tàm dơ̆ pơrjum, Phó Thủ tướng ồng Hồ Đức Phơk lơh loh jơnau bơh tài cih khà dia jơnhoa ngan rlau jơh gơ wèt mờ bơta phan jràu, bè do: Jràu gơ aniai uă ngan, mờ bol he pal dơ̆ pơgăp 1 tơmàn dolar Mỹ ai broă sơm kòp gơrềng tus gơ aniai bơh jràu dê. Jràu tàm Việt Nam geh giă lơyah ngan mìng bơh 6 rbô đong tus 20 rbô đong lơp, pơgăp 7 rbô đong priă dia ai dồ kơldung jràu in, tàm tŭ hơ̆ tàm lơgar Singapore den pal kờp 200 rbô priă dia tềng kơldung jràu. Tài bè hơ̆, den tàng tă dia jràu bal mờ jơnau là bè hơ̆.

Ƀộ trưởng Ƀộ Lơh sơnơm mò Đào Hồng Lan dồ nùs bal lơm mờ jơnau kờñ, jơnau đơs mờ bơta kờñ ngan ai lơh jăt jơnau rơcăng cih Adăt Dia ngui sa is ồn (tam gơl), is ồn là pơlam gùng tơngguh dia gơ wèt mờ ală phan kă bro geh aniai ai pràn kơldang să jan in, bè jràu, ơlak ƀièr, mờ bơtơl phan hùc geh sơdàng tàm sră cih măt pal tă dia. Ƀộ trưởng Ƀộ Lơh sơnơm pà gŏ ală khà kờp tơnggŏ bơta kờñ ngan pal tơngguh dia jràu. Tài ngui jràu lơh gơlik tus 28 mpồl kòp. Kờp dŭ, Việt Nam geh rlau 100 rbô nă cau chơ̆t tài bơh chu jràu.