Tàm ală dơ̆ tìp mat bơh cau ala mat Quôk hội tàm càr Lâm Đồng dê, cau tĕ khà sồr, kờñ pal tam pà kâp, tam pà gơnoar loh làng đah càr mờ sàh tŭ lam lơh gơnoar atbồ 2 kâp, kuơmàng là gàr gơnoar lơh sră ngui ù ai làng bol in. Sồr tơn jơh bơta tơnhàu phan kuơ tàm ù ngui măi mok neh yau lơh gơbàn ƀơ̆ ƀơl tiah ơm kis; kờp sền ai wơl ù tam sền gàr brê ờ hềt ngui, jàu wơl ƀòn lơgar in mờ ai lài bơcri priă lơh niam phan bơna gùng lòt. Ồng Liêng Jrong Ha Bri ơm tàm thôn 1, sàh Lạc Dương, càr Lâm Đồng đơs: “Uă làng bol tàm do kung kờñ geh sră ngui ù mơya tŭ do sàh bol hi dê kung gam ờ hềt lơh sơl, dan Quôk hội sền sơ wì mờ bơsong, tài do là jơnau kờñ làng bol dê. Dùl bơta tai là kờñ pal sền wơl phan ờ ngan, tŭ do añ gŏ jơh ală là phan ờ ngan lơm, phơng sih kung ờ ngan, kơphe kung ờ ngan sơl. Dan dà lơgar jat sền nền nòn bơta do làng bol in”.

Tàm ală dơ̆ tìp mat cau tĕ khà, ala mat gơnoar atbồ ƀòn lơgar, ală sờh, gah broă lơh geh gơ rềng bơh càr Lâm Đồng dê neh yal, mblàng lơh loh, cih dờp ală tơngume gơ wèt gơnăp gơnoar. Bal mờ hơ̆, Mpồl cau ala mat Quôk hội kung tơrgùm jơh ală jơnau đơs, jơnau dan bơh cau tĕ khà dê sồr gơnoar atbồ ƀòn lơgar sền gròi bơsong mờ cih dờp bàr, pe tơngume yal Quôk hội in sền sơ wì.

Pơrjum tìp mat cau tĕ khà ală sàh, sơnah ƀòn tiah đah mat tơngai lik bơh càr Dăk Lăk dê, hơ̆ là càr Phú Yên yau geh Mpồl cau ala mat Quôk hội càr Dăk Lăk lam lơh mờ broă lơh tìp mat tơn tàm anih pờ tơlik tờm là sơnah ƀòn Tuy Hòa mờ tàm tơrbŏ pờ tơn tàm internet tus ală anih pờ tơlik gơ wèt ală sàh, sơnah ƀòn: Đông Hòa, Sông Cầu, Tuy An Bắc, Phú Hòa 1, Tây Hòa, Sơn Hòa, Sông Hinh mờ Đông Xuân. Ală cau tĕ khà cih dờp nùs nhơm geh kơnòl bơh Quôk hội dê, mờ kung ai tơnggŏ bơta kơp kờñ càr Dăk Lăk gờñ geh gùng dà ai tơlik lài bơtàu tơnguh pa tơnơ̆ tơmut bal. Cau tĕ khà ồng Võ Ngọc Hiền Minh ơm tàm sơnah ƀòn Tuy Hòa, càr Dăk Lăk pà git: “Càr Dăk Lăk yau cèng bơta niam chài ù tiah kơh bơnơm Tây Nguyên dờng ơning ơnàng, tàm tŭ Phú Yên là tiah kềng gah dà lềng tàm gùl lơgar is ồn. Broă tơrgùm dùl, tàm bơrlŭ bal niam chài đah dà lềng mờ brê bơnơm rơp lơh gơlik tŭ niam bơtàu tơnguh dờng ngan ai càr Dăk Lăk pa in. Kơp kờñ gơnoar atbồ ală kâp sền gròi, sồr lơh di tŭ nàng bơt bơtàu càr ngai sơlơ pas sơm, niam bơnĕ, rài kis làng bol dê ngai sơlơ niam rlau”.

Tàm tŭ hơ̆, cau tĕ khà tàm ală sàh tiah đah mat tơngai mut càr Dăk Lăk ai tơnggŏ bơta kờñ broă lơh gơnoar atbồ 2 kâp geh lơh broă bơh bồ nhai 7 tus tŭ do. Cau tĕ khà sồr kờñ pal sơlơ tơnguh tai priă jền, bơyai lơh bơto pơlam tơnguh pràn jak ai mpồl kwang bàng sàh, sơnah ƀòn in; bơcri priă lơh phan bơna, blơi măi mok drơng broă lơh đơng lam, atbồ in nàng kờñ lơh geh cồng nha mờ pleh kơn jơ̆ ir broă ai kâp sàh in, ngan là broă lơh atbồ ù tiah tơnơ̆ tŭ lam lơh broă lơh gơnoar atbồ ƀòn lơgar 2 kâp.

Đơs tàm dơ̆ tìp mat, mò Nguyễn Thị Thu Nguyệt, Phó cau lam bồ Mpồl cau ala mat Quôk hội càr Dăk Lăk sồr ală kâp gơnoar atbồ bơh càr tus sàh, sơnah ƀòn pơn jat tai lơh jat nền nòn ală jơnau lơh nền tàm pơrjum bơh dà lơgar dê, ngan là jơnau lơh nền tàm pơrjum bè rơndap tap sèng mpồl lơh broă sră pơ àr gơnoar atbồ, bơh hơ̆ bơsong bơnĕ bơnài bơta kuơ bơh mpồl lơh sa kă bro mờ làng bol dê: “Sồr Anih duh broă làng bol càr Dăk Lăk pơn jat tai kờp sền, ai tơlik ală broă lơh ngan ngồn nàng lơh gơs jơnau kờñ gơguh lơh sa 8% jat jơnau sồr lơh bơh Cíñ phủ dê tus nam 2025, mờ kung lơh ngan lơh geh khà gơguh lơh sa 2 nơm sồ tàm tơngai pơn jat tai. Nàng lơh gơtùi bơta do, jơnau sồr geh ai tơlik là pal gàr kơ̆ mpồl lơh broă sră pơ àr gơnoar atbồ mờ pal tam pà kâp, tam pà gơnoar loh làng, kràñ cê, jàu kơnòl mùl màl ai ƀòn lơgar in, gàr ală jơnau kờñ bơtàu tơnguh kơ̆ kơljap mờ di gơnăp gơnoar”.

Tàm nùs nhơm ring bal jơnau đơs, song dơpă mờ bơt bơtàu, Pơrjum tìp mat cau tĕ khà bơh ală mpồl cau ala mat Quôk hội càr Dăk Lăk mờ càr Lâm Đồng dê neh cèng wơl tềl tơnggŏ niam ngan. Ală cau ala mat Quôk hội, cau ala mat ƀòn lơgar mờ ală sờh, gah broă lơh neh cih dờp, mblàng lơh loh uă tơngume tờm, đơs nền rơp pơn jat tai iat mờ lòt bal mờ cau tĕ khà tàm tŭ tơngai bơt bơtàu càr bơtàu tơnguh mhar mờ kơ̆ kơljap.