Tàm tiah kơh bơnơm đah mat tơngai mut càr Gia Lai, tiah geh gal làng bol jơi bơtiàn dồ êt nă cau ơm kis, ală broă bơtàu tơnguh lơh sa, tơnguh niam rài kis mờ bơcri priă lơh phan bơna kuơmàng geh cau tĕ khà sền gròi uă ngan. Tàm ală dơ̆ tìp mat cau tĕ khà mờ cau tơlik mat tĕ khà cau ala mat Quôk hội, uă jơnau đơs sồr pơn jat tai ai lài bơcri priă tus tiah sar lơgar ngài nàng kờñ tơrmù lơyah bơta yah ngài bè bơtàu tơnguh. Bi Plai ơm tàm ƀòn Tơ Bla, sàh Kon Chiêng đơs là, bal mờ bơcri priă lơh phan bơna, kờñ pal geh gùng dà broă lơh dong kờl lơh sa, lơh gơlik broă lơh kơnhap jŏ nàng làng bol in tơnguh niam rài kis: “Tơnơ̆ tŭ iat tơngume lơh broă bơh ală cau tơlik mat tĕ khà dê den añ gŏ ală broă neh di mờ bơta geh ngan, rềp mềr mờ làng bol bè ồs đèng, gùng lòt, hìu bơsram, hìu sơnơm. Dilah geh pồ den kơp kờñ ală cau ala mat sền gròi uă rlau tai tus sàh Kon Chiêng mờ ală sàh tiah sar lơgar ngài”.

Cau tĕ khà tiah ngài càr Gia Lai kung kơp kơnờm ală cau ala mat tơnơ̆ tŭ geh pồ rơp pơn jat tai sền gròi tă bơsong ală bơta kal ke tàm bơtàu tơnguh lơh sa - mpồl bơtiàn, ngan là dong kờl làng bol tam gơl broă lơh sa, tơnguh cồng nha lơh sa mờ ai geh broă lơh ơruh pơnu tiah làng bol jơi bơtiàn dồ êt nă cau in. Cau tĕ khà Hlây ơm tàm ƀòn Đak Yă, sàh Mang Yang dan: “Ală cau tơlik mat tĕ khà cau ala mat Quôk hội dilah geh pồ den kơp kờñ pơn jat tai sền gròi bơt bơtàu uă broă lơh bơtàu tơnguh lơh sa, hơ̆ sồng bơt bơtàu ală mpồl lơh bal lơh gơlik phan, lơh gơlik bơta niam nàng làng bol in bơtàu tơnguh lơh sa mờ broă bơto pơlam tàm jàu jak chài măi mok nàng tơnguh cồng nha lơh geh, bơtàu tơnguh lơh sa”.

Tàm tiah đah mat tơngai lik càr Gia Lai, cau tĕ khà sền gròi uă ngan tus broă yuh tơlik dà tih dà lìu mờ bơta gơn kơnờm bơtàu tơnguh càr dê tàm tơngai lơh broă tus. Tàm sàh Tuy Phước, cau tĕ khà ồng Man Đức Thuận pà git, tiah do geh sền là tiah tờm dà tih dà lìu bơh càr Gia Lai dê. Tơnơ̆ dơ̆ dà tih dà lìu dờng ngan ờ hềt geh bơh lài tàm lồi nam lài, rài kis làng bol dê neh rơhời kơnhăp wơl, mơya jơnau pơhìn gơtìp ngơr bam jrô pah tŭ nhai mìu tus kung gam mpờl gŏ sùm. Cau tĕ khà ồng Man Đức Thuận geh jơnau đơs: “Sàh Tuy Phước ơm lồi dà dờng Kôn mờ dà dờng Hà Thanh, pah nam gơtìp ngơr bam jrô ngan. Tơngai lơh broă pa, añ kơp kờñ cau ala mat lơi geh pồ den dan mờ Quôk hội ai priă nàng lơh gùng kềng yuh tơlik dà, pleh hoàc huơr tài mìu dà tih dà lìu lơh gơbàn làng bol in”.

Kung nàng kờñ bơtàu tơnguh lơh sa tiah kềng gah dà lềng sơl, cau tĕ khà Nguyễn Thanh Phương ơm tàm ƀòn 5, sơnah ƀòn Quy Nhơn Bắc đơs là, càr kờñ pal geh bơta gơn kơnờm gơguh lơh sa là ală gah lơh sa pa mờ bơtàu tơnguh lơh sa dà lềng jat gùng dà mờng chài, kơnhăp jŏ: “Añ sơnơng là ờ mìng bơtàu tơnguh bè tiah tờm bồ tơngoh jak kòn bơnus lơh gơs, mờ tàm do kờñ pal bơtàu tơnguh bè lơh mờ măi mok ƀán zẫn, chip nàng lơh bè lơi bơtàu tơnguh pràn rlau. Dơ̆ 2 là bơtàu tơnguh lơh sa dà lềng là dùl tàm ală bơta pràn bơh càr Gia Lai dê den kung kờñ pal bơtàu tơnguh dùl bă tơl làm, ờ mìng là kup, tras, tiah ròng mờ gam bơtàu tơnguh tàm ală gah broă gơ rềng tus dà lềng tai”.

Tàm dơ̆ tĕ khà do, càr Gia Lai geh 28 nă cau tơlik mat tĕ khà nàng pồ 16 nă cau ala mat Quôk hội khoă XVI. Bơh ală dơ̆ tìp mat cau tĕ khà lài mờ ngai tĕ khà, uă làng bol ai tơnggŏ bơta pin dờn tàm tơngume lơh broă bơh ală cau tơlik mat tĕ khà dê. Ồng Siu Trung - Phó Củ tịc Anih duh broă mặt trận dà lơgar Việt Nam càr Gia Lai pà git, cau tĕ khà ơn uă bơta kơp kơnờm, kơp kờñ ală cau ala mat Quôk hội khoă XVI tơnơ̆ tŭ pồ rơp pơgồp bơnah chồl tơnguh bơtàu tơnguh lơh sa - mpồl bơtiàn mờ tơnguh niam rài kis làng bol: “Tŭ tìp mat, uă ngan cau tĕ khà ring bal kung bè pin dờn tàm ală jơnau hơ pơrgon hơ̆ mờ kơp kờñ ală cau tơlik mat tĕ khà tơnơ̆ tŭ geh pồ lơh cau ala mat Quôk hội rơp lơh jat jơnau hơ pơrgon, rềp mềr, iat làng bol kung bè dan mờ Quôk hội, Cíñ phủ nàng bơsong ală broă mờ cau tĕ khà kơp kờñ”.

Ngai 15/3, bal mờ cau tĕ khà gùt lơgar, cau tĕ khà càr Gia Lai neh tus bal ngai chờ jơh gùt làng bol lòt tĕ khà, rơ wah ală cau ala mat geh tơl nùs nhơm niam, tơl pràn jak mờ tơl kơnòl, ala mat ai jơnau đơs, nùs nhơm mờ bơta kơp kờñ bơh làng bol dê tàm anih pơrjum Quôk hội. Do kung là dơ̆ nàng làng bol ai tơnggŏ gơnoar mờ kơnòl làng bol, pơgồp bơnah bơt bơtàu mpồl kwang bàng lơh broă sră pơ àr gơnoar atbồ làng bol pồ ngai sơlơ kơnhăp kơ̆, pràn kơldang, lơh jat jơnau sồr bơtàu tơnguh bơh dà lơgar mờ ƀòn lơgar dê tàm tŭ tơngai pa.