Tàm khà mờr 40 jơnau đơs bơh cau tĕ khà dê tàm dơ̆ tìp măt, uă ngan đơs tus broă tam pìt tam phà ù tiah đah làng bol mờ ală kông ty, mpồl lơh sa kă bro geh Dà lơgar jàu ù. Jăt cau tĕ khà đơs, broă tàm nđir bal, tam pìt tam phà ù do neh jŏ jòng gĭt nđờ jơ̆t nam mơya kung gam ờ hềt geh sền gròi bơsong jơh. Cau tĕ khà ồng Nguyễn Hữu Tân, ala măt rlau 60 hìu làng bol in tàm thôn Hiệp Hoà, xã Ninh Gia, đơs: Ngai 29/08/1988, Anih duh broă Làng bol càr jàu ing ai Anih tờm Sơntìl Broă lơh brê bơnơm Lang Hanh in là 200 lồ mơya tàm hơ̆ geh ù làng bol bol hi dê gam tam phan tam. Tàm jơnau lơh nền tàm bơta 3 đơs loh, mờ khà ù bơh làng bol dê gam tam phan tam den dan ală kâp, ală gah bơsong jăt jơnau cih bơh adăt boh lam dê, mơya bơh hơ̆ tus tŭ do ờ geh bơsong. Làng bol bol hi dan bơh xã tus kơnhoàl, bơh kơnhoàl tus dì càr, hơ̆ sồng bơh càr mù tus wơl tàm xã.

Gŏ geh ală broă gơrềng tus ătbồ, ngui mờ tam pìt tam phà ù tiah tàm xã Ninh Gia gơlik geh kal ke ngan mờ jŏ jòng, ồng Phan Đình Trạc, Kwang bàng Ƀộ Cíñ trị, Ƀí thư Đảng Dà lơgar, Kwang ătbồ Mpồl Nội cíñ Dà lơgar sồr kwang đơng lam bồ càr Lâm Đồng mhar kờp sền wơl dồ bă nền nòn, bơsong jơh tơl jơnau loh làng. Gơ wèt mờ ală broă gơ wèt gơnăp gơnoar, Mpồl Cau ala măt Quôk hội càr Lâm Đồng rơ̆p geh sră nggal sồr Ƀộ Ling klàng mŭt bơsong. Ồng Phan Đình Trạc, đơs: Broă gơrềng tus ù tiah, añ sồr Phó Củ tịc Anih duh broă Làng bol càr ồng Nguyễn Ngọc Phúc, Sở Phan kwơ geh is mờ Tiah ơm kis bal mờ ală oh mi geh măt tàm do sồr bơsong tơl jơnau loh làng. Làng bol đơs là lùp kơnhoàl den kơnhoàl đơs càr ờ hềt geh jơnau đơs, ai càr den đơs gơ wèt gơnăp gơnoar kơnhoàl dê, tàm tuh kơnòl sùm bè hơ̆ den làng bol ờ gŏ gĭt đơs mờ cau lơi. Is ồn bè ù gơrềng tus Anih broă lơh sa sươn sre brê bơnơm 78 den añ sồr Cơldŭ cih sră đơng lam bơh Mpồl Cau ala măt Quôk hội càr dê yal wơl di jơh ală broă tŭ do bơh anih broă lơh sa sươn sre brê bơnơm dê nàng pơyua Ƀộ Ling klàng in, khi rê ndo đơng lam, pơgồp bal mờ càr, mờ Anih kơlôi sơnơng bơsram Ling măt ù nàng bơsong jơh.

Lài hơ̆, tàm xã Trạm Hành, ƀòn dờng Dà Làc, ồng Phan Đình Trạc, Kwang bàng Ƀộ Cíñ trị, Ƀí thư Đảng Dà lơgar, Kwang ătbồ Mpồl Nội cíñ dà lơgar bal mờ Mpồl Cau ala măt Quôk hội càr Lâm Đồng neh tìp măt cau tĕ khà là ală cau lơh phan, cau lơh broă mờ kwang bàng, cau tàm mpồl ala măt cau lơh broă dê.

Tàm dơ̆ tìp măt, uă cau tĕ khà đơs là, mpồl mìng lơh dồ kơnòl broă sền gàr brê là mpồl cau tờm lơh ală kơnòl broă tơn tàm tiah gơlik geh broă, mơya tŭ do mpồl do ờ hềt geh sền gròi mờ ờ geh sền là gah broă kơn jơ̆ bòl glar, sơbơng roh bè cau ătbồ sền gàr brê. Cau tĕ khà dan pal sền swì, tam gơl wơl jơnau cih bè broă dong kờl do nàng sền gàr gơnoar kwơ ai mpồl mìng lơh dồ kơnòl broă sền gàr brê tàm tiah do in, là tiah geh khà bă ù geh brê geh tus rlau nggùl khà bă brê bơh jơh gùt càr dê.

Đơs tàm dơ̆ tìp măt, ồng Phan Đình Trạc, Kwang bàng Ƀộ Cíñ trị, Ƀí thư Đảng Dà lơgar, Kwang ătbồ Mpồl Nội cíñ Dà lơgar đơs là, ală jơnau đơs, jơnau dan bơh cau tĕ khà dê là dipal ngan. Mpồl Cau ala măt Quôk hội càr Lâm Đồng rơ̆p cih dờp, tơrgùm wơl mờ geh jơnau yal mờ ală anih lơh broă kâp Dà lơgar in. Ồng Phan Đình Trạc, đơs: Broă bè mpồl mìng lơh dồ kơnòl broă sền gàr brê ờ hềt geh rơndăp là gah broă khih jơlai, sơbơng roh bè ătbồ sền gàr brê mơya bơta lơh broă ờ gŏ bơta krơi pơndrờm mờ cau ătbồ sền gàr brê, broă do añ sồr Mpồl Cau ala măt Quôk hội càr Lâm Đồng cih dờp nàng yal mờ Cíñ phủ in. Bơdìh hơ̆ tai, ală broă bè lơh sơnơm, bơto bơtê, ala măt cau lơh broă, broă lơh…bol hi rơ̆p cih dờp loh làng nàng yal mờ ală kâp tàm Dà lơgar in.

Di tàm dơ̆ do, Mpồl Cau ala măt Quôk hội càr Lâm Đồng neh jàu 20 bơnah phan pà hìu bơnhă geh dờp bơta dong kờl mpồl bơtiàn, cau geh dà kơlhề mờ dà lơgar, cau geh rài kis kal ke tàm xã Trạm Hành, ƀòn dờng Dà Làc, 20 bơnah phan pà hìu bơnhă geh dờp bơta dong kờl mpồl bơtiàn dê, cau geh dà kơlhề mờ dà lơgar, cau geh rài kis kal ke tàm xã Ninh Gia, kơnhoàl Đức Trọng, càr Lâm Đồng in.