Bơdìh mờ bàr pe jơnau đơs, jơnau dan bè bơta gùng dờng 27 gơbàn ờ diơng, ngơr bam uă tŭ trồ mìu, ờ geh ƀàng tơngkah lài lơh gơbàn sơbơng roh tus kòn bơnus mờ rơndeh rơndồ lòt tàm gùng; ală gùng che đèng tàm ƀòn lơgar kơn jơ̆ ir, đèng ờ pràn, ờ tơl nàng drơng jơnau kờñ lơh sa mờ ngui tàm rài kis; sồ siă khat bè sang lơh ƀơ̆ tiah ơm kis; bơta tac tu ruồi brài ờ niam, ờ gơtùi ruồi brài lơh gơbàn hoàc huơr uă ngan bè priă jền. Cau tĕ khà sàh Bình Thạnh, kơnhoàl Đức Trọng sền gròi uă ngan tus bơta tơmut bal càr, tơmut bal sàh, tơrmù mpồl cau lơh broă sră pơ àr gơnoar atbồ, sang tĕ kâp lơh kòn gùng.

Cau tĕ khà ồng Đinh Công Hoán ơm tàm thôn Thanh Bình 3, sàh Bình Thạnh, kơnhoàl Đức Trọng, càr Lâm Đồng đơs là, jơnau lơh nền tơmut bal sàh, càr, tơrmù mpồl cau lơh broă sră pơ àr gơnoar atbồ geh làng bol ring bal, kơp gơn.

Bulah bè hơ̆, tàm tơngai rơndap tap sèng, rơndap mpồl cau lơh broă sră pơ àr gơnoar atbồ pal rơ wah ală kwang bàng ngan ngồn geh pràn jak mờ nùs nhơm niam: “Jơnau lơh nền tơmut bal nàng tơrmù lơyah mpồl cau lơh broă sră pơ àr gơnoar atbồ, tơrmù bơta gơ rơndap rơndồl, priă tă lơh den añ ring bal jơh. Mơya nàng mpồl cau lơh broă sră pơ àr gơnoar atbồ pa lơh broă geh cồng nha den broă lơh sền sơ wì pràn jak kwang bàng pal gơtùi lơh jat jơnau sồr mờ rơndap broă di bơta pràn nàng lơh gơtùi broă nàng bơta đơng lam geh lơh sùm. Dùl bơta tai là broă lơh bơto bơtê bè bồ tơngoh, mờng chài lơh broă, bơta niam nùs nhơm pal sền dờng màng nàng dipal mờ kơnòl broă jat jơnau sồr cíñ trị ai tơlik”.

Cau tĕ khà sàh Bình Thạnh, kơnhoàl Đức Trọng, càr Lâm Đồng kơp kờñ Quôk hội, dà lơgar mhar lơh sir tam gơl, lơh Sơnua boh lam, adat boh lam.,… nàng kờñ lơh jat jơnau sồr bơtàu tơnguh pa dà lơgar, di mờ bơta geh ngan bơh sàh dê. Cau tĕ khà ai tơnggŏ bơta ring bal mờ dà lơgar bè tơrmù cau lơh broă sră pơ àr gơnoar atbồ, lơh mpồl cau lơh broă sră pơ àr gơnoar atbồ 2 kâp, lơh jat broă tơmut bal càr, sang tĕ kâp kơnhoàl. Bulah bè hơ̆, làng bol cau tĕ khà kung kơlôi rơcang ngan bè broă kờp dŭ tơmut bal kâp sàh tàm tơngai tus bè lơi, kơlôi rơcang bè tơmut bal càr ơnàng ir, gơtìp kal ke tàm broă sền gàr lơngăp lơngai.

Ala mat Mpồl cau ala mat Quôk hội càr Lâm Đồng ồng Phan Đình Trạc đơs niam ală jơnau đơs tă pơgồp song dơpă, geh kơnòl bơh cau tĕ khà dê. Mờ kung cih dờp ală jơnau đơs cau tĕ khà đơs tus mờ sồr gơnoar atbồ sàh bơsong ală tơngume gơ wèt gơnăp gơnoar. Gơ wèt mờ broă tơmut bal càr, tơmut bal sàh, ồng Phan Đình Trạc đơs nền, jơnau lơh nền do ờ mìng tơrmù mpồl cau lơh broă sră pơ àr gơnoar atbồ, lơh broă geh cồng nha mờ gam lơh gơlik ù tiah, bơta gơn kơnờm pa nàng dong bơtàu tơnguh dà lơgar. 

Bè bơta kơlôi rơcang bơh cau tĕ khà dê bè pràn jak kwang bàng nàng lơh jat jơnau sồr tơmut bal, Kwang atbồ Mpồl lơh broă cíñ trị tàm dơlam is ồng Phan Đình Trạc jờng rơ ngan nùs nhơm do bơh làng bol cau tĕ khà dê mờ do là dùl tàm ală tơngume mờ Ƀộ Cíñ trị, Mpồl duh broă Đảng dà lơgar sền gròi ngan mờ ai tơlik lài gùng dà, broă lơh. Jat nùs nhơm “ntoat ndang, sap sèng ndang” mơya gàr di broă rơndap lơh, gàr bơta niam, ngan là bơsong ală bơta ờ niam bè gùngd à; tam pà kâp, tam pà gơnoar pràn rê hờ kâp hơ đơm, lơh is kong is kơnòl, khin sơnơng, khin lơh, khin kong kơnòl bơh cau lam bồ dê, bơsong bơta tàm pơrdah, pleh. Ồng Phan Đình Trạc đơs nền: “Sap sèng bè hơ̆ den dà lơgar tam pà gơnoar uă ai kâp càr mờ kâp sàh in nàng kâp hơ đơm in lơh nền, kâp hơ đơm lơh mờ kâp hơ đơm kong kơnòl. Kâp càr geh gơnoar broă tờm ngan ờ mìng lơh jat jơnau lơh nền, broă lơh bơh dà lơgar mờ gam là kâp ai tơlik broă lơh, mờ sồr lơh tơn, atbồ tơn jơh ală broă lơh kâp sàh dê tàm ù tiah ƀòn lơgar. Kâp sàh lơh jat broă lơh bơh dà lơgar mờ bơh càr ai tơlik, mờ geh tơnguh ai tam pà kâp, tam pà gơnoar, bơsong ală broă gơ wèt gơnoap gơnoar kâp sàh dê. Kâp sàh sồr là pal rềp làng bol, bơsong tơl jơnau sồr làng bol dê dồ bă di tŭ”.

Di dơ̆ do, di tơngkah 50 nam Ngai tơngklàs tiah đah jum, tơrgùm dùl dà lơgar (30/4), Kwang atbồ Mpồl lơh broă cíñ trị dơlam is dà lơgar ồng Phan Đình Trạc ala mat Mpồl cau ala mat Quôk hội càr Lâm Đồng neh jàu pà 10 bơnah phan, tơl bơnah phan kờp priă 1 tơlak đong, ai ală hìu bơnhă geh sră dong kờl bơh dà lơgar, cau geh màng mờ dà lơgar, cau ling sồt să, cau ling kòp tê jê să tàm sàh Bình Thạnh, kơnhoàl Đức Trọng in. Phan pà neh di tŭ pơn jờng, kah ưn ngài bơta phi să dờng màng bơh ală cau khin cha jak chài chơt màng, cau ling sồt să, cau ling kòp tê jê să, hìu bơnhă geh màng mờ dà lơgar ai rài kis khat gơboh, hờm ram, gơboh gơbài tŭ do.