Nghị quyết bè broă pồ ồng Trần Thanh Mẫn at gơnoar broă Củ tịc Quôk hội khoă XV neh geh ală kwang bàng Quôk hội pờ tê ring bal mờ 475 tàm 475 nă kwang bàng tus bal pờ tê ring bal, geh 97,54% kờp jơh khà kwang bàng Quôk hội. Củ tịc Quôk hội ồng Trần Thanh Mẫn yal bơr guh at gơnoar broă: “Tềng đap bồng bi pơrhê sơmañ rơmit bơh dà lơgar, tềng đap Quôk hội mờ làng bol cau tĕ khà gùt lơgar, añ – Củ tịc Quôk hội lơgar Kộng hòa xã hội củ nghiã Việt Nam dan yal bơr guh at gơnoar broă: Jơh nùs dờn song mờ dà lơgar, mờ Làng bol, mờ Sơnua boh lam lơgar Kộng hòa xã hội củ nghiã Việt Nam; lơh ngan, pơn đơl pràn lơh gơs niam kơnòl broă mờ Đảng, Dà lơgar mờ Làng bol jàu”.

Đơs tơnơ̆ dơ̆ yal bơr guh at gơnoar broă, Củ tịc Quôk hội ồng Trần Thanh Mẫn ai tơnggŏ nùs nhơm ki ngàm mờ kah ưn ngài git lơh tus Củ tịc Hồ Chí Minh; kah ưn ngài ală rơnàng kwang đơng lam bồ lài do, kwang bàng dờng sơnam, mè Việt Nam khin cha jak chài, cau khin cha jak chài mpồl phàu crong, cau khin cha jak chài lơh broă; ală hìu bơnhă cau chơt màng, ală cau ling kòp tê jê să, cau ling sồt să, hìu bơnhă geh màng mờ dà lơgar; jơh nùs ưn ngài bè bơta đơng lam bồ, sồr lơh di ngan bơh Ƀan Cấp hàñ Đảng dà lơgar, Ƀộ Cíñ trị, Ƀan Ƀí thư, bơh Tổng Ƀí thư ồng Nguyễn Phú Trọng dê.

Nghị quyết bè broă pồ ồng Tô Lâm at gơnoar broă Củ tịc lơgar Kộng hòa xã hội củ nghĩa Việt Nam geh ală kwang bàng Quôk hội pờ tê ring bal mờ 472 tàm 473 nă kwang bàng tus bal pờ tê ring bal. Đơs guh at gơnoar broă tơnơ̆ dơ̆ yal bơr, Củ tịc lơgar ồng Tô Lâm hơ pơrgon rơp lơh jơh nùs, wil tơl kơnòl broă, gơnăp gơnoar bơh Củ tịc lơgar dê neh geh Sơnua boh lam cih; jơh nùs lơh kơnòl broă tàm lơgar ndai, lơh broă mờ lơgar ndai, sền gàr dà lơgar, sền gàr lơngăp lơngai bơh dà lơgar dê: “Git wă uă ngan kơnòl broă dờng màng tềng đap Đảng, Dà lơgar, Làng bol, añ dan hơ pơrgon rơp lơh jơh nùs, wil tơl kơnòl broă, gơnăp gơnoar bơh Củ tịc lơgar dê neh geh Sơnua boh lam cih; jơh nùs lơh kơnòl broă tàm lơgar, lơh broă mờ lơgar ndai, sền gàr dà lơgar, sền gàr lơngăp lơngai bơh dà lơgar dê; bal mờ gùt Đảng, gùt làng bol, gùt ling klàng he dê mờ ală mpồl lơh broă tàm anih lơh broă cíñ trị tơnguh uă ngan rlau jơh nùs nhơm “lơh tờm is, pin dờn, brồ guh is, lơh pràn is, pơn yờ să jơi bơtiàn”, lơh ngan lam lơh geh cồng nha tơl jơnau lơh nền, gùng dà bơh Đảng dê, lài ngan là Nghị quyết Pơrjum dờng cau ala mat gùt lơgar dơ̆ XIII bơh Đảng dê”.

Cồng nha pờ tê ring bal pồ Củ tịc lơgar, Củ tịc Quôk hội mờ khà sră pồ uă ai gŏ bơta pin dờn bơh kwang bàng Quôk hội dê, kung là mblàng wơl bơta kơp kờñ bơh làng bol dê. Củ tịc lơgar pa ồng Tô Lâm mờ Củ tịc Quôk hội pa ồng Trần Thanh Mẫn geh tơl ală jơnau sồr bal bơh Kwang geh jơng tàm Ƀộ Cíñ trị, Ƀan Ƀí thư dê, geh bơngă pin dờn uă tàm gùt Đảng mờ làng bol. Ồng Phạm Văn Hào, Mpồl kwang bàng càr Đồng Tháp kơp kờñ: “Bàr jơnau đơs bơh Củ tịc lơgar, Củ tịc Quôk hội dê, ală jơnau đơs do pal đơs là ngan ngồn ngan, să tờm añ mờ làng bol kơp kờñ uă ngan Củ tịc lơgar, Củ tịc Quôk hội lơh ngan sơrlèt gan kal ke, sơrlèt gan bơta lòng, kòl yan nàng lơh gơs niam kơnòl broă bơh Đảng mờ Dà lơgar, Làng bol dê jàu”.

Tàm tơngai broă lơh sa tàm lơgar mờ ală lơgar ndai gơtìp uă kal ke, broă pồ tơl ală gơnoar broă đơng lam bồ tờm ngan rơp dong sơlơ lơh kơ̆ tai bơta pin dờn, lơh gơlik bơta gơn kơnờm nàng jơh gùt anih lơh broă cíñ trị tơrgùm lơh gơs broă gam uă kal ke tềng đap. Ồng Tạ Văn Hạ, Mpồl kwang bàng càr Quảng Nam đơs, Củ tịc lơgar ồng Tô Lâm mờ Củ tịc Quôk hội ồng Trần Thanh Mẫn ndrờm là ală cau geh bơto bơtê wil tơl, neh at uă gơnoar broă kuơmàng, geh pràn jak, mờng chài lơh broă: “Pơrjum dơ̆ do den geh dùl bơta kuơmàng ngan rlau jơh mờ kung geh cau tĕ khà, làng bol sền gròi ngan, hơ̆ là broă lơh kwang bàng. Quôk hội pồ Củ tịc lơgar, Củ tịc Quôk hội, bơh cồng nha pò ai gŏ nùs nhơm geh kơnòl bơh kwang bàng Quôk hội dê ờ mìng là gơ wèt ală kwang đơng lam bồ geh pồ tŭ do mờ gam là kơnòl lơh bè lơi di mờ jơnau lơh nền bơh Đảng, di bơta kơp kờñ làng bol dê tàm broă đơng lam dà lơgar”.