Mpồl cau ala mat Quôk hội càr Dăk Nông neh lơh 2 dơ̆ tìp mat cau tĕ khà tàm ală xã Trường Xuân, kơnhoàl Dăk Song mờ xã Dăk Som, kơnhoàl Dăk Glong. Tàm dơ̆ pơrjum pa do, Quôk hội neh ring bal bè jơnau lơh nền bơcri priă rơndap broă lơh lơh gùng rơndeh ntoat mhar Gia Nghĩa – Chơn Thành jòng mờr 130 kơi sồ, kờp jơh priă bơcri 25 rbô 540 tơmàn đông.

Uă cau tĕ khà ai lơh chờ hờp ngan, jờng rơ gơnoar broă bơh Mpồl cau ala mat Quôk hội càr Dăk Nông dê neh yal wơl bơta kơp kờñ bơh cau tĕ khà dê tus pơrjum Quôk hội bè lơh gùng rơndap ntoat mhar. Cau tĕ khà kơp kờñ ngan rơndap broă lơh gờñ geh lơh, nàng gùng rơndeh ntoat mhar gờñ gơ gơs ngan ngồn, drơng jơnau kờñ lòt rê, kă bro mờ dong làng bol ƀuơn geh dờp ală broă drơng ala kham sơm kòp kâp hơđang.

Yal bè broă do, ồng Ngô Thanh Danh, Ƀí thư Tỉñ ủy, Kwang atbồ Mpồl cau ala mat Quôk hội càr Dăk Nông pà git, mờ nùs nhơm geh kơnòl uă bơh 2 càr Dăk Nông mờ Bình Phước dê, bơh uă dơ̆ dan, Cíñ phủ neh tam gơl tơngai lam lơh rơndap broă lơh gùng rơndeh ntoat mhar Gia Nghĩa (Dăk Nông) – Chơn Thành (Bình Phước) geh rơp lơh bơh lồi nam 2024, kờp dŭ lơh gơs tàm nam 2026, sơn đờm ai lòt rê tàm nam 2027. Càr gam pơn jat tai dan lơh gùng rơndeh ntoat mhar Gia Nghĩa – Buôn Ma Thuột nàng pờ gùng dờng dong Tây Nguyên bơtàu tơnguh: “Cau tĕ khà dan pờ dờng gùng rơndeh 14 bơh Gia Nghĩa tus rbàng 20, den gùng do bol hi kung neh dan lơh sơl. Tơnơ̆ tŭ sơn đờm lơh gùng rơndeh ntoat mhar Gia Nghĩa – Chơn Thành den bol hi rơp pơn jat tai dan bơcri priă lơh gùng rơndeh ntoat mhar Gia Nghĩa – Buôn Ma Thuột mờ ngan là rơp dan tàm tơngai lơh broă tơnơ̆. Mờ gùng do den pal đơs là kờñ pal geh gùng lòt gan gùt tiah Tây Nguyên tai den hơ̆ sồng gơtùi bơtàu tơnguh. Tŭ do, khà rơndeh rơndồ lòt gan càr Dăk Nông uă ngan, kờp bal dùl ngai geh mờr 2 rbô 500 nơm rơndeh lòt gan dùl anih, ai ală ngai chờ, ngai rlô den khà rơndeh lòt rê uă rlau bơh 2 tus 3 dơ̆”.

Tàm ală dơ̆ tìp mat, cau tĕ khà ală tiah pơn jat tai đơs mờ Cau ala mat Quôk hội uă broă gam ờ niam. Cau tĕ khà kơnhoàl Phú Thiện, càr Gia Lai đơs bè sră nggal gơnoar atbồ tàm gah ù tiah gam kal ke. Cau tĕ khà ồng Hoàng Thanh Tùng ơm tàm Tổ zân phố 3, Ƀòn drà dềt Phú Thiện pà git: “Uă dơ̆ làng bol tong sră nggal dan tam gơl tus cơldŭ lơh broă cih sră ù tiah kơnhoàl nàng lơh hìu ròng bar bèt. Cơldŭ lơh broă cih sră ù tiah dờp sră nggal, dờp neh di jơnau sồr, mơya ndrờm geh dờp wơl jơnau hơ là kơp jơnau đơs bơh Cơldŭ lơh broă cih sră ù tiah càr dê. Tus tŭ do den geh ală sră nggal neh dờp 5 nhai, mơya kung ờ gŏ hơ wơl. Ñchi bơh tài tam gơl làng bol in jat jơnau sồr mờ pal kơp jơnau đơs. Gơtùi tam gơl ntrờn cơldŭ lơh broă cih sră ù tiah kơnhoàl rê ai kơnhoàl in atbồ nàng gơ in nền nòn rlau halà ờ”.

Cau tĕ khà ƀòn dờng Bảo Lộc, càr Lâm Đồng den đơs, bơta rơndap ù tiah phan kuơ tàm ù gam gơ tàm rơndap rơndồl mờ uă rơndap ù tiah ndai bơh dà lơgar bal mờ kâp hơ đam dê. Bơta do lơh gơbàn uă kòl yan bè adat boh lam, là bơta kal ke lơh gơbàn kòl yan tàm broă lam lơh 2, 3 broă lơh dờng bơh càr dê. Mò Phạm Thị Hường ơm tàm sơnah ƀòn Lộc Tiến, ƀòn dờng Bảo Lộc pà git, jơh 2 lồ ù hìu bơnhă mò dê ndrờm gơ kòl tàm rơndap ù tiah lơm den tàng ờ gơtùi lơh sră càn priă ngân hàng nàng bơcri lơh sa, broă lơh niam wơl hìu ơm, tam pà ù ală kòn in bal mờ uă broă lơh ndai geh gơ rềng ndrờm gơtìp ơm ing jơh. Rài kis hìu bơnhă gam gơtìp kal ke ngan tài gơ kòl rơndap ù tiah: “Gơ wèt mờ hìu bơnhă añ den đơs ngan ờ kal ke. Añ ơm ndo neh nđờ jơt nam do, tŭ do dan tam gơl jơnau kờñ ngui ù kung ờ gơtùi sơl, lơh hìu oh kòn in kung ờ gơtùi sơl, den tàng hìu bơnhă gơtìp kal ke ngan bè priă jền. Hìu bơnhă añ kung bè làng bol tàm do kung geh jơnau dan bè rơndap ù tiah gròi sền phan kuơ tàm ù, dilah lơh den lơh tơn, ai dilah ờ lơh den tă bơsong tơn bol hi in, ai tŭ do den làng bol kung ờ git lơh bè lơi”.

Cih dờp ală jơnau đơs, jơnau dan, ală Mpồl cau ala mat Quôk hội neh sồr cau ala mat ală sở, gah broă lơh mờ gơnoar atbồ ală tiah hơ mơ uă jơnau lùp. Mờ ală broă gơ wèt gơnoar broă ƀộ, gah broă lơh mờ Quôk hội dê den pơn jat tai tơrgùm wơl nàng pơyua tus ală kâp geh gơnoar in bơsong.