Mpồl kwang bàng Quôk hội càr Gia Lai neh geh ală dơ̆ tìp mat cau tĕ khà tàm ală kơnhoàl Phú Thiện, Đức Cơ, Chư Păh, Đăk Đoa, Kbang, Chư Prông, Đăk Pơ mờ Ia Grai. Tàm ală dơ̆ tìp mat, cau tĕ khà càr Gia Lai ai tơnggŏ bơta chờ hờp tềng đap cồng nha pơrjum dơ̆ 4, Quôk hội khoă 15. Cau tĕ khà kung đơs niam nùs nhơm geh kơnòl bơh ală kwang bàng Quôk hội càr Gia Lai dê neh geh uă jơnau đơs tă pơgồp kuơmàng tàm cồng nha bơh dơ̆ pơrjum dê.

Cau tĕ khà đơs uă broă gam ờ niam tàm ƀòn lơgar bè sền gròi bơcri priă, lơh niam phan bơna ƀòn lơgar, ngan là bè gùng lòt. Bơta bŭ dà tàm kơnòm dềt gơguh uă tàm nam lài, ờ geh anih nhơl ñŏ ai kơnòm dềt tiah ƀòn lơgar, tiah jơi bơtiàn kòn cau dùl êt nă cau in. Tàm dơ̆ tìp mat, uă cau tĕ khà kung sồr ală gah lơh broă geh gơnoar geh ală broă lơh gàr kơ̆ kơljap drà kă bro phơng sih, phan ngui lơh sa suơn sre nàng cau lơh broă sa in iang nùs lơh sa. Ồng Lê Văn Trung ơm tàm thôn 3, xã Ia Tô, kơnhoàl Ia Grai geh jơnau đơs: “Bơta giă ờ kơ̆ kơljap, dơ̆ 2 là giă phơng sih den kas ngan, làng bol sơngka sền gàr kơphe ờ geh priă cồng, mờ neh tam git nđờ nam do bloh, lơhkàr lơi kung tuh tàm priă blơi phơng lơm. Lài do mìng 600 rbô dùl ƀàu, tŭ do gơguh tus mờr 1 tơlak đông dùl ƀàu, bơdìh hơ̆ tai gam geh priă ơpah cau pik… Làng bol kung kơp kờñ Quôk hội, Cíñ phủ sền sơ wì nàng tàm pơn ring giă đah phan lơh gơs bơh suơn sre mờ phơng sih.”

Ai tàm càr Dăk Nông, mpồl kwang bàng Quôk hội càr do neh lơh ală dơ̆ tìp mat cau tĕ khà tàm ală kơnhoàl Dăk Rlâp, Dăk Mil, Cư Jut mờ ƀòn dờng Gia Nghĩa. Cau tĕ khà càr Dăk Nông đơs niam gơnoar broă bơh mpồl kwang bàng càr dê tŭ tus bal cribơyai, tă pơgồp jơnau đơs mờ lùp tàm hìu pơrjum Quôk hội. Cau tĕ khà Dăk Nông kung dan uă broă bè lơh niam wơl sră nggal hàñ cíñ tàm gah ù tiah, broă lơh rơndap ù tiah, ngui ù, broă bơcri priă lơh ală broă lơh phan bơna ƀòn lơgar, gàr kloh niam tiah ơm kis…

Tàm broă lơh rơcang sơndră sa kuề sa kuà, cau tĕ khà kơp kờñ càr Dăk Nông pal sơlơ tơnguh rlau tai nàng bơsong jơh ală broă geh sền gròi tàm càr. Pơn rơ bè tàm xã Dăk Nia, ƀòn dờng Gia Nghĩa, uă cau tĕ khà sồr mhar lơh loh kơnòl mờ bơsong bơta broă lơh gùng lòt mut tàm ñrùh dà Liêng Nung gơtìp nchùn, koh kơl gùng lòt. Ồng Nguyễn Đình Thi ơm tàm ƀòn Srê U, xã Dăk Nia geh jơnau đơs: “Dan hơ cau tĕ khà bol hi in git là tơnơ̆ tŭ crơng gơs Mpồl đơng lam rơcang sơndră sa kuề sa kuà bơh càr dê den tus tŭ do mpồl do geh tơmut tàm broă lơh bơsong mờ dờp nđờ broă gơlik geh ờ niam tàm càr. Tŭ do, cau tĕ khà xã Dăk Nia bol hi ờ suk ngan là mờr 30 tơmàn đông bơcri ai Tiah nhơl chờ Liêng Nung in kờp bal mờ gùng lòt tŭ do gơ rê wơl hờ sồ 0, mờ tàm do là anih nhơl chờ mpồl bơtiàn gam bơt bơtàu”.

Kung tàm pph lài, ồng Phan Đình Trạc, Ủy viên Ƀộ Cíñ trị, Ƀí thư Đảng dà lơgar, kwang atbồ Ƀan Nội cíñ dà lơgar bal mờ Mpồl kwang bàng Quôk hội càr Lâm Đồng neh geh dơ̆ tìp mat cau tĕ khà tàm xã Dà Nhim, kơnhoàl Lạc Dương.

Tàm dơ̆ tìp mat, làng bol tĕ khà xã Dà Nhim, kơnhoàl Lạc Dương neh ai tơnggŏ bơta chờ hờp bè ală cồng nha kuơmàng bơh pơrjum dơ̆ 4, Quôk hội khoă 15 dê, ngan là ală Adat boh lam, Nghị quyết kuơmàng neh geh ring bal. Mờ kung pơn jat tai dan mờ Mpồl kwang bàng Quôk hội càr Lâm Đồng 2, 3 broă ờ niam mờ dan kơnhoàl, càr mờ dà lơgar pal mhar sền gròi, sền sơ wì bơsong. Tàm hơ̆, geh bơta gùng dờng 27C gơbàn ờ niam, sùm gơtìp kòl gùng lòt tài bơh tơrlah, uă gơl rơ kuet rơ kue ngòt rơngơt mờ pơhìn tus lơngăp lơngai lòt rê tàm gùng; mhar kờp sền, lơh sră ngui ù ai làng bol in; broă dong kờl bơh kwang bàng ờ lơh broă sùm kâp xã lơyah ir; bơsong priă càn dong kờl priă cồng drơng lơh sa… Kwang đơng lam bồ Ủy ƀan Ñân zân càr Lâm Đồng, Ủy ƀan Ñân zân kơnhoàl Lạc Dương kung neh yal tơn, hơ tơn 2, 3 broă gơ wèt gơnăp gơnoar mờ cau tĕ khà xã Dà Nhim neh đơs.

Ồng Phan Đình Trạc, Kwang atbồ Ƀan Nội cíñ dà lơgar cih dờp ală jơnau đơs, jơnau dan bơh cau tĕ khà dê mờ geh tơrgùm, geh jơnau yal yal mờ Quôk hội tàm ală dơ̆ pơrjum tus. Tàm hơ̆, sồr bơcri priă pờ ơnàng, lơh niam gùng dờng 27C là jơnau dan ngan ngồn bơh cau tĕ khà de emờ dipal mờ gùng dà bơtàu tơnguh tiah Tây Nguyên bơh Ƀộ Cíñ trị dê. Ồng Phan Đình Trạc đơs: “Bè gùng dờng 27C, añ gŏ mpồl kuang bàng Quôk hội pal geh dơ̆ lơh broă mờ Ƀộ Giao thông bal mờ càr nàng tă bơsong ală kal ke bè do. Do kung là bơta gơ ơm tàm gùng dà bal bơh Ƀộ Cíñ trị dê bè Nghị quyết tiah Tây Nguyên. Tàm hơ̆, dùl gùng dà kuơmàng ngan là tàm tơrbŏ ală tiah bal mờ gơp, tiah Tây Nguyên mờ ală tiah bơtàu tơnguh tàm tiah đah mat tơngai lik, mờ ƀòn dờng Hồ Chí Minh, mờ càr Khánh Hòa…”