Tàm ƀòn dờng Buôn Ma Thuột, càr Dăk Lăk, Mpồl kwang bàng Quôk hội càr Dăk Lăk neh geh dơ̆ tìp mat mờ cau lơh phan, cau lơh broă. Tus bal pơrjum tìp mat cau tĕ khà geh Ƀí thư Đảng dà lơgar, Kwang atbồ Ƀan zân vận dà lơgar, kwang bàng Quôk hội khoă XV mò Bùi Thị Minh Hoài mờ mờr 150 nă cau tĕ khà là cau lơh phan, cau lơh broă tus bơh ală mpồl lơh broă, mpồl lơh sa kă bro tàm càr.

Tơnơ̆ tŭ iat ală jơnau yal bè tơngume Pơrjum dơ̆ 7, Quôk hội khoă XV mờ cồng nha lơh broă bơh Mpồl kwang bàng Quôk hội càr dê bơh tơnơ̆ pơrjum dơ̆ 6 tus tŭ do, ală cau tĕ khà càr Dăk Lăk neh geh ală jơnau dan tơrgùm tàm ală tơngume bè ƀảo hiểm, priă nhai, hìu ơm, bơta dong kờl ai cau lơh broă in,.. Mùl màl, cau tĕ khà dan lơh gơlik bơta niam nàng đoàn viên, cau lơh broă geh blơi ƀảo hiểm y tế geh tơm priă tŭ lòt kham sơm kòp tàm ală hìu sơnơm bơdìh mờ tŭ jơ lơh broă ngan ngồn, tơrmù sơnam ơm rlô lơh broă gơ wèt mờ 2, 3 mpồl cau lơh broă krơi is bè pơgru mầm non, cau lơh phan lơh broă tơn tàm ală gah khih aniai, kơn jơ̆ kơn jut,…

Cau tĕ khà mò Ngô Thị Ánh Đào, Anih tờm dong kờl bơto bơtê kis gơ rờm bal kơnòm dềt kuet kơlte càr Dăk Lăk đơs: “Dan Quôk hội, kwang đơng lam bồ càr đơs mờ ală kâp geh gơnoar geh ală broă lơh ngan ngồn nàng geh ală broă dong kờl mờ khà dong kờl dipal gơ wèt mờ gah bơto bơsram mầm non, geh gùng dà broă lơh tơnguh priă dong kờl broă lơh, tơrmù sơnam jơh sơnam rê rlô lơh broă tàm mpồl gah broă lơh kơn jơ̆ mờ khih aniai nàng ală cau pơgru mầm non in iang nùs lơh broă mờ đềt mềr mờ broă lơh”.

Bal mờ hơ̆, cau tĕ khà kung dan dà lơgar sền gròi, sền swì geh broă lơh dong kờl lơh hìu ơm ai cau geh priă jền lơh geh ờ uă, hìu ơm ờ kas priă ai cau lơh phan, cau lơh broă in. Cau tĕ khà mò Nguyễn Thị Thanh Thủy, Kông ty Kổ phần Lòt nhơl Dăk Lăk đơs loh, tàm bơta giă priă gơguh kas, priă tă ngui sa, ròng siam oh kòn uă, cau lơh phan ờ geh priă jền tềm pềr nàng gơtùi blơi hìu: “Dan dà lơgar sền gròi, sền swì, geh broă lơh dong kờl lơh hìu ơm ai cau geh priă jền lơh geh ờ uă, hìu ơm ờ kas priă tac tơm priă rơhời halà ai cau lơh phan, cau lơh broă in càn priă geh dong kờl priă cồng, priă cồng ai càn lơyah nàng gơtùi blơi hìu ơm gàr kơ̆ kơljap rài kis, iang nùs lơh broă, lơh sa”.

Kung tàm pơrjum tìp mat cau tĕ khà, Mpồl kwang bàng Quôk hội càr Dăk Lăk neh pà 100 bơnah phan ai cau lơh phan, cau lơh broă geh rài kis kal ke tàm càr in.

Nàng drơng pơrjum dơ̆ 7, Quôk hội khoă XV mờr tus, pa do, Mpồl kwang bàng Quôk hội càr Lâm Đồng neh bơyai lơh tìp mat tĕ khà tàm uă tiah tàm càr. Tàm ală anih tìp mat, cau tĕ khà ai tơnggŏ bơta pin dờn mờ kơp kờñ tàm ală broă lơh nền tàm broă chồl pràn bơtàu tơnguh lơh sa mpồl bơtiàn, broă lơh sơrlèt gan kal ke tài bơta roh giă priă bơh Cíñ phủ dê, bơh Quôk hội dê tàm ală dơ̆ pơrjum lài. Mờ kung pơn jat tai dan uă broă gơ rềng tus broă lơh atbồ dà lơgar tàm ală gah.

Tàm xã Roh Men, kơnhoàl Dam Rông, cau tĕ khà kờñ Đảng, Dà lơgar pal pơn jat tai sền gròi lam lơh ală broă lơh, broă dong kờl bơcri priă tàm tiah làng bol jơi bơtiàn dồ êt nă cau, gàr lơngăp lơngai rài kis mpồl bơtiàn, bơsong bơta priă ai càn dong kờl bơcri priă bơtàu tơnguh lơh sa, tơnguh mhar broă lơh sră ngui ù, lơh hìu ơm ai ală hìu bơnhă rƀah in, lơh niam mờ pờ ơnàng gùng dờng 27, tă priă lơh đèng sòl àng, gùng lòt, lơh dà sàng goh ƀòn lơgar.

Tàm tŭ hơ̆, cau tĕ khà xã Mê Linh, kơnhoàl Lâm Hà sền gròi ngan tus broă lơh rơcang sơndră sa kuề sa kuà pal pơn jat tai sơlơ lam lơh, sền gròi tus broă lơh sền sơ swì, jat sền broă lơh jat adat boh lam bơh kwang bàng kâp hơ đơm dê, lam lơh ring bal ală broă lơh dong kờl bơcri priă bơtàu tơnguh tiah jơi bơtiàn dồ êt nă cau, gàr lơngăp lơngai rài kis mpồl bơtiàn… Cau tĕ khà ồng Trương Văn Trình ơm tàm thôn 5, xã Mê Linh, kơnhoàl Lâm Hà đơs: “Rơcang sơndră sa kuề sa kuà den kâp càr geh mpồl lùp sền, sền sơ swì. Mơya tŭ lòt lùp sền, sền sơ swì kơnhoàl lơi, xã lơi den mpồl sền swì yal halà ờ. Geh yal sră ƀău nàng bol hi in git halà ờ. Ai rềp ngan rlau jơh den kâp kơnhoàl pal jat sền, sồr lơh, sền kâp hơ đơm he dê lơh gơtùi halà ờ nàng bơsong, lơh gơlik bơta niam, pal lơh gơtùi nàng cèng wơl bơta pin dờn làng bol in. Ờ di là jơnau đơs cau tĕ khà dê đơs mờ kâp kơnhoàl ờ sồr lơh, ờ sền gròi dùl êt lơi là ờ gơtùi”.

Ala mat ală mpồl, sở, gah broă lơh, gơnoar atbồ ală tiah bơh càr Lâm Đồng dê neh dơ̆ dùl dơ̆ hơ 2, 3 tơngume, gah broă mờ cau tĕ khà sền gròi. Mpồl kwang bàng Quôk hội càr Lâm Đồng kung cih dờp, tơrgùm ală jơnau đơs nàng sồr ală anih lơh broă geh gơnoar sền swì, bơsong tàm tơngai tus.