Mpồl kwang bàng Quôk hội càr Dăk Nông neh bơyai lơh tìp mat cau tĕ khà tàm sơnah ƀòn Nghĩa Đức (ƀòn dờng Gia Nghĩa), xã Nam Bình (kơnhoàl Dăk Song), xã Dăk Lao (kơnhoàl Dăk Mil) mờ xã Cư Knia (kơnhoàl Cư Jút). Tàm ală dơ̆ tìp mat, ală kwang bàng Quôk hội neh yal mờ gal ngan cau tĕ khà bè cồng nha pơrjum dơ̆ 5, Quôk hội khoă XV. Đơs niam broă lơh bơh Mpồl kwang bàng Quôk hội càr Dăk Nông dê tàm dơ̆ pơrjum, cau tĕ khà kơp kờñ dan dà lơgar sền gròi bơcri priă uă rlau tai lơh sir phan bơna, tă bơsong ală kal ke bè gùng lòt, hìu bơsram, hìu sơnơm xã, sơnah ƀòn nàng bơtàu tơnguh lơh sa mpồl bơtiàn, tơnguh niam rài kis làng bol dê. Bơdìh hơ̆ tai, cau tĕ khà càr Dăk Nông đơs bơta geh bŭ dà tàm kơnòm dềt mơya ờ hềt geh broă lơh geh cồng nha nàng tơrmù ƀà; uă rơndap broă lơh ồs đèng càl tă priă lơh tàm kơnhoàl Dăk Song neh lơh gơs mơya ờ hềt geh ai ngui.

Cau tĕ khà kung dan mờ ală kwang bàng Quôk hội pal geh tai broă dong kờl nàng “gàr” cau lơh sơnơm lơh broă, broă lam lơh bơta dong kờl gơ wèt mờ cau dờng sơnam. Pơn rơ ngan rlau jơh là tàm gah ù tiah, cau tĕ khà tàm ală tiah bơh càr Dăk Nông dê geh jơnau dan bè ală bơta ờ niam tàm broă tơm priă ai wơl ù lơh rơndap broă, kòl yan sră pơ àr tam pà gơnoar ngui ù, tam gơl jơnau kờñ ngui ù, broă rơndap lơh ngui ù pah nam… Ồng Trần Văn Chức ơm tàm sơnah ƀòn Nghĩa Đức, ƀòn dờng Gia Nghĩa geh jơnau đơs: “Añ gŏ sră wac sềr rùp rơndap ù tiah lài do mờ sră wac sềr rùp rơndap ù tiah pa geh uă bơta ờ ring bal, ngan là broă rơndap lơh ngui ù nam 2022 mờ broă rơndap lơh ngui ù nam 2023 kung geh bơta ờ ring bal, bơh hơ̆ uă hìu bơnhă làng bol neh lơh sră pơ àr nàng tam gơl jơnau kờñ ngui ù bơh ù lơh sa suơn sre gơs ù ơm mơya uă dơ̆ lòt rê, roh priă ơpah đo was, hơ̆ sồng dut ndơl kung ờ gơtùi lơh, bơta do lơh gơbàn kal ke ngan làng bol in”.

Kung tàm poh lài, ală kwang bàng Quôk hội càr Dăk Lăk neh geh dơ̆ tìp mat cau tĕ khà tàm ală kơnhoàl Cư Mgar, Krông Bông mờ ƀòn dờng Buôn Ma Thuột. Tàm ală anih tìp mat, ală kwang bàng Quôk hội càr Dăk Lăk neh yal cau tĕ khà in bè cồng nha tơngume lơh broă tàm pơrjum dơ̆ 5, Quôk hội khoă XV pa geh lơh mờ broă lơh bơh mpồl kwang bàng Quôk hội càr Dăk Lăk dê tàm pơrjum; iat mờ cih dờp jơnau đơs, jơnau dan cau tĕ khà dê pơyua tus Quôk hội.

Tàm ală tiah, bơta mờ cau tĕ khà sền gròi uă ngan rlau jơh là broă gơ rềng tus bơta lơngăp lơngai cíñ trị mờ ring lơngai mpồl bơtiàn, ngan là tơnơ̆ broă gơlik geh tàm kơnhoàl Cư Kuiñ, càr Dăk Lăk. Ală cau tĕ khà đơs là, broă gơlik geh neh geh bơta sền gròi, bơsong di tŭ bơh mpồl lơh broă geh gơnoar mờ gơnoar atbồ dê, lơh gơlik bơta iang nùs, ring bal bơh làng bol. Bulah bè hơ̆, do kung là bơta ƀuơn ngan lơh gơ rềng, là mờng chài nàng jơh gùt anih lơh broă cíñ trị in pal tơnguh rlau tai nùs nhơm tam klac bal, rơcang ngac mờ ală mpồl sò tơm. Ồng Lê Đình Trúc ơm tàm thôn 1, xã Ea Kiết, kơnhoàl Cư Mgar geh jơnau đơs: “Bol hi kơp kờñ lơh bè lơi bơta lơngăp lơngai càr Dăk Lăk dê đơs bal, bơh ală xã dê đơs is, bè xã Ea Kiết bol hi, den kơp kờñ bè lơi ală cau lơi tờm lơh halà tàm broă lơngap lơngai gơlik geh bơta lơi den pal gròi sền nền nòn mờ ai tơlik bơsong, ờ lời lơh gơ rềng bal tus bơta lơngap lơngai. Pơn yơu bè xã bol hi kung gam lơh ngan wèt tus bơt bơtàu ƀòn lơgar pa. Nàng lơh gơtùi jơnau kờñ do den kung pal wil tơl, gơ jat bal mờ ală bơta lơh sa, cíñ trị, mpồl bơtiàn, sền gàr lơngăp lơngai, sền gàr dà lơgar”.

Bal mờ hơ̆, cau tĕ khà tàm ƀòn dờng Buôn Ma Thuột sền gròi ngan tus Kơrnuat rơndap ù tiah ngui ù tơngai bơh nam 2021 tus nam 2030 bơh Ủy ƀan Ñân zân ƀòn dờng dê yal tàm lồi nhai 5 pa do. Jat kơrnuat do, rơp geh rlau 1 rbô 100 lồ ù bơh 12 xã, sơnah ƀòn gơ wèt ƀòn dờng pal tam gơl bơh ù ơm gơs ù tam chi tam jŏ nam mờ ù tam chi tam mpồl bơtiàn. Cau tĕ khà tàm ală tiah do lùp, dilah jat rơndap ù tiah do den 2, 3 ƀòn rơp ờ gam ù ơm tai. Ồng Y Mnông Hmok ơm tàm xã Ea Kao, ƀòn dờng Buôn Ma Thuột geh jơnau đơs: “Tàm 14 thôn, ƀòn den gŏ là rơndap ù tiah ù ơm dùl êt ngan, ờ hềt dipal mờ tiah ƀòn lơgar. Làng bol he pal geh ù ơm hơ̆ sồng gơtùi lơh hìu mờ gơtùi tam pà gơnoar ngui ù ai oh kòn in. Gơ wèt mờ tiah ƀòn Huê, xã Ea Kao, ƀòn dờng Buôn Ma Thuột, jat añ sền gŏ tàm sră wac sềr rùp rơndap ù tiah den tŭ do ờ geh bă ù lơi là ù ơm, mìng geh rơndap ù tiah ù tam chi tam jŏ nam, ù tac bro broă drơng ala, ù lơh tiah nhơl ñŏ lơh prài bồ tơngoh mờ ù bơt bơtàu phan bơna. Den tàng ƀòn Huê, xã Ea Kao kus bơh nđờ rài do mơya ờ git là tơnơ̆ do ƀòn Huê rơp gơbàn bè lơi”.

Cih dờp mờ đơs niam ală jơnau đơs bơh cau tĕ khà dê, mpồl kwang bàng Quôk hội càr Dăk Lăk neh sồr ală anih lơh broă geh gơnoar mờ kâp hơ đơm mblàng lơh loh. Mờ ală broă ndai den mpồl rơp tơrgùm, yal mờ Quôk hội, Cíñ phủ mờ ală Ƀộ, gah broă lơh dà lơgar tàm ală dơ̆ pơrjum pơn jat tai.