Mpồl kwang bàng Quôk hội càr Dăk Lăk neh bơyai lơh Pơrjum ai jơnau đơs tă pơgồp ai ală jơnau rơcang cih kờp dŭ geh Quôk hội cribơyai tàm pơrjum dơ̆ do. Tàm pơrjum, cau tĕ khà Dăk Lăk neh tă pơgồp jơnau đơs tàm uă tơngume ngan ngồn gơ rềng tus Adat Viễn thông (tam gơl); Adat phan kuơ dà (tam gơl); Adat ală ngân hàng (tam gơl); Adat atbồ, sền gàr broă lơh sền gàr dà lơgar mờ tiah ling klàng; Adat kă bro ù tiah hìu đam (tam gơl); Adat Hìu ơm (tam gơl).

Tă pơgồp jơnau đơs bè Adat kă bro ù tiah hìu đam (tam gơl), uă kwang bàng đơs là: Mờ ală jơnau cih pa, rơp lơh gơlik tơngume adat boh lam tơl làm, ndrờm bal, ring bal nàng atbồ drà kă bro ù tiah hìu đam, dong kờl, sơlơ lơh drà kă bro ù tiah hìu đam bơtàu tơnguh. Lơh gơlik bơta ƀuơn tàm broă lơh kă bro ù tiah hìu đam, gàr niam drà kă bro ù tiah hìu đam bơtàu tơnguh sùm, niam bơnĕ, loh làng, song dơpă. Bulah bè hơ̆, nàng tơnguh kơnòl, pràn jak bơh anih atbồ dà lơgar dê bè broă lơh kă bro ù tiah hìu đam den adat pal bơtơl tai tơngume jat sền broă lơh jat adat boh lam bè kă bro ù tiah hìu đam. Ồng Hoàng Trọng Hùng, Phó Kwang atbồ Sở Tư pháp càr Dăk Lăk geh jơnau đơs: “Sèng 6 bơta 87 đơs bơnah atbồ dà lơgar bè broă lơh kă bro ù tiah hìu đam den jat añ pal bơ tơl tai tơngume jat sền broă lơh jat adat boh lam bè kă bro ù tiah hìu đam. Hơ̆ là tơngume kuơmàng ngan tàm atbồ dà lơgar. Mờ tàm bơta 89 kung geh tơngume jàu Ƀộ Xây zựng in tă pơgồp jơnau đơs ai Cíñ phủ in jat sền broă lơh jat adat boh lam tàm gah kă bro ù tiah hìu đam den tàng, jat añ pal bơ tơl tơngume do”.

Đơs pơn dut pjum, Phó kwang atbồ Mpồl kwang bàng lơh broă sùm, drơng broă Mpồl kwang bàng Quôk hội càr Dăk Lăk mò Lê Thị Thanh Xuân neh cih dờp, đơs niam ală jơnau đơs tă pơgồp bơh ală kwang bàng dê gơ wèt mờ ală jơnau rơcang cih adat boh lam. Mờ kung kơp kờñ ală kwang bàng pơn jat tai kơlôi sơnơng mờ geh tai ală jơnau đơs mờ sră nggal pơyua Mpồl kwang bàng Quôk hội càr cih dờp, tơrgùm nàng yal tàm pơrjum dơ̆ 5.

Kung tàm poh lài, Mpồl kwang bàng Quôk hội càr Kon Tum pơgồp bal mờ Ƀan Thường trựk Ủy ƀan Mặt trận dà lơgar Việt Nam càr Kon Tum mờ Ƀan Thường vụ Liên đoàn Lao động càr bơyai lơh Pơrjum tìp mat mìng dùl tơngume mờ mờr 100 nă cau tĕ khà là kông ñân lơh broă tàm càr.

Tàm pơrjum, cau tĕ khà là kông ñân lơh broă càr Kon Tum neh dan mờ Mpồl kwang bàng Quôk hội càr 6 mpồl broă mờ 38 tơngume, geh: Mpồl broă sồr lơh, lam lơh broă lơh; Mpồl gah lơh sa suơn sre, brê bơnơm; Mpồl lơh sa kă bro; Mpồl gah lơh sơnơm; Mpồl gah bơto bơtê mờ bơsram mờ Mpồl broă lơh, gàr lơngăp lơngai rài kis mpồl bơtiàn.

Yal mờ cau tĕ khà, ồng Phạm Đình Thanh, Phó Kwang atbồ Mpồl lơh broă sùm Mpồl kwang bàng Quôk hội càr Kon Tum pà git, ală broă mờ cau tĕ khà là kông ñân cau lơh broă tàm càr dan mờ Mpồl kwang bàng Quôk hội càr neh đơs wil tơl tus Cíñ phủ, Quôk hội mờ ală Ƀộ, Gah broă lơh dà lơgar geh gơ rềng. Mùl màl bè broă dong kờl gơ wèt mờ viên chức, cau lơh broă tàm ală Mpồl atbồ sền gàr brê; broă dong kờl gơ wèt mờ y ƀák sỹ, ngan là tàm ală tŭ tơngai lam lơh broă lơh rơcang sơndră kòp bơtờp… Nàng jơh ală jơnau đơs, jơnau dan bơh cau tĕ khà dê là kông ñân lơh broă tàm càr ndrờm geh iat, geh bơsong lơm. Ồng Phạm Đình Thanh sồr: “Mpồl kwang bàng Quôk hội càr sồr Ƀan Thường vụ Liên đoàn Lao động càr kờp sền ală jơnau dan mùl màl gơ wèt mờ tơl tơngume, hơ̆ là tàm 38 tơngume do den pơn jat tai kờp sền mờ pal geh jơnau dan mùl màl, ờ cih ndrờm bal. Tài cih ndrờm bal den kal ke ngan ai anih lơh broă dà lơgar in bơsong mờ hơ. Ală tơngume gơ wèt kơnòl hơ bơh anih lơh broă dà lơgar tàm kâp dà lơgar dê den bol hi rơp tơrgùm jơh, pơyua jơnau dan mờ Ủy ƀan Thường vụ Quôk hội”.

Tàm ală dơ̆ tìp mat cau tĕ khà, Mpồl kwang bàng Quôk hội ală càr tàm tiah Tây Nguyên neh yal broă rơndap lơh pơrjum dơ̆ 5, Quôk hội khoă XV; mờ kung cih dờp ală jơnau đơs, jơnau dan bơh cau tĕ khà dê nàng tơrgùm, yal tus anih lơh broă geh gơnoar ală jơnau đơs, jơnau dan bơh cau tĕ khà dê gơ wèt gơnăp gơnoar bơsong jat jơnau sồr.

Kwang gơnoar cih Quôk hội, Củ ñiệm Cơldŭ lơh broă Quôk hội ồng Bùi Văn Cường pà git, pơrjum dơ̆ 5, Quôk hội khoă XV mut pơrjum tàm ngai do (22/5); tơn jơh tàm ngai 20/6/2023 (rơcang lài tus ngai 21/6/2023). Kờp dŭ, tŭ tơngai Quôk hội lơh broă tàm pơrjum do là 22 ngai. Broă lơh rơcang tơngume pơrjum neh geh ală anih lơh broă geh gơ rềng lam lơh jal mhar nàng gàr bơta niam, tơngai hơ pơrgon, di tŭ drơng pơrjum in.