Poh lài, Mpồl cau ala mat Quôk hội càr Dăk Lăk neh geh dơ̆ tìp mat cau tĕ khà tàm ală kơnhoàl: Krông Păk, Cư Mgar, Ea Súp mờ Buôn Đôn. Lài mờ pơrjum dơ̆ 9, Quôk hội khoă XV mờ tŭ tơngai jal mhar bơh broă rơndap tap sèng wơl mpồl lơh broă sră pơ àr gơnoar ătbồ dê, dùl tàm ală bơta kơp gơn ngan rlau jơh mờ cau tĕ khà đơs là rơwah di kwang bàng tàm ală gơnoar broă pa.

Tàm ală anih tìp mat, uă cau tĕ khà ai tơnggŏ bơta ring bal mờ jơnau sồr rơndap tap sèng tơrmù dipal mpồl lơh broă sră pơ àr gơnoar ătbồ dê, mơya kung sồr broă rơndap kwang bàng pal sền gròi tus pràn jak, nùs nhơm mờ bơta jơh nùs mờ làng bol. Ồng Nguyễn Duy Thành, cau tĕ khà tàm thôn 14, sàh Ea Kly, kơnhoàl Krông Pắk geh jơnau đơs: “Tơrmù dipal mpồl lơh broă bơh dà lơgar tus ƀòn lơgar den làng bol bol hi kờñ mờ dùl nùs bal ngan. Den tàng dơ̆ do bol hi dan mờ Quôk hội, dan mờ Đảng bol he pal kràñ cê, jơh nùs nàng ai ală cau geh nùs nhơm niam, geh pràn jak, geh bơngă pin dờn, geh bơta gĭt wă nàng drơng broă làng bol in. Kơrhia dơ̆ rơndap tap sèng wơl do geh ală cau ờ geh tơl nùs nhơm niam, ờ geh pràn jak den ơm wơl, ai ală cau geh pràn jak, geh nùs nhơm niam den rê wơl tàm ƀòn lơgar”.

Gơ rềng tus broă sền gàr lơngăp lơngai rài kis mpồl bơtiàn, cau tĕ khà đơs, kung gam ală hìu bơnhă rƀah, hìu bơnhă geh rài kis kal ke ơm tàm ală hìu ing, hiù ồm sèt ñhat dà mìu mơya kung ờ hềt geh dờp broă dong kờl bơh dà lơgar dê sơl. Cau tĕ khà Thân Ngọc Duyến ơm tàm thôn Phước Hòa 1, xã Ea Quang, kơnhoàl Krông Pắk đơs: “Tàm sàh añ dê geh dùl nă cau ling yau tŭ do gam gơtìp gơ drồl mhàm tơngoh, 2 nă kòn den ờ ngac ngar, ờ geh hìu ơm. Bol hi là cau ling yau neh yal mờ Anih duh broă làng bol den Anih duh broă làng bol đơs là kơnhoàl lơh nền ring bal ai Ea Quang in 9 nơm hìu, ờ gơtùi bơ tơl tai. Tŭ do, cau ling yau sàh bol hi dê hòi jà lơh jơh bơnàng hìu rau. Bè hơ̆ den kung yal mờ cau ala mat Quôk hội là hìu bơnhă cau do geh lơh hìu halà ờ”.

Ală jơnau đơs, jơnau dan bơh cau tĕ khà dê neh geh Mpồl cau ala mat Quôk hội mờ kwang đơng làm bồ ală Sờh, gah broă lơh mờ kwang đơng lam bồ Anih duh broă làng bol ală kơnhoàl hơ tơn. Gơ wèt mờ ală jơnau đơs, jơnau dan sơrlèt rlau gơnăp gơnoar bơsong den Mpồl cau ala mat Quôk hội càr Dăk Lăk hơ pơrgon rơp pơyua tus ală anih lơh broă geh gơnoar in sền sơ wì, mờ kung rơp jat sền broă bơsong nàng gàr gơnoar kuơ dipal bơh làng bol dê.

Tàm tŭ hơ̆, tàm càr Lâm Đồng, Phó Củ tịc Quôk hội ồng Nguyễn Đức Hải bal mờ mpồl cau ala mat neh lơh broă mờ càr mờ Viện kơlôi sơnơng hạt ñân Dà Làc bè broă lơh jat Jơnau neh lơh nền tàm pơrjum sồ 57 bơh Ƀộ Cíñ trị dê mờ Jơnau neh lơh nền tàm pơrjum sồ 193 bơh Quôk hội dê, nàng kờñ lơh gơlik bơta tam gơl pràn tàm ngui jak chài măi mok mờ tam gơl sồ.

Phó Củ tịc Quôk hội đơs nền, broă lam lơh tơrlòng lài gùng dà, broă lơh krơi is pal lơh jat bơta geh ngan, gàr niam bơta ring bal, geh cồng nha, pleh ờ loh làng mờ ờ ngan ngồn. Lâm Đồng kung geh sồr mhar lơh tiah tờm tam gơl pa bơceh lơh, lơh li la priă jền, lơh gơlik bơnàng jă ai bơtàu tơnguh jak chài măi mok càr in. Phó Củ tịc Quôk hội ồng Nguyễn Đức Hải pà git:“Pa do, Mpồl đơng lam geh dùl jơnau pơlam mùl màl ngan tus ală tiah mờ nùs nhơm bal là kwang đơng lam bồ dờng ngan rlau jơh tàm càr pal sồr lơh tơn. Tơngume pal ngan ngồn, geh jơnau kờñ, geh jàu kơnòl broă loh làng. Bol he lơh bè lơi nàng geh gùng dà broă lơh ai cau kơlôi sơnơng jak chài in, geh gùng dà broă lơh li la ală bơnah priă jền nàng lơh broă mờ gùng dà broă lơh bè bơcri priă rơp là broă geh lơh lài. Bè hơ̆ den Lâm Đồng pal geh tiah tờm tam gơl pa bơceh lơh is bè broă do halà ờ? Kơnòl den bol hi rơp kơlôi sơnơng, tơrgùm wơl nàng yal”.

Nàng pơn jat tai lơh jat geh cồng nha ală jơnau neh lơh nền tàm pơrjum do, Phó Củ tịc Quôk hội ồng Nguyễn Đức Hải sồr càr Lâm Đồng pal lơh jat ală tơngume sồr lơh bơh dà lơgar dê, gàr bơta jŏ jòng, tơrgùm jơh ală bơta, tơl làm, ring bal, ndrờm bal mờ cèng bơta ngan ngồn dipal mờ bơta krơi is bơh càr dê. Pleh cih wơl jơnau neh lơh nền tàm pơrjum lơh broă rơndap lơh cèng bơta ờ loh làng, ờ gơtùi lơh ngan ngồn. Mờ kung pal tơnguh kơnòl broă, ngan là kơnòl bơh cau lam bồ dê tàm broă đơng lam bồ, sồr lam lơh jat, sền sơ wì broă lơh jăt kơnòl broă, pal loh làng, song dơpă, geh cồng nha mờ lam lơh ngan ngồn. Ờ lời sơmờm broă dong kờl, hoàc huơr, pơhì pơhà.

Di dơ̆ do, Phó Củ tịc Quôk hội ồng Nguyễn Đức Hải mờ mpồl cau ala mat neh lòt còp, pà phan 2 hìu bơnhă dờp bơta dong kờl mpồl bơtiàn dê geh pơn rơ tàm kơnhoàl Đức Trọng, càr Lâm Đồng sồr gơnoar atbồ càr, ală kâp, ală gah pơn jat tai sền gròi rlau tai tus rài kis ală hìu bơnhă dờp bơta dong kờl mpồl bơtiàn dê mờ cau geh màng mờ dà lơgar tàm càr in.