Tàm bơcri priă dà lơgar, ală kwang bàng Quôk hội kung tơngkah broă ai priă bơcri ờ hềt lơh jat jơnau sồr tàm 3 broă lơh jơnau kờñ dà lơgar, ngan là gơwèt mờ broă lơh pa bè bơtàu tơnguh lơh sa- mpồl bơtiàn tiah làng bol jơi bơtiàn dùl êt nă cau mờ tiah kơh bơnơm. Bal mờ tàm broă lơh neh geh lam lơh jŏ tơngai là bơt bơtàu ƀòn lơgar pa mờ tơrmù rƀah kơ̆ kơljap, kung gam uă kòl yan ờ hềt geh bơsong niam. Kwang bàng Đinh Ngọc Quý, Ủy viên thường trựk Ủy ƀan mpồl bơtiàn bơh Quôk hội dê tơngkah: “Ală jơnau kờñ bè pơgồp bal gam kal ke, kòl yan mờ Thủ tướng Cíñ phủ neh pal ai tơlik Jơnau sồr tă bơsong rlau 400 bơta kòl yan, tus tŭ do den ală Ƀộ, gah broă lơh dà lơgar kung neh geh jơnau hơ. Bulah bè hơ̆, broă tam gơl Nghị địñ gơ rềng tus broă lam lơh jat, đơng pơlam broă lơh jơnau kờñ do ờ hềt geh ai tơlik di tŭ mờ Cíñ phủ gam tàm tŭ tơngai lơh sir. Kơp kơnờm tàm tơngai tus, Cíñ phủ rơp di tŭ tơnguh mhar tơngai lam lơh broă do, nàng ờ mìng dong ală Ƀộ, gah broă lơh dà lơgar mờ gam dong ală càr, ƀòn dờng gơtùi tă bơsong sơl, kuơmàng là broă lam lơh jat ndrờm bal tàm kâp kơnhoàl, kâp xã”.

Mò Nguyễn Thị Hải, ơm tàm thôn Phú Vinh, xã Ia Băng, kơnhoàl Chư Prông, càr Gia Lai đơs là, tàm ală nam do, broă lam lơh ală broă lơh jơnau kờñ dà lơgar tàm tiah sar lơgar ngài bơh càr Gia Lai dê ờ hềt geh bơta gơn kơnờm. Tàm hơ̆, kuơmàng ngan rlau jơh là pal bơcri priă lơh phan bơna gùng lòt nàng pơgồp bơnah tơnguh rài kis, sơlơ tơnguh broă kă bro bơtàu tơnguh tàm ală tiah kal ke: “Añ gŏ là tàm ală tiah sar lơgar ngài den kờñ pal bơcri ởiă uă, kuơmàng rlau jơh là bơta bơcri priă bè lơh phan bơna gùng lòt, tài hơ̆ kung là dùl tàm ală bơta kòn yal lơh gơbàn bơta kơnòm bơsram ơm rlô bơsram uă, làng bol lòt rê kal ke, kă bro phan bơna kung kal ke, uă tŭ lơh gơs phan bơna mơya ờ gơtùi cèng tus anih blơi di tŭ”.

Cau tĕ khà càr Dăk Lăk sền gròi tus broă lơh dong kờl mpồl lơh sa kă bro dềt mờ di mơ tàm bơta gơmù lơh sa tŭ do. Dăk Lăk tŭ do geh mờr 13 rbô 500 mpồl lơh sa kă bro gam lơh broă, tàm hơ̆ mpồl lơh sa kă bro dềt mờ di mơ geh 97,5% tàm khà kờp jơh mpồl lơh sa kă bro tàm càr. Tơngai lài, 2, 3 broă lơh dong kờl neh geh ngui niam pơgồp bơnah gơ rềng tus ală mpồl lơh sa kă bro dềt mờ di mơ. Bulah bè hơ̆, uă cau tĕ khà đơs là, mùl màl mpồl lơh sa kă bro kung gam gơtìp ală kal ke, ngan là tàm broă càn priă bơtàu tơnguh mpồl lơh sa kă bro tŭ 2, 3 Ƀộ, gah broă lơh dà lơgar geh gơ rềng ờ hềt geh Thông tư pơlam mùl màl, lơh gơbàn tus bơta kwi kuơ tŭ lam lơh jat, ngan là gơ wèt mờ ală mpồl lơh sa kă bro lơh broă tàm gah lơh sa suơn sre. Mò Nguyễn Thị Hường, cau tĕ khà tàm ƀòn dờng Buôn Ma Thuột, càr Dăk Lăk geh jơnau dan: “Dà lơgar pal geh ală broă lơh dong kờl lài ai mpồl lơh sa kă bro lơh broă tàm gah lơh sa suơn sre in. Lài do den ală broă lơh ngui ai broă lơh sa suơn sre hợp ták xã in den neh lơh broă niam, tŭ do pal geh tai ală broă dong kờl ai ală mpồl lơh sa kă bro lơh broă tàm gah lơh sa suơn sre di mơ mờ dềt in, pơn yơu bè dong kờl ai càn priă mờ ală broă lơh dong kờl lài ai bơta krơi is bơh gah lơh sa suơn sre dê in. Tàm pơrjum dơ̆ do den mpồl lơh sa kă bro kơp kờñ ngan Quôk hội cribơyai tai bè ală broă do”.

Kuơmàng là sơlơ tơnguh cồng nha ală broă lơh bơtàu tơnguh wơl mờ chồl pràn gơguh lơh sa, ờ di là kờñ tai ală broă lơh pa. Do là jơnau đơs geh uă kwang bàng Quôk hội đơs kềng bơdìh pơrjum Quôk hội dơ̆ do.

Ală kwang bàng Quôk hội đơs nền, bơta kuơmàng là tơnguh cồng nha priă bơcri mờ kes priă neh ai nàng sơlơ tơnguh bơcri priă dà lơgar halà nàng dong kờl mpồl lơh sa kă bro sơrlèt gan kal ke tŭ do. Hơ̆ den hơ̆ sồng là broă ngui priă jền geh cồng nha ngan rlau jơh nàng tơnguh mhar bơta bơtàu tơnguh wơl lơh sa mờ sơlơ chồl pràn gơguh lơh sa. Den tàng ồng Phan Đức Hiếu, Ủy viên Thường trựk Ủy ƀan lơh sa bơh Quôk hội dê ai tơlik jơnau sồr gơ wèt mờ jơnau đơs bơh Cíñ phủ dê bè pơn jat tai lam lơh broă lơh tơrmù 2% priă dia gơguh uă (VAT): “Lam lơh broă lơh tơrmù priă dia gơguh uă tàm tơngai pa do kung gơlik geh uă bơta kwi kuơ, tàm hơ̆ geh bal kal ke tus anih atbồ mờ mpồl lơh sa kă bro tàm broă lơh jat, bè tam gơl mpồl kờp dŭ tơn jơh tă dơ̆ ngui halà ală jơnau lùp bè tac bro lài mờ tơngai mơya sră cih tac phan tơnơ̆ tơngai geh ai gơtùi halà ờ. Den dơ̆ do kơp kờñ ai mờng chài bơh dơ̆ lài, nàng dong kờl mờ geh jơnau pơlam nàng dilah Quôk hội ring bal ai tơrmù priă dia VAT do den geh lam lơh jat ngan ngồn mơya ờ gơbàn kal ke, kwi kuơ. Gơtìp kal ke, kwi kuơ hơ̆ là cồng nha lam lơh broă dong kờl neh gơmù”.