Broă ròng iar, ơda ting tàm suơn hìu nhă mò A Lăng Trí, kis tàm thôn Đắc Ốc, xã La Dê, kơnhoàl Nam Giang, càr Quảng Nam geh kwang bàng, cau ling gơwèt pôs ling sền gàr mpồng nhàr dà lơgar Nam Giang bơto sồr ròng bơh nam 2018 tus tŭ do. Kơnờm mờ broă geh bơto sồr ală kỹ thuật sền gàr tơnơ̆ mờ ală dơ̆ ròng, mò Trí geh di pơgăp 3 tơlăk đong mờ gơs broă lơh geh priă kơl jăp ai hìu nhă in: “Hìu nhă ngai sơlơ kơl jăp rơlao, tàm do cau ling bal mờ Ủy ƀan geh pơgồp bal lam sồr bè broă bơ̆t bơtàu broă lơh gơwèt mờ làng bol, ngai sơlơ lơh geh uă”.

Tơngai do, pôs ling sền gàr tiah nhàr dà lơgar mpồng nhàr dà lơgar Nam Giang neh pơgồp bal mờ kấp ủy, gơnoar atbồ xã La Dê lơh pràn broă lam sồr, tơn wèt gùng dà làng bol in tơrgùm tàm broă tơnguh bơtàu lơh sa. Tus tŭ do, broă tam prìt tàm 2 thôn Kông Tơ Rơn mờ Đắc Pênh neh geh 30 hìu làng bol tus bal. Jăt Đại úy Nguyễn Minh Vương, cíñ trị viên, phó kwang atbồ pôs ling sền gàr mpồng nhàr dà lơgar Nam Giang yal: “Tàm tơngai pa do den kwang bàng cau ling tàm pôs ling sền gàr tiah nhàr dà lơgar neh bơyai lơh ală broă lơh nàng dong kờl làng bol mờ tus dong kờl tơn làng bol lơh ală broă lơh bè tơnguh bơtàu lơh sa tàm tiah nhàr dà lơgar, lam sồr ală cau geh nùs nhơm niam, dong kờl rài kis broă lơh sa ai ală hìu làng bol, Mpồl làng bol lơh broă sa, Mpồl cau ùr, tàm tơngai pa do den jơnau git wă bơh làng bol kis tàm tiah nhàr dà lơgar geh gơguh uă rơlao tàm broă tơnguh bơtàu is lơh sa tàm tơl hìu dê”.

Mờ broă dong kờl pràn bơh cau ling sền gàr tiah nhàr dà lơgar, rài kis làng bol tàm tiah nhàr dà lơgar geh ngai sơlơ lơngăp lơngai, hờm ram mờ broă lơh bal đah ling klàng bal mờ làng bol ngai sơlơ đềt mềr kơl jăp rơlao. Trung tá Đỗ Hoành Minh, Củ ñiệm cíñ trị mpồl ling sền gàr tiah nhàr dà lơgar càr Quảng Nam pà git: “Bè broă tơnguh bơtàu lơh sa, bơta chài rơgơi mpồl bơtiàn den kung geh ală broă lơh geh cồng nha, pơgồp bal bơnah tơnguh uă rài kis, tơnguh broă lơh sa bè ală broă ròng ơda siam deh kòn ha là tam tờm đẳng sâm tàm xã Ga Ri, xã Trà Ơn kơnhoàl Nam Giang, broă ròng kơnrồ deh kòn tàm xã Chơ Chun, kơnhoàl Nam Giang mờ uă broă lơh ndai nàng tam pà bal mờ ală kal ke tus mờ làng bol, bơh ală broă lơh mùl màl hơ̆ neh lơh đềt mềr nùs nhơm tam klăc bal cau ling bal mờ làng bol, ai geh bơta pràn tơrgùm bal tàm broă sền gàr gơnoar tờm ù tiah, bơta lơngăp lơngai dà lơgar”

Nàng tơnguh bơtàu lơh sa ai làng bol tiah nhàr dà lơgar, Anih bơto pơlam broă lơh sa suơn sre càr Quảng Trị neh lơh jăt broă lơh sa suơn sre brê bơnơm pơgồp bal tàm thôn Cheeng, xã Hướng Phùng, kơnhoàl Hướng Hoá mờ bă ù 2 lồ 2 sào. Broă tam pa geh lơh bơh nhai 8 nam 2021, tàm hơ̆ geh 3 hìu làng bol tus bal, lài ngan neh lơh geh cồng nha.

Cau ngui sa tus bal ngai chờ "Pơn yờ să phan geh lơh bơh broă lơh sa càr Quảng trị" - Rùp bơh ƀăo Quảng Trị

Mờ broă lơh sa suơn sre brê bơnơm pơgồp bal, ală sơntìl phan tam ai geh tàm broă lơh do là tờm lát hoa, tờm ƀơ 034, tờm sầu riêng, tờm pơnăt thái, tờm điñ lăng. Nàng lơh broă broă lơh do, kwang bàng kỹ thuật neh bơto sồr kỹ thuật pŏ ù tơl ală bơta, rơsìh vôi mờ sih phơng vi sinh, pơgồp bal sih tai phơng lân mờ phơng rơpu, kơnrồ nàng tam phan di jăt mờ kỹ thuật. Jăt bi Văn Ngọc Khánh, kis tàm thôn Cheeng, xã Hướng Phùng, kơnhoàl Hướng Hoá, càr Quảng Trị đơs: “Tàm broă lơh jăt ai añ lơh den añ gŏ là tơnguh bơtàu niam, añ kung kơnờm mờ anih dong kờl ai bè tuh dà, phơng sih, sền gàr tờm bè hơ̆. Geh ờ uă hìu ndai den añ gŏ lơh geh cồng nha rơlao”.

Tơnơ̆ mờ 1 nam lơh jăt broă lơh do, neh ai gŏ loh làng broă gơdờp uă, khà kis kung bè hòn gơs pràn niam. Ală bơta tờm ƀơ 034, pơnăt thái, lát hoa geh hòn gơs niam, khà kis uă rơlao 95%, tờm gam tàm tơngai lì ntê. Tŭ do kwang bàng kỹ thuật pơn jăt tai đơng lam ală hìu làng bol lơh ală broă sơnka sền gàr, sơndră mờ tu, kòp gơlik geh lơh aniai. Ồng Phan Ngọc Đồng, Phó kwang atbồ Anih bơto pơlam broă lơh sa suơn sre càr Quảng Trị pà git: “Bơh broă lơh nàng tơnguh uă bơta kwơ tàm dùl bă ù geh ngui, tàm tơngai tus, bol añ geh pơn jăt tai lơh jăt ală broă lơh bè do tàm ală xã ndai tai mờ bơh broă lơh do geh ngui dùl bơnah nàng bơto sồr làng bol wèt tus dùl broă tam phan kơl jăp mờ tơnguh uă bơta kwơ ngui ù ai làng bol in kung bè là gàr kơl jăp rài kis”.

Broă lơh jăt broă lơh sa suơn sre brê bơnơm pơgồp bal mờ bơta geh uă bè phan geh lơh ai tơnhào geh tàm uă tŭ krơi is geh cèng wơl cồng nha bal mờ priă geh uă ai hìu làng bol lơh broă sa in. Bơdìh hơ̆ tai, wèt broă tam phan kơl jăp tàm bă ù kơh bơh broă lơh sa suơn sre brê bơnơm pơgồp bal geh kwơ màng ngan gơwèt mờ ală tiah dòr bơnơm dê. Tàm bơta tam gơl trồ tiah ngai sơlơ geh uă bè tŭ do, den broă lơh sa suơn sre brê bơnơm pơgồp bal là broă tơnguh bơtàu geh bơta kơl jăp.