Dùl broă lơh làm uă neh geh Mpồl tam klac cau ùr kơnhoàl Thuận Châu (yau) pơgồp bal nền nòn ngan mờ Gah lơh sơnơm càr Sơn La lam lơh tàm làm gùt 23 sàh uă kal ke. Mờ jơnau đơs “Mblàng yal jơnau lòt lài, dong kờl lòt tơnơ̆”, ală kwang bàng mpồl mờ gah lơh sơnơm neh tus tơl thôn ƀòn, kơ̆ dơn hòi jà, tam gơl mờng kwèng kơlôi sơnơng, broă lơh. Mò Lường Thị Thanh Thủy, Phó Ƀí thư Đảng ủy sàh Thuận Châu, Củ tịc Mpồl tam klac cau ùr kơnhoàl Thuận Châu (yau) lài do pà git, bơnah broă dong kờl deh dùh lơngăp lơngai kờñ wèt tus kwang bàng mpồl, cau tàm mpồl cau ùr mờ kuơmàng là ală cau ùr jơi bơtiàn dồ êt nă cau là cau dờp kuơ tơn bơh broă dong kờl do. Kơnờm bơh hơ̆, khà oh mi cau ùr jơi bơtiàn dồ êt nă cau geh dờp kuơ bơh broă lơh dong kờl do là uă ngan kờp bơh nam 2021: “Tàm tơngai dơ̆ 1 bơh nam 2021 tus nam 2025, Thuận Châu neh lam lơh ngan ngồn ală tơngume dong kờl deh dùh tus ală mpồl kâp hơ đơm. Den tàng, oh mi cau ùr jơi bơtiàn dồ êt nă cau geh dờp kuơ bơh broă dong kờl deh dùh lơngăp lơngai do là uă ngan”.

Nàng dong lơh geh cồng nha, Mpồl tam klac cau ùr kơnhoàl Thuận Châu (yau) neh pờ ơdŭ bơto pơlam tơnguh pràn jak. Cau tus bal là kwang bàng cau ùr mờ kwang bàng hìu sơnơm sàh, ală cau drơng lơh tơn broă dong kờl tàm ƀòn lơgar. Mpồl kung ngui jơh bơnah priă jền bơh broă dong kờl dê nàng tă dong kờl ai ală cau mè jơi bơtiàn dồ êt nă cau in deh kòn lơngăp lơngai tàm ală hìu sơnơm dà lơgar.

Kung jat mò Lường Thị Thanh Thủy pà git, bơh nam 2021 tus jơh nam 2024, kơnhoàl Thuận Châu (yau) neh dong kờl rlau 1 rbô 600 nă cau ùr jơi bơtiàn dồ êt nă cau in bè deh dùh lơngăp lơngai. Kờp jơh khà priă tă dong kờl ală cau mè in gơguh tus rlau 2 tơmàn 400 tơlak đong. Do là dùl tàm ală tiah geh khà cau mè jơi bơtiàn dồ êt nă cau geh dong kờl deh dùh uă ngan rlau jơh càr Sơn Lan: “Lài mờ tŭ lam lơh broă dong kờl do (hơ̆ là lài mờ nam 2021), khà cau ùr jơi bơtiàn dồ êt nă cau lòt kham bun jat tơngai pơrgon mờ deh kòn tàm hìu sơnơm gam dồ êt, mìng geh mờr 600 nă cau mè pah nam. Bulah bè hơ̆, mìng tơnơ̆ 3 nam lam lơh, rlau 1 rbô nă cau ùr neh geh dờp broă dong kờl mờ lòt deh kòn tàm hìu sơnơm. Kơnờm bơh hơ̆, bơta niam sền gàr pràn kơldang să jan cau mè mờ kơnòm dềt neh geh tam gơl loh làng ngan, khà cau mè chơt să tŭ deh kòn gơmù uă ngan, khà kòn se pa deh chơt tŭ deh kung gơmù uă sơl”.

Ală cồng nha niam do là bơnàng jă kuơmàng ngan nàng Mpồl tam klac cau ùr Thuận Châu dan mờ dà lơgar, càr mờ ală gah lơh broă geh gơnoar pơn jat tai lam lơh broă dong kờl do tàm tơngai dơ̆ 2, bơh nam 2026 tus nam 2030 nàng kờñ pơn jat tai dong kờl cau ùr jơi bơtiàn dồ êt nă cau tàm ƀòn lơgar in. Mờ mờr 2 tơmàn 500 tơlak đong geh ai, rlau 1 rbô nă cau ùr tàm Thuận Châu neh geh dong kờl tơn, rlau 1 rbô nă oh dềt geh deh lơngăp lơngai, rlau 1 rbô nă cau mè geh sền gròi wil tơl. Bi Lò Thị Hồng, dùl nă cau ùr kòn cau Thái yal: “Lài do bol hi rơngòt ngan lòt hìu sơnơm sàh, ờ geh priă tai. Tŭ do geh kwang bàng tus tàm hìu hòi jà, lam sồr, gam geh dong kờl priă sa, priă lòt rê, bol hi iang nùs ngan. Kòn he dê deh pràn kơldang là bơta chờ hờp ngan rlau jơh”.

Rơndap broă lơh sồ 8 ờ mìng cèng wơl priă jền rê tus mờ tiah kal ke, mờ kuơmàng rlau là neh cèng bồ tơngoh wă wờng, tam gơl jơnau git wă mờ jàu pà bơta lơngăp lơngai ai ală cau mè tiah kơh bơnơm in, pơgồp bơnah bơt bơtàu dùl rơnàng tơnơ̆ do pràn kơldang mờ ring bal rlau.