Mpồl sok sền, jat sền broă lơh tĕ khà cau ala mat Quôk hội khoă XVI mờ cau ala mat Mpồl duh broă làng bol ală kâp bơh Đại tướng ồng Lương Tam Quang, Kwang geh jơng Ƀộ Cíñ trị, Ƀộ trưởng Ƀộ Kwang àng lơh Kwang lam bồ mpồl pa geh dơ̆ lơh broă mờ Anih duh broă ƀòn dờng Huế. Đại tướng ồng Lương Tam Quang cih dờp, đơs niam bơta rơcang lài bơh ƀòn dờng Huế dê tàm broă lơh rơcang tĕ khà. Mờ kung sồr ƀòn dờng Huế pơn jat tai pơlam lơh jat nền nòn jơnau sồr lơh bơh dà lơgar dê, is ồn sền gròi tus broă gàr niam lơngăp lơngai cíñ trị, rơndap tap sèng ring lơngai mpồl bơtiàn, ờ do ờ dă yal tơnggit jơnau mờ lơngăp lơngai jơh ală bơta ai tŭ tơngai tĕ khà in, ờ lời gơtìp rơmơp ndơl, nisơna tàm tơl broă gơlik geh: “Broă lơh rơcang bơyai lơh tĕ khà bơh ƀòn dờng Huế dê neh geh lam lơh tơl làm, jơh nùs, wil tơl, di tŭ lơh geh bàr pe cồng nha pơn rơ ngan. Lài ngan là broă lơh đơng lam, sồr lơh dơ̆ tĕ khà neh geh lam lơh bơh gờñ mờ nùs nhơm jal mhar, jơh nùs, sền bal là gàr di tŭ tơngai jat broă rơndap lơh, di jơnau sồr, broă rơndap lơh sồr gàr di tŭ tơngai hơ pơrgon làng bol lơh tờm, song dơpă. Neh bơyai lơh geh cồng nha pơrjum cribơyai dơ̆ 1, ring bal bè rơndap tap sèng, mpồl cau, khà kwang bàng yal tơnggit tơlik mat tĕ khà cau ala mat Quôk hội, cau ala mat Mpồl duh broă Làng bol ală kâp. Broă bơyai lơh pơrjum cribơyai dơ̆ 2 neh geh rơcang nền nòn ngan”.

Tàm càr Dăk Lăk, Anih duh broă tĕ khà càr kung pa bơyai lơh dar pơrjum dơ̆ 5, tơrgùm lam lơh ndrờm bal uă kơnòl broă tờm, gàr di tŭ tơngai hơ pơrgon mờ ală bơta pal geh ai dơ̆ tĕ khà cau ala mat Quôk hội khoă XVI mờ cau ala mat Mpồl duh broă làng bol ală kâp, tơngai lơh broă bơh nam 2026 tus nam 2031 in geh lơh làng bol lơh tờm, di adat boh lam mờ niam ờdo ờdă.

Jat jơnau yal bơh Anih duh broă tĕ khà càr Dăk Lăk dê, tus tŭ do, broă lơh rơcang tĕ khà tàm càr neh lơh geh uă cồng nha niam. Mpồl sồr lơh broă rơcang tĕ khà bơyai lơh dar pơrjum dơ̆ 4, ai lơh jat ală jơnau yal pơn dut nàng sồr lơh sùm. Mpồl duh broă Làng bol càr crơng gơs 11 mpồl jat sền, lam lơh sền sơ wì tàm 102 sàh, sơnah ƀòn nàng kờñ di tŭ broă gơlik geh mờ tă bơsong bơta gơ kòl tàm ƀòn lơgar. Sờh broă dơlam is bơto pơlam mờng chài lơh broă ai rlau 15 rbô nă cau ala mat tàm 103 anih pờ tơlik tơn tàm internet in, tơrgùm tàm broă rơndap lơh cribơyai, cih mat cau tĕ khà, bơta chài kờp sră pồ. Pơrjum cribơyai dơ̆ 2 kâp càr ring bal mat ing 22 nă cau tơlik mat tĕ khà cau ala mat Quôk hội mờ 144 nă cau tơlik mat tĕ khà cau ala mat Mpồl duh broă Làng bol càr; kâp sàh dờp rlau 4 rbô 600 sră nggal, geh bàr pe nă cau tơlik mat tĕ khà is di mờ jơnau sồr.

Đơs tàm dơ̆ pơrjum, mò Cao Thị Hòa An, Kwang geh jơng Mpồl duh broă Đảng dà lơgar, Phó Ƀí thư Duh broă sùm Tỉñ ủy càr, Củ tịc Mpồl duh broă Làng bol càr, Củ tịc Mpồl duh broă tĕ khà càr Dăk Lăk đơs sùm, tơngai tus, ală mpồl kờñ pal tơrgùm lam lơh niam broă ai jơnau đơs cau tĕ khà tiah ơm kis gơ wèt mờ cau tơlik mat tĕ khà, rơcang wil tơl ai Pơrjum cribơyai dơ̆ 3 in, mờ kung sơlơ sền gàr lơngap lơngai rơndap tap sèng, lơh pràn mblàng yal mờ lơh sir phan bơna nàng dơ̆ tĕ khà in geh lơh niam ờdo ờdă, di adat boh lam, ngan ngồn là ngai chờ bơh jơh gùt làng bol dê: “Mặt trận, ală mpồl cíñ trị - mpồl bơtiàn pal tơrgùm tàm broă gròi sền ai làng bol in sa tềp dồ bă hờm ram, wil tơl, gơboh gơbài, chờ hờp mờ geh anih nhơl ñŏ niam ờdo ờdă. Jat nùs nhơm tềm pềr mờ dipal bơh sa tềp bơhià dê. Pơgồp bal tàm hơ̆ là mblàng yal bè dơ̆ tĕ khà, nàng làng bol in geh kơnòl mờ git gơnoar làng bol, kơnòl cau pồ dê. Añ sồr ală oh mi pal lơh niam broă mblàng yal chờ hờp nam pa – gờm chờ Đảng – gờm chờ dà lơgar mơya pal wèt tus ngai chờ jơh gùt làng bol bè tĕ khà”.

Tàm dar pơrjum dơ̆ 54 bơh Anih duh broă Lơh kơnòl broă sùm Quôk hội dê pa do neh sền sơ wì, ring bal Jơnau lơh nền tàm pơrjum tam gơl dơ̆ 2 rơndap tap sèng, mpồl cau, khà cau bơh anih lơh broă, mpồl bal, mpồl lơh broă tàm dà lơgar mờ ƀòn lơgar geh yal tơnggit tơlik mat tĕ khà cau ala mat Quôk hội khoă XVI. Đơs tàm dar pơrjum, Củ tịc Quôk hội ồng Trần Thanh Mẫn đơs loh: Ngai 15/3 tus do rơp bơyai lơh dơ̆ tĕ khà cau ala mat Quôk hội khoă XVI mờ cau ala mat Mpồl duh broă Làng bol ală kâp tơngai lơh broă bơh nam 2026 tus nam 2031. Bơh dơ̆ lòt sền rơcang tĕ khà tàm tiah ring dà dờng Cửu Long pa do, jat Củ tịc Quôk hội, ală ƀòn lơgar jàu kơnòl broă mùl màl, loh làng; mờ kung đơs niam Anih duh broă mặt trận dà lơgar Việt Nam neh bơyai lơh cribơyai geh cồng nha ngan dơ̆ 1, dơ̆ 2. Tàm tơngai tus, Củ tịc Quôk hội sồr, ală anih lơh broă geh gơnoar sơlơ tơnguh rlau tai broă lơh sền sơ wì, sok sền, nàng di tŭ sồr bơsong ală bơta ờ niam, ală broă gơlik geh; Mpồl duh broă tĕ khà dà lơgar tơrgùm đơng lam, sồr lam lơh bơnĕ bơnài, nền nòn. Is ồn tàm broă lơh cribơyai dơ̆ 3 mờr tus.