Jăt sră dan bè broă tơnggơs ală đảng ƀộ gơ wèt Đảng ủy Quôk hội, geh 11 đảng ƀộ gơ wèt bal, geh: Đảng ƀộ Sền swì tă ngui priă jền dà lơgar; Đảng ƀộ Cơldŭ lơh broă Quôk hội; Đảng ƀộ Mpồl duh broă Jơi bơtiàn; Đảng ƀộ Anih duh broă Kơrnoăt boh lam mờ Sền gàr adăt boh lam; Đảng ƀộ Anih duh broă Lơh sa mờ Priă jền; Đảng ƀộ Anih duh broă Sền gàr dà lơgar, Lơngăp lơngai mờ Lơh broă mờ lơgar ndai; Đảng ƀộ Anih duh broă Niam chài mờ Mpồl bơtiàn; Đảng ƀộ Anih duh broă Jak chài, Măy mŏk mờ Tiah ơm kis; Đảng ƀộ Anih duh broă Broă lơh cau ala măt; Đảng ƀộ Anih duh broă Jơnau làng bol kơ̆p kờñ mờ Jăt sền; Đảng ƀộ ală anih lơh broă tă pơgồp jơnau đơs, dong broă Đảng ủy Quôk hội.

Đơs tàm Pơrjum, Củ tịc Quôk hội ồng Trần Thanh Mẫn sồr ală Đảng ƀộ sơrbăc mhar lam lơh broă lơh jăt broă lơh tơrlòng lài pa, mpồl lơh broă pa, tàm hơ̆ geh gàr geh bơta pơn jăt tai tàm pơdờn niam kơnòl broă, cồng nha lơh broă bơh ală jơnum Đảng dê, Đảng ƀộ lài do, ờ lời gơkòl, lời wah, lời hŭi broă lơh, tơngguh uă bơta niam, cồng nha ală bơta broă lơh. Ală anih lơh broă pơgồp bal kơ̆ kơl jăp, lùp gĭt kal ke, gơkòl gơlik geh nàng thàn tă bơsong, bơsong geh cồng nha; yal kâp geh gơnăp gơnoar in sền swì, lơh nền tŭ kờñ.

Củ tịc Quôk hội tơngkah, sơrbăc mhar pồ tơl mpồl kwang bàng mpồl lơh broă tàm dơlam, tơnggơs ală ci ƀộ gơ wèt bal, geh jơnau sồr pal jăt lơh broă, jàu kơnòl broă loh làng tơl nă đảng viên tàm kâp ủy mờ bơta tàm gơrềng lơh broă mờ ală anih lơh broă geh gơrềng nàng lơh broă bơh ală đảng ƀộ dê gơtùi kơ̆ kơl jăp, geh cồng nha. Pal sùm lơh niam broă lơh cíñ trị, bồ tơngoh, jăt sền lòt sền, sền gròi broă lơh lam lơh bơh ală ci ƀộ, đảng ƀộ dê, pal pơrjum bơyai niam, duh rơngòt adăt boh lam, kơrnoăt boh kràñ cê niam bơnĕ.

Củ tịc Quôk hội tơngkah pal sền gròi tus broă lơh pơrjum ci ƀộ, ală đảng viên; priă jền, broă dong kờl gơ wèt mờ kwang bàng gơtìp lơh gơdờp, gơrềng; rơndăp kwang bàng pal song dơ pă loh làng, dipal tàm nùs nhơm “bơh broă lơh jòi rwah cau”, rwah cau jak chài ngan, cau geh bơta jak, geh nùs nhơm niam, “nùs nhơm niam broă mờng lơh jak”.

Pa do, Ƀộ Cíñ trị ai lơh jăt Jơnau đơs pơndŭt 126, tàm hơ̆ geh ală tơnggume gơrềng tus Gah Quôk hội, Củ tịc Quôk hội ồng Trần Thanh Mẫn sồr, Đảng ủy Quôk hội gờñ kơlôi sơnơng nàng tŭ Dà lơgar lơh nền tơnggume loh làng, ờ gơtìp rơmơ̆p ndơl.

“Tam gơl, bơtơl ală jơnau cih Đảng dê, kơrnoăt boh lam Dà lơgar dê, gùng dà, broă lơh gơrềng tus nàng geh cơng tàng kơrnoăt boh lam lam lơh sir broă lơh tơrlòng lài jơh ală bơta bơh ală anih lơh broă cíñ trị dê. Bè Tổng Ƀí thư ồng Tô Lâm đơs là tŭ niam dờng màng nàng rơcăng Pơrjum dờng Đảng ală kâp, wèt tus Pơrjum dờng gùt lơgar Đảng dê; pơn jăt tai rơndăp tăp sèng sơrbì kâp lơh sră pơ àr gơnoar ătbồ lơh kòn gùng; geh broă rơndăp lơh pơn jăt tai rơndăp tăp sèng kâp sàh dipal mờ broă lơh tơrlòng lài mpồl lơh broă pa; Pơlam gùng tơmŭt bal bàr pe mpồl lơh broă sră pơ àr gơnoar ătbồ kâp càr; tam gơl, bơtơl ală jơnau cih kơrnoăt boh lam dê, jơnau cih Đảng dê geh gơrềng tus tơnggume bè rơndăp tăp sèng mpồl lơh bal “geh bal sră nggal kwơmàng ngan bè digơlan tam gơl Sơnoa boh lam”, Adăt Tĕ khà…tàm tơngai tus”.

Củ tịc Quôk hội ồng Trần Thanh Mẫn kơ̆p kờñ, kâp ủy đảng bơh ală Đảng ƀộ geh tơnggơs ngai do dê pal lơh niam gơnoar broă đơng lam tơl làm, geh cồng nha tàm broă lơh jăt ală kơnòl broă cíñ trị bơh Mpồl duh broă, ală Anih duh broă, ală anih lơh broă Quôk hội dê; gàr niam ală tơnggume broă lơh pal geh kâp ủy sền swì, ai jơnau đơs lài mờ tŭ lam lơh, àm hơ̆ bơsram kơlôi sơnơng jrô ală nùs nhơm, pơn jăt tai tam gơl pa ală broă pơlam lơh kơrnoăt boh lam, pal kơrhia ngan, nền nòn, niam, lơh geh gơtùi jơnau sồr bơh rài kis mùl màl dê; tơngguh uă cồng nha jăt sền mờ đơs wơl, lơh pràn gùng dà yal lơh loh, iăt kơno jơnau đơs cau ala măt Quôk hội mờ Làng bol dê; tơngguh uă bơta niam lơh nền broă kwơmàng dà lơgar dê jăt gùng dà ngai sơlơ dipal ngan, di tŭ; kơlôi sơnơng, geh broă lơh dong kờl tam gơl sồ, tam gơl tơlir, jăt ngui măy mŏk pa, dong kờl sơnđờm mŭt lơh broă, tam gơl pa bơceh lơh.

Mờ nùs nhơm “ntoăt dang săp sèng ndang” pal lơh nền nòn, kơrhia ngan mờ mhar; rơcăng lài mơya ờ gŏ ờ rơcăng ngăc, Củ tịc Quôk hội kơ̆p gờn mờ dòn kơnờm là, jơh ală Đảng ƀộ Quôk hội đơs bal mờ tơl Đảng ƀộ gơ wèt bal đơs is rơ̆p pơgồp bal kơ̆ kơl jăp, đòm jăt nùs nhơm tam klăc, làng bol lơh tờm, kơnòl, tam gơl pa, bơceh lơh nàng pơnđơl lơh geh niam ală kơnòl broă, tă pơgồp tàm ală cồng nha bal bơh dà lơgar dê.