Bơh tŭ crơng gơs tus tŭ do, geh bơta sền gròi, kơlôi rơcang bơh kâp ủy, gơnoar atbồ ală kâp mờ làng bol tàm tiah do dê, Hìu bơsram kâp pe Phạm Hùng neh sơrlèt gan uă ngan kal ke, tam klac bal, pơn đơl pràn brồ guh, tàm pơrlòng bơto niam, bơsram jak, lơh geh uă cồng nha pal cih dờp ngan. Tŭ do mờ 40 ơdŭ bơsram, kờp jơh khà kơnòm bơsram là 1 rbô 571 nă oh.

Ala mat kwang đơng lam bồ Đảng, Dà lơgar, Củ tịc Quôk hội ồng Trần Thanh Mẫn ai lơh chờ hờp ngan tềng đap ală cồng nha pơn rơ ngan bơh hìu bơsram dê neh lơh geh tàm tơngai lài kơnờm ală broă lơh ngan, bơta pơn đơl pràn bơh ală rơnàng pơgru mờ kơnòm bơsram hìu bơsram dê; mờ kung jờng rơ gah bơto bơsram càr Vĩnh Long là bơta niam bơh tiah ring dà dờng Cửu Long dê đơs is, bơh tiah đah jum dà lơgar mờ gùt lơgar dê đơs bal.

Củ tịc Quôk hội ồng Trần Thanh Mẫn đơs nền, Đảng mờ Dà lơgar he sùm đal git bơto bơsram là broă lơh dà lơgar khà dùl, bơcri ai bơto bơsram in là bơcri ai bơtàu tơnguh in, lời ai ală bơta niam ngan rlau jơh nàng sền gròi ai broă lơh bơto bơsram in, dong kơnòm dềt tàm tàm sơnam lòt bơsram ndrờm geh lòt bơsram, ală kơnòm bơsram geh bơsram tàm bơta niam ngan rlau jơh, tơrgùm bơto bơtê cau lơh broă, ngan là cau lơh broă geh bơta niam uă, dùl tàm ală bơta kuơmàng ngan rlau jơh lơh nền tus bơta niam rài kis kòn bơnus mờ bơta bơtàu tơnguh mhar, kơ̆ kơljap bơh dà lơgar dê, ai gŏ pràn jak tàm pơrlòng mờ gơnoar broă bơh dà lơgar dê tàm kơnhoàl ù tiah lơgar rềp bal mờ dunia.

Củ tịc Quôk hội ồng Trần Thanh Mẫn đơs là, dùl nam bơsram pa neh sơn đờm mờ uă bơta chờ hờp mờ bơta lòng pa; gơl gùng 3 nam bơsram kâp pe geh gơtha dờng ngan, lơh tềl bơta dờng pràn bè tơl gah bơh kơnòm bơsram dê. Bè hơ̆ den tàng Củ tịc Quôk hội ồng Trần Thanh Mẫn kơp kờñ ală kơnòm bơsram rơp geh uă bơta chờ hờp, bơta gơn kơnờm tàm bơsram sră, ngai sơlơ lơh ngan, pơn đơl pràn pơlam tàp jat krơh wa Hồ dờng màng, krơh wa dờng Phạm Hùng bơh ƀòn tờm Vĩnh Long dê; tam klac bal, kờñ gơboh, dong kòl bal mờ gơp nàng gơguh jak; rơcang lài wil tơl jơnau git wă, bơta chài, đal git lài broă lơh mờ ală bơta kơp kờñ dờng nàng broă sơn đờm lơh broă tơnơ̆ do mờr tus in, kah ưn ngài dà kơl hề deh dùh, ròng siam mè bèp dê, dà kơl hề bơto bơtê bơh ală pơgru dê.

Củ tịc Quôk hội ồng Trần Thanh Mẫn sồr tơl nă pơgru rơp là dùl krơh niam nùs nhơm, bơsram is mờ bơceh lơh, sùm jơh nùs, geh kơnòl mờ broă lơh, jơh nùs kờñ gơboh, jơh nùs bơto bơtê kơnòm bơsram; pơgru bè mè bèp, ngan ngồn là cau mblàng wơl bơta kờñ gơboh, lơh gơlik bơta gơn kơnờm nàng ală oh kờñ bơsram sră, pơlam tàp nùs nhơm, jòi git ală ù tiah pa bơh bồ tơngoh git wă dê: “Añ pin dờn mpồl kwang bàng, cau pơgru, ală kơnòm bơsram bơh hìu bơsram dê lơh jat niam jơnau nting tơngkah bơh Tổng Ƀí thư, Củ tịc lơgar ồng Tô Lâm dê tàm sră pơyua Gah bơto bơsram in di dơ̆ mut nam bơsram pa; ngai sơlơ tam gơl pa, tơnguh cồng nha bơto bơtê mờ bơsram, lơh gơs bơta niam chài tàm hìu bơsram bềng lìu bơta niam chài krơi is bơh ù tiah cau khin cha jak chài Long Hồ, Vĩnh Long dê; pơgồp bơnah uă ngan tàm broă tơngoh bồ tơngoh bơsram sră làng bol, bơto bơtê cau lơh broă, bơto bơtê cau jak chài, dipal mờ hìu bơsram cèng mat sơnđan ƀồc Thủ tướng ồng Phạm Hùng. Nam nơsram 2024 – 2025, jơnau bơto bơsram pe kâp nam 2018 rơp pơn jat tai geh lam lơh, là nam sơn rờp lơh dơ̆ pơrlòng jơh bơsram kâp pe jat jơnau bơto bơsram pa. Añ sồr Ƀộ Bơto bơtê mờ bơsram pơn jat tai sồr lam lơh niam broă lơh bơto bơsram pe kâp pa, mhar geh jơnau pơlam, bơyai lơh bơto pơlam bè dơ̆ pơrlòng, lơh gơlik bơta niam ngan rlau jơh ai ală oh pơrlòng mờ hìu bơnhă in”.

Củ tịc Quôk hội ồng Trần Thanh Mẫn sồr ală kâp ủy Đảng, gơnoar atbồ, Mặt trận dà lơgar, ală mpồl bal, mpồl cau, ală kâp, ală gah broă lơh càr Vĩnh Long mờ kơnhoàl Long Hồ pơn jat tai sền gròi, sồr gàr tơl ală bơta pal geh bè phan bơna mờ priă jền ai bơto bơtê mờ bơsram in, sền gròi, sơlơ tơnguh mpồl cau pơgru mờ kwang bàng atbồ bơto bơsram tơl khà pơgru jat jơnau sồr; tam gơl pa pràn broă lơh bơto bơtê mờ bơsram, tơnguh cồng nha bơto bơsram tơl làm tàm ală kâp bơsram; chồl tơnguh lam lơh bơt bơtàu niam chài hìu bơsram, sơlơ tơnguh tai bơta tàm pơgồp bal đah hìu bơnhă, hìu bơsram mờ mpồl bơtiàn tàm broă bơto bơtê kơnòm bơsram.