Đơs tàm dơ̆ lơh broă, Củ tịc Quôk hội ồng Trần Thanh Mẫn pà git, tus tŭ do, Quôk hội neh lơh dùl khà broă uă ngan, hơ̆ là lơh 14 dơ̆ pơrjum, tàm hơ̆ geh bal pơrjum ờs mờng mờ ờ ờs mờng. Broă lam lơh broă rơndap lơh bơh Đảng đoàn Quôk hội, Jơnau lơh nền tàm Pơrjum dờng Đảng gùt lơgar dơ̆ 13, Jơnau pơn dut sồ 19 bơh Ƀộ Cíñ trị dê bè ai tơlik lài gùng dà, broă lơh lơh adat boh lam tơngai lơh broă Quôk hội khoă XV lơh geh cồng nha pal cih dờp ngan. Mùl màl, tàm 156 kơnòl broă lơh adat boh lam neh lơh gơs 131 kơnòl broă. Ală jơnau neh lơh nền, broă rơndap lơh bơh Đảng đoàn Quôk hội dê neh lơh rlau 81%. Cồng nha ală dơ̆ pơrjum tơnơ̆ jơnhua rlau mờ ală dơ̆ pơrjum lài, geh cau tĕ khà mờ làng bol jờng rơ ngan.

Jat Củ tịc Quôk hội ồng Trần Thanh Mẫn đơs, dơ̆ pơrjum do nàng kờñ sền sơ wì wơl ală broă neh lơh; mờ kung sền tìs di ală broă ờ hềt lơh, ală broă gam ờ hềt dipal, gam gơ kòl, ai mờng chài nàng lơh niam rlau tai.

Pà git, tơngai gam wơl, Quôk hội rơp lơh 3 dơ̆ pơrjum ờs mờng mờ 1 dơ̆ pơrjum tơn jơh tơngai lơh broă Quôk hội khoă XV, Củ tịc Quôk hội ồng Trần Thanh Mẫn đơs là, do là khà broă uă ngan. Bè hơ̆ den tàng, Củ tịc Quôk hội sồr, Mpồl duh broă Jơi bơtiàn, ală Anih duh broă bơh Quôk hội dê pal lam lơh jơh nùs nàng geh cồng nha. Kuơmàng, nam 2025, dà lơgar he geh uă broă dờng bè: Tơngkah 80 nam Kac màng nhai 8 pha lin mờ Sơn tờm dà lơgar 02/9; 50 nam tơngklàs jơh gùt tiah đah jum tơrgùm dùl dà lơgar; broă rơcang tĕ khà cau ala mat Quôk hội khoă XVI mờ Mpồl duh broă làng bol ală kâp tơngai lơh broă bơh nam 2026 tus nam 2031. Nam 2026, Quôk hội tơngkah 80 nam ngai tĕ khà pồ Quôk hội Việt Nam.

Tàm dơ̆ lơh broă, Kwang atbồ ală Anih duh broă Niam chài bơto bơsram; Anih duh broă mpồl bơtiàn; Mpồl lơh broă cau ala mat neh yal cồng nha lam lơh kơnòl broă bơh bồ tơngai lơh broă Quôk hội khoă XV tus tŭ do mờ gùng dà, kơnòl broă tờm tus lồi tơngai lơh broă.

Tơnơ̆ tŭ iat ală jơnau đơs, jơnau pơn dut tàm dơ̆ lơh broă, Củ tịc Quôk hội ồng Trần Thanh Mẫn sền wơl ală cồng nha neh lơh geh bơh ală anih duh broă dê. Tàm hơ̆, Anih duh broă Mpồl bơtiàn neh lơh gơs 10 kơnòl broă; Anih duh broă niam chài, Bơto bơsram lơh gơs 6 kơnòl broă; Mpồl lơh broă cau ala mat lơh gơs 10 kơnòl broă. Bè kơnòl broă lơh adat boh lam, Anih duh broă Mpồl bơtiàn neh lơh gơs 25 kơnòl broă; Anih duh broă Niam chài, bơto bơsram neh lơh gơs 14 kơnòl broă; Mpồl lơh broă cau ala mat neh lơh gơs 4 kơnòl broă.

Củ tịc Quôk hội kung đơs là, bulah lơh geh ală cồng nha niam, mơya kung gam ală bơta ờ niam tàm broă pơgồp bal, lơh broă rơndap lơh ờ hềt di mờ bơta geh ngan, lam lơh ờ hềt di tŭ, ờ hềt jak chài.

Củ tịc Quôk hội ồng Trần Thanh Mẫn sồr, ală Anih duh broă, Mpồl cau lơh broă ala mat jơh nùs, lơh ngan bơsong ală bơta ờ niam; gàr niam bơta tam klac bal, ring bal tàm dơlam is mpồl, sơlơ gàr ndơp ndơr jơnau tơnggit, geh kơnòl tàm jơnau đơs he dê: “Añ sồr tơrgùm tam gơl mờng kwèng lơh broă bơh Mpồl duh broă Jơi bơtiàn, ală Anih duh broă bơh Quôk hội dê; rơndap tap sèng broă jak chài, ală broă lơi tờm, kuơmàng den tơrgùm uă bơta pràn nàng lơh; rơcang lài tơngume lơh kờp dŭ lài pơrjum dơ̆ 8, pơgồp bal bơyai lơh Pơrjum cau ala mat Quôk hội mìng lơh kơnòl broă ala mat dơ̆ 6; pơn jat tai kơlôi sơnơng, mblàng lơh loh, cih dờp, tam gơl ală rơndap lơh adat boh lam, jơnau rơcang cih Jơnau lơh nền tàm pơrjum neh geh Quôk hội ai jơnau đơs tàm pơrjum dơ̆ 7 nàng yal ring bal tàm pơrjum dơ̆ 8”.

Bơdìh hơ̆ tai, Củ tịc Quôk hội kung sồr ală anih duh broă bơh Quôk hội dê pơgồp bal jat sền Cíñ phủ tàm broă lam lơh ală rơndap lơh adat boh lam, Jơnau lơh nền tàm pơrjum neh geh Quôk hội ring bal tàm ală dơ̆ pơrjum; broă lơh jat sền pal geh broă rơndap lơh bơh gờñ nàng pleh gơ tàm rơndap rơndồl tàm ală tiah; pơn jat tai lơh ală kơnòl broă jat Jơnau neh lơh nền bơyai lơh tơngkah 80 nam Ngai tĕ khà sơn rờp Quôk hội Việt Nam, khà jờng sră ƀău Diên Hồng dơ̆ 3; kờp sền tam gơl ală broă rơndap lơh, sră nggal jat gùng dà ngai sơlơ jak chài, ngan ngồn, mờng chài, geh cồng nha; kuơmàng lam lơh niam broă lơh priă nhai pa bơh nhai 7 nam 2024; sơlơ tơnguh tai broă lơh sền gàr cíñ trị tàm dơlam is.