Tŭ Củ tịc Quôk hội ồng Trần Thanh Mẫn pa tus, cau tĕ khà mờ làng bol xã Nga My, kơnhoàl Phú Bình, càr Thái Nguyên neh yal bè bơta hoàc huơr tài mìu dà tih lơh gơbàn mờ kơp kờñ geh dong kờl: “Làng bol Thái Nguyên đơs bal mờ làng bol Nga My đơs is kơp kờñ ngan dờp geh bơta dong kờl làng bol lik bơh bơta kal ke de. Bol hi geh gàr lơi lŏ sre, dồ êt den roh dồ êt, uă den roh uă, ờ gam bơta lơi nàng gơtùi tơnhàu tai”.

Ngoh rơngac ngan tềng đap bơta roh rui tài càl rbut dờng dà tih lơh aniai hìu đam, phan bơna, lŏ sre làng bol dê, Củ tịc Quôk hội ồng Trần Thanh Mẫn pơn dờm pơnđiang mờ đơs nền, gùng dà, broă lơh dong kờl bơh Đảng mờ dà lơgar dê sùm sền gròi tus rài kis làng bol dê: “Làng bol iang nùs tĕ, Đảng mờ dà lơgar, mặt trận, mpồl bal, ală gah broă lơh, ală kâp sùm sền gròi tus rài kis làng bol dê, ngan là ală làng bol geh rài kis kal ke tơnơ̆ mìu càl rbut dờng sồ 3 lơh gơbàn hoàc huơr bè phan bơna, phan tam làng bol dê. Lơh bè lơi nàng gùng dà, broă lơh dong kờl bơh Đảng, dà lơgar dê gơ wèt mờ xã là pal di tŭ gàr niam rài kis làng bol in”.

Lùp còp tơn làng bol tàm xã Nga My, tiah kung gam gơtìp ngơr bam tàm dà, Củ tịc Quôk hội ồng Trần Thanh Mẫn neh jàu 200 bơnah phan pà pơn dờm pơnđiang ală hìu bơnhă làng bol kong gơ rềng tơn bơh càl rbut dờng sồ 3 mờ mìu dà tih lơh gơbàn.

Jàu phan mờ lùp còp mpồl phàu crong tàm xã Nga My, Củ tịc Quôk hội ồng Trần Thanh Mẫn đơs: “Ală oh mi, kwang bàng,c au ling añ git là bòl glar ngan, sơrlèt gan kal ke, dong làng bol tàm do nàng bơsong jơnau gơ lời wơl tơnơ̆ càl rbut dờng sồr 3. Ngan là dà gơguh tih, ală oh mi pal ntrờn ală hìu bơnhă làng bol tus tiah lơngap lơngai. Tŭ do, añ git là 100% hìu bơnhă làng bol neh rê wơl tàm hìu. Ală oh mi pơn jat tai gàr niam rài kis làng bol dê, ngan là dong làng bol pơs wàs sàng goh tiah ơm kis”.

Yal mờ Củ tịc Quôk hội ồng Trần Thanh Mẫn, Ƀí thư Tỉñ ủy càr Thái Nguyên ồng Trịnh Việt Hùng pà git, neh geh 4 nă cau chơt; kờp dŭ hoàc huơr bè phan bơna rlau 600 tơmàn đông; rlau 25 rbô hìu bơnhă pal ntrờn dô pleh jal mhar. Bè broă lơh sa gơtìp hoàc huơr mờr 10 rbô lồ. Gơ wèt mờ ală tiah gơtìp ngơr bam, tơnơ̆ tŭ dà hoài soat pơhìn uă ngan gơlik geh ƀơ̆ tiah ơm kis, gơlik geh kòp bơ tờp. Đơs tàm dơ̆ lơh broă, Củ tịc Quôk hội ồng Trần Thanh Mẫn pà git, tềng đap bơta gơ rềng kơn jơ̆ ngan bơh càl rbut dờng sồ 3 dê, Tổng Ƀí thư, Củ tịc lơgar ồng Tô Lâm neh geh jơnau hòi jà làng bol, kwang bàng, cau ling gùt lơgar tơrgùm bơsong jơnau gơ lời wơl tàm ală càr tiah đah tô mờ càr lơgar Hà Nội.

Củ tịc Quôk hội ồng Trần Thanh Mẫn kung sồr, càr Thái Nguyên pal sền sơ wì gùng che đèng, dà ngui sa ai làng bol in; broă gàr kloh niam tiah ơm kis pal dong rơcang lài kơryan kòp bơtờp. Bè broă do, Củ tịc Quôk hội ồng Trần Thanh Mẫn tơngkah gah lơh sơnơm pal lơh broă jơh nùs nàng gàr niam pràn kơldang să jan làng bol in; pal lơh niam wơl ală hìu bơsram nàng dong jơh ală kơnòm bơsram ală kâp ndrờm geh lòt bơsram, gàr niam bơta lơngăp lơngai, cíñ trị, rơndap tap sèng lơngap lơngai mpồl bơtiàn.

Củ tịc Quôk hội ồng Trần Thanh Mẫn pà git: “Añ kơp kờñ là, bơh nùs nhơm tàm kờñ gơboh bal kòn bơnus, nha ngan glòm nha sèt, dong kờl bal, tam klac bal tàm tŭ do là kuơmàng ngan, bol he pal hòi jà jơh tàm càr mờ bơdìh càr geh priă jền bơsong jơnau gơ lời wơl tơnơ̆ càl rbut dờng sồ 3 jat nù snhơm là pal ring bal, ờ lời gơlik geh khat dùl bơta ờ niam lơi tàm broă dong kờl rơcang lài drơng mờ dà tih, càl rbut dờng. Dùl dơ̆ tai, ala mat kwang đơng lam bồ Đảng, Dà lơgar, ala mat mpồl lơh broă, añ dan pơyua tus Đảng ƀộ, gơnoar atbồ mờ làng bol càr Thái Nguyên sơrlèt gan tơl bơta kal ke, bơta lòng nàng gàr kơ̆ kơljap rài kis làng bol dê”.

Củ tịc Quôk hội ồng Trần Thanh Mẫn đơs là, càl rbut dờng lòt gan, tus dà tih mờ tŭ dà tih gơ hoài soat, jơnau gơ lời wơl là kơn jơ̆ ngan, hơ̆ là phan bơna gùng lòt gơtìp aniai, ờ diơng; hìu đam làng bol dê, hìu bơsram pal lơh niam wơl, lơh pa wơl; bơta kloh niam tiah ơm kis gơtìp gơ rềng. Nàng bơsong jơnau gơ lời wơl bơh càl rbut dờng sồ 3 dê, Củ tịc Quôk hội ồng Trần Thanh Mẫn sồr, jơh gùt anih lơh broă cíñ trị bơh càr Thái Nguyên dê bơh Tỉñ ủy, Mpồl duh broă làng bol, Anih duh broă làng bol, Mặt trận dà lơgar Việt Nam, ală mpồl cau, ală gah broă lơh, ală kâp pal lơh bal nàng bơsong, ờ gŏ di sền ờ sơp.