Đơs tàm dơ̆ tìp măt, Củ tịc Quôk hội ồng Trần Thanh Mẫn đơs niam ngan bơh bơta sền gròi, sồr lơh tơn bơh Phó Củ tịc lơgar lài do mò Trương Mỹ Hoa dê, Kes priă Priă dong kờl bơsram Vừ A Dính neh geh ală broă lơh li la, bơceh lơh mờ geh cồng nha. Uă rơndăp broă lơh gơcèng bơta jŏ jòng bơh Kes priă neh mờ gam lơh jăt, bè: Rơndăp broă “Ròng gàr rài tơnơ̆ do” ròng siam bơto bơtê rlau 600 nă kơnòm bơsram bơh ală tiah nhàr lơgar, bồt bơlào dà lềng rê bơsram sàu sa ơm bĭc tơn tàm hìu bơsram; Rơndăp broă lơh “Pờ gùng tus tơnơ̆ do” lời ai 100 nă oh ùr kơnòm bơsram jơi bơtiàn dồ êt nă cau, tiah kơh bơnơm, mờ bồt bơlào dà lềng geh rài kis kal ke in,…neh lơh geh uă jơnau lời kah niam, lơh gơrề nùs nhơm tàm dong tàm kờñ bal, pơgồp bơnah kwơmàng tàm broă lơh bơ̆t bơtàu mpồl cau lơh broă ai ală tiah jơi bơtiàn dồ êt nă cau, tiah kơh bơnơm mờ tiah bồt bơlào, dà lềng.

Củ tịc Quôk hội tơlik nùs nhơm gơlơh niam ngan mờ broă lơh bơh nam 2009 Kes priă neh ai lơh jăt Khà jờng Vừ A Dính nàng jờng rơ muh măt ală cau dồ nă să, mpồl cau geh cồng nha jak ngan, tàm: Bơsram; Kơlôi sơnơng jak chài; Niam chài đơs crih tam ya; Tàp pràn să jan; Sền gàr dà lơgar, Lơngăp lơngai; Broă lơh, mpồl bơtiàn…cèng wơl bơta kwơ ngan ngồn ai làng bol tiah kơh bơnơm mờ tiah dà lềng bồt bơlào. Gùng lòt 15 nam do, Khà jờng sùm bơtàu tơngguh, rề ơnàng; bơh 15 nă cau jak chài ngan, pơnrơ ngan mờ 05 mpồl cau chờ hờp dờp Khà jờng dơ̆ sơnrờp tus tŭ do neh geh 118 mpồl cau mờ 210 nă cau tus bơh 44 jơi bơtiàn, tàm hơ̆ geh ală jơi bơtiàn dồ êt nă cau geh dờp Khà jờng.

Củ tịc Quôk hội đơs niam ngan ală cau ala măt là kơnòm bơsram, cau bơsram dờng, ơruh pơnu, ală kwang bàng Đoàn, ală cau pơgru kơnòm să neh lơh ngan bơsram, bơsram tàp, lơh broă, bơceh lơh, lơh geh uă cồng nha, geh pà uă khà jờng, gai lòng kâp dà lơgar, ală lơgar; geh uă cồng nha, kơlôi lơh, tă pơgồp dà kơlhề ai jak chài in, lơh gơlik geh uă phan bơna geh bơta kwơ ngan ngồn, jăt ngui tàm mùl màl rài kis mờ bơtàu tơngguh lơh sa- mpồl bơtiàn, sền gàr lơngăp lơngai rơndăp tăp sèng, niam lơngăp lơngai ai mpồl bơtiàn in.

Củ tịc Quôk hội kung cih dờp, jờng rơ bè ală cồng nha mờ Kes priă Priă dong kờl bơsram Vừ A Dính neh lơh geh tàm 25 nam do; jờng rơ ală cau dong kờl priă jền, cau geh nùs nhơm niam, bal mờ broă kă bro neh geh ală nùs nhơm niam chài kòn bơnus, niam bơnĕ ngan, tă pơgồp pràn kòn bơnus, phan bơna ai broă lơh bơtàu tơngguh tiah jơi bơtiàn dồ êt nă cau, tiah kơh bơnơm mờ bồt bơlào dà lềng bơh Kes priă tàm sùm ală nam do.

Củ tịc Quôk hội kơ̆p kờñ, ală kơnòm bơsram, cau bơsram dờng, ală cau pơgru kơnòm să lơh jăt gơ in niam ngan jơnau pơn dơ̆p bơr bơh Củ tịc Hồ Chí Minh dê tàm Sră pơyua kơnòm bơsram in di ngai sơnđờm mŭt nam bơsram pa, là: “Dà lơgar Việt Nam geh gơgơs niam bơnĕ halà ờ, jơi bơtiàn Việt Nam geh cơnđoà tus anih pơnrơ dờng nàng tơƀă pơnì bal mờ ală lơgar dờng pràn làm gùt plai ù halà ờ, hơ̆ ngan là kơnờm dồ bơnah uă tàm dà kơlhề bơsram sră bơh ală oh dê”. Củ tịc Quôk hội ồng Trần Thanh Mẫn, sồr: Ală mpồl cau, cau dồ nă să geh dờp Khà jờng gàr niam ală cồng nha neh lơh geh, pơn jăt tai jơh nùs tă pơgồp bơta pràn dà kơlhề, bồ tơnggoh jak bơ̆t bơtàu ƀòn lơgar, dà lơgar ngai sơlơ niam bơnĕ. Di dơ̆ do, añ sồr Mpồl Ơruh pơnu Dà lơgar pơn jăt tai sền gròi sồr lơh, ai tơl bơta nàng Kes priă Priă dong kờl bơsram Vừ A Dính lơh gơrề pràn kơldang nùs nhơm tam klăc, tam pà bal, tàm dong tàm kờñ bal; di tŭ do dong kờl, pơndờm pơnđiang, pơgồp bơnah bơtàu tơngguh, ngui niam bơta geh, bơta pràn bơh làng bol jơi bơtiàn dồ êt nă cau dê, tiah kơh bơnơm mờ dà lềng bồt bơlào, pơgồp bơnah bơ̆t bơtàu mpồl cau lơh broă kơnòm să cồng nha jak lơh geh jơnau sồr broă lơh dà lơgar lơh sa mờ măy mŏk, măy mŏk lơh jơh lơm dê.

Củ tịc Quôk hội kung pà gĭt, Đảng, Dà lơgar tơrgùm jơh bơta pràn nàng kờñ bơcri uă rlau tai ai tiah làng bol jơi bơtiàn êt nă cau. Quôk hội neh ai lơh jăt ală jơnau lơh nền bè 3 broă lơh jơnau kờñ dà lơgar hơ̆ là Bơ̆t bơtàu ƀòn lơgar pa; bơtàu tơngguh lơh sa- mpồl bơtiàn tiah làng bol jơi bơtiàn dồ êt nă cau mờ tiah kơh bơnơm; tơn jơh jơgloh tơrmù rƀah kơ̆ kơl jăp. Tŭ do, Cíñ phủ gam lơh ngan lơh jăt ală broă lơh do.