Tàm nùs nhơm ram mhŭ bơh ală ngai lồi nam Giáp Thìn dê, Củ tịc Quôk hội ồng Trần Thanh Mẫn neh yal mờ kwang bàng đơng lam bồ Quôk hội lài do, Kwang bàng Anih duh broă Lơh kơnòl broă sùm Quôk hội ală khoă lài do bè ală cồng nha mờ dà lơgar he đơs bal mờ Quôk hội dê neh lơh geh tàm nam do òr. Củ tịc Quôk hội ồng Trần Thanh Mẫn đơs nền, Quôk hội khoă XV geh tàm pơndờn, gàr niam broă lơh geh, jơnau bơsram mờng chài bơh ală tơngai lơh broă lài dê nàng pơn jăt tai lơh sir niam gơnoar broă anih lơh broă ala măt dờng ngan rlau jơh bơh Làng bol dê, anih lơh broă gơnăp gơnoar dà lơgar dờng ngan rlau jơh.

“Tam tơl cơnđòa guh bơh Quôk hội dê, ờ mìng là cồng nha bơh lơh ngan tŭ do dê lơm, mờ gam là bơta tàm pơn jăt ală bơta kwơ niam bơnĕ mờ ală rơnàng kwang đơng lam bồ lòt lài, kwang bàng kông cưk, viên cưk, cau lơh broă bơh ală tŭ tơngai dê neh bơ̆t bơtàu mờ bơtàu tơngguh. Ală oh mi, bulah neh rê rlô lơh broă, mơya bơh bồ tơngoh ngăc ngar, bơta jơh nùs mờ mờng chài bơh he dê, sùm lòt bal, tam pà bal mờ tă pơgồp nàng Quôk hội in ngai sơlơ kơnhăp pràn rlau; tề lam, lơh gơlik bơta gơdan, lời wơl krơh àng bơh ală rơnàng lòt lài dê ai ală rơnàng ngai do in đòm jăt”.

Nam 2025 geh gơtha kwơmàng, geh uă ngai kir sơnrai dờng bơh dà lơgar dê, là nam jơh gùt Đảng, jơh gùt làng bol, jơh gùt ling klàng jơh nùs lơh ngan pơnđơl ngan rlau jơh nàng tơngguh mhar, tam gơl pràn, lơh jăt geh cồng nha Jơnau lơh nền tàm pơrjum bơh pơrjum dờng dơ̆ XIII Đảng dê. Is ồn, Quôk hội gam 3 dơ̆ pơrjum mờ uă broă lơh lơh adăt boh lam ndai. Digơlan ring bal 34 adăt mờ tam gơl, bơtơl uă adăt ndai nàng drơng ai broă rơndăp tăp sèng rơndăp mpồl lơh broă.

Jăt hơ̆, tơnơ̆ tŭ ơm rlô Sa tềp bơhiàn, Quôk hội rơ̆p pơrjum dơ̆ pơrjum ờs bè ờs tàm poh gùl nhai bàr nàng kờñ lơh sir ndrờm bal gùng dà broă lơh drơng lam lơh gơtùi jơnau sồr rơndăp tăp sèng rơndăp mpồl lơh broă gơ in dipal ngan, di tơl ngan, pràn, lơh broă geh cồng nha, lơh broă gơtùi, geh cồng nha bơh dà lơgar tus ƀòn lơgar.

Tài bè hơ̆, mờ nùs nhơm pal tam gơl pa pràn kơldang ai broă lơh Quôk hội in, is ồn là nam 2025, nàng rơcăng ai Pơrjum dờng Đảng ală kâp wèt tus Pơrjum dờng Đảng gùt lơgar kung bè pồ Quôk hội khoă XVI mờ Mpồl duh broă Làng bol ală kâp tơngai lơh broă bơh nam 2026- 2031, Củ tịc Quôk hội ồng Trần Thanh Mẫn kơ̆p kờñ ală Củ tịc Quôk hội, Phó Củ tịc Quôk hội, ală Kwang bàng Anih duh broă Lơh kơnòl broă sùm, kwang bàng, kông cưk tàm Mpồl duh broă Jơi bơtiàn, ală Anih duh broă Quôk hội lài do dê pơn jăt tai dồ nùs bal pràn kơldang uă rlau tai tàm tơngai tus.

Củ tịc Quôk hội đơs nền, Quôk hội sùm crăp rơcăng iăt kơno mờ sùm tam gơl pa nàng ai broă lơh lơh adăt boh lam, jăt sền dờng ngan rlau jơh, lơh nền ală broă kwơmàng bơh dà lơgar dê geh ngai sơlơ niam rlau.

Đơs tàm dơ̆ tìp măt, Phó Củ tịc Quôk hội lài do ồng Uông Chu Lưu tơlik nùs nhơm chờ hờp, rà măt ngan tềng đăp bơta bơtàu tơngguh tơl làm bơh dà lơgar dê tàm nam 2024; đơs sùm, tàm broă lơh geh bal bơh dà lơgar dê geh gơnoar broă mờ tă pơgồp kwơmàng bơh Quôk hội dê. Bulah bơnah broă dờng ngan, geh uă broă nisơna, pa, kal ke, ờ ƀươn soh mơya Quôk hội neh tam klăc, tam gơl pa, tơrgùm bồ tơnggoh ngăc ngar mờ tŭ jiơ, lơh sir niam ală kơnòl broă he dê tàm ală broă lơh adăt boh lam, jăt sền dờng ngan rlau jơh mờ lơh nền ală broă kwơmàng dà lơgar dê.

Nam 2025, dà lơgar mŭt tàm rài pa, rài brồ să jơi bơtiàn dê bal mờ uă tŭ niam mờ bơta lòng gơ tàm bơrlŭ bal, mờ gơnoar broă là anih lơh broă lơh adăt boh lam, anih lơh broă cau ala măt dờng ngan rlau jơh làng bol dê, anih lơh broă gơnăp gơnoar Dà lơgar dê dờng ngan rlau jơh, Phó Củ tịc Quôk hội lài do ồng Uông Chu Lưu pin dờn Quôk hội rơ̆p lơh sir gơnoar broă dờng màng ngan bơh he dê, dipal mờ bơta pin dờn kờñ gơboh bơh cau tĕ khà mờ làng bol gùt lơgar dê; mơkung đơs nền kung gam sùm sền gròi mờ crăp rơcăng tă pơgồp dồ bơnah dà kơlhề bơta pràn dềt rơhền he dê tàm bơta bơtàu tơngguh bal bơh dà lơgar dê mờ bơh Quôk hội dê.