Jat jơnau yal bơh Cơldŭ lơh broă Quôk hội dê, 6 nhai bồ nam, broă lơh tă pơgồp jơnau đơs, drơng broă lam lơh ală broă lơh lơh adat boh lam pơn jat tai geh lơh lài, sền gròi uă, tơnguh bơta niam. Bơh 4 dơ̆ pơrjum, Quôk hội neh ring bal 13 adat boh lam, 3 jơnau lơhnền tàm pơrjum pơlam lơh jat jơnau cih adat boh lam, ai jơnau đơs bè 11 rơndap lơh adat boh lam ndai, kươmàng là tềl lời wơl niam ngan bè broă lơh lơh adat boh lam bồ nam 2024.

Đơs tàm pơrjum, Củ tịc Quôk hội ồng Trần Thanh Mẫn đơs loh, 6 nhai bồ nam, dà lơgar he neh lơh geh uă cồng nha niam, tàm cồng nha bal hơ̆, geh bơta tă pơgồp kươmàng ngan bơh Quôk hội, Ủy ƀan Thường vụ Quôk hội, ală anih lơh broă bơh Quôk hội dê, anih lơh broă gơ wèt Ủy ƀan Thường vụ Quôk hội dê. Tàm hơ̆, broă lơh lơh adat boh lam, jat sền dờng ngan rlau jơh mờ lơh nền ală broă kươmàng pơn jat tai geh tơnguh bè bơta niam, đơs di ală broă geh cau tĕ khà, làng bol sền gròi.

Bơh bơta hơ̆, Củ tịc Quôk hội ồng Trần Thanh Mẫn jờng rơ bơta pơn đơl pràn, bơta lơh ngan bơh Mpồl duh broă Jơi bơtìan, ală Anih duh broă, anih lơh broă bơh Quôk hội dê mờ jơh gùt kwang bàng, kông chức, viên chức neh lơh gơs khà broă uă ngan tàm ală dơ̆ pơrjum ờs mờng, nisơna bơh Quôk hội dê.

Củ tịc Quôk hội ồng Trần Thanh Mẫn sồr, ală kwang geh jơng bơh Ủy ƀan Thường vụ Quôk hội, Mpồl duh broă jơi bơtìan, ală anih lơh broă bơh Quôk hội dê mờ nùs nhơm sền song tàm bơta geh ngan, đơs song tàm ală broă gam ờ niam nàng bơsong, mờ kung sền wơl ală bơta niam nàng pơn jat tai đòm jat tàm tơngai tus.

Củ tịc Quôk hội đơs nền, broă 6 nhai lồi nam uă ngan, ngan là rơcang ai pơrjum dơ̆ 8, Quôk hội khoă XV in kờp dŭ geh lơh tàm nhai 10 tus; bơyai lơh pơrjum cau ala mat mìng lơh kơnòl ala mat dơ̆ 6, lam lơh jat geh cồng nha ală tơnguem, broă lơh quý 3 bơh Đảng đoàn Quôk hội, Thường vụ Quôk hội dê; ală dơ̆ pơrjum bơh Ủy ƀan Thường vụ Quôk hội dê: “Bol he tơrgùm lơh jat tơngume tàm broă lơh adat boh lam, jơnau sồr adat boh lam dê nam 2024 dê geh bơ tơl là gàr di tŭ tơngai hơ pơrgon, jat jơnau pal jat là Quôk hội neh lơh nền bơ tơl broă lơh lơh adat boh lam, jơnau sồr adat boh lam dê nam 2024 dê, ală rơndap lơh adat boh lam neh rơcang nền nòn wil tơl sră nggal den mhar cih dờp, bơsong, lơh sir ală adat boh lam, jơnau lơh nền tàm pơrjum neh geh ring bal tàm pơrjum dơ̆ 7. Ală Phó Củ tịc drơng broă rơp sồr kờp sền gam nđờ tơngume ờ hềt kĭ dờp nàng lơh sir”.

Củ tịc Quôk hội pà git, mờr tus, Ủy ƀan Thường vụ Quôk hội mờ Cíñ phủ rơp bơyai lơh Pơrjum lơh jat adat boh lam, jơnau sồr adat boh lam dê neh geh ring bal. Kươmàng, Cíñ phủ rơp đơng lam broă mblàng yal, bơ to bơtê adat boh lam nàng lơh jat ală adat boh lam, ală Jơnau lơh nền bơh Cíñ phủ dê, ală Thông tư gơ jat bal nàng gơ in ring bal.

Củ tịc Quôk hội sồr, Cơldŭ lơh broă Quôk hội tă pơgồp jơnau đơs ai Ủy ƀan Thường vụ Quôk hội in sồr lơh, kờp sền, bơt bơtàu broă rơndap lơh nàng ai tơlik sră nggal cih mùl màl, pơlam lơh jat tơngume jat gơnăp gơ noar, pơn jat tai kơlôi sơ nơng, mblàng lơh loh, cih dờp, lơh sir 11 rơndap adat boh lam neh geh Quôk hội ai jơnau đơs tàm pơrjum dơ̆ 7 mờ rơp ring bal tàm pơrjum dơ̆ 8; rơcang lài broă Quôk hội rơp ai jơnau đơs dơ̆ sơn rờp gơ wèt mờ 12 rơndap lơh adat boh lam mờ ală jơnau rơcang cih jơnau lơh nền tàm pơrjum geh bơ tơl tàm broă lơh adat boh lam, jơnau sồr adat boh lam dê nam 2024; tă pơgồp jơnau đơs, drơng broă lam lơh broă lơh lùp mờ hơ jơnau lùp tàm pơrjum dơ̆ 8; tơrgùm lơh sir jơnau yal cồng nha jat sền 2 jơnau lơh nền tàm pơrjum mìng dùl tơngume bơh Ủy ƀan Thường vụ Quôk hội dê tàm nam 2024.

Củ tịc Quôk hội ồng Trần Thanh Mẫn kung tơngkah, pal sơlơ tơnguh tai broă lơh atbồ cíñ trị ai ală đảng viên, kwang bàng, kông chức, viên chức in; kươmàng, sền gròi tus ală broă dng kờl, broă lơh priă nhai mờ nùs nhơm ring bal, di pal mờ di tŭ.