Đơs sơnđờm mŭt Pơrjum, Củ tịc Quôk hội ồng Trần Thanh Mẫn đơs sùm, do là dơ̆ pơrjum kwơmàng ngan gĭt lơh, bơh Lơh kơnòl broă sùm Anih duh broă đơng lam Đảng Quôk hội mờ Lơh kơnòl broă sùm Anih duh broă đơng lam Đảng Cíñ phủ dê đơng lam nàng kờp sền nền wơl ală broă lơh gơrềng tus rơcăng ai dơ̆ pơrjum ờ bè ờs in dơ̆ 09, Quôk hội khoă XV (geh lơh bơh ngai 12 tus 18 nhai 02 nam 2025 do”.

Củ tịc Quôk hội đơs sùm, Pơrjum geh lơh tàm tŭ Dà lơgar mờ ƀòn lơgar gam lơh tơn jơh Jơnau lơh nền tàm pơrjum sồ 18 rơndăp tăp sèng mpồl lơh broă bơh Dà lơgar tus ƀòn lơgar; tàm tŭ chờ Đảng, chờ Sơnam pa Ất Tỵ 2025, Tơngkah kir sơnrai 95 nam ngai tơnggơs Đảng Kộng sản Việt Nam. Jăt hơ̆, uă anih lơh broă Cíñ phủ, Quôk hội dê neh lơh ngan ngai mang, geh bal ngai dơ̆ poh mờ ngai rlô bal mờ nùs nhơm geh kơnòl uă ngan, pơgồp bal niam ngan nàng lơh jăt kơnòl broă geh jàu.

Củ tịc Quôk hội pà gĭt, Anih duh broă Lơh kơnòl broă sùm Quôk hội kung neh pơrjum ai jơnau đơs bè Adăt Rơndăp Cíñ phủ (tam gơl), Adăt Rơndăp gơnoar ătbồ ƀòn lơgar (tam gơl) mờ rơcăng ai lơh jăt ală jơnau lơh nền tàm pơrjum tàm Dơ̆ pơrjum ờ bè ờs dơ̆ 09. Ală tơnggume do Lơh kơnòl broă sùm Quôk hội sền bal ring bal uă ngan. Củ tịc Quôk hội ồng Trần Thanh Mẫn đơs sùm: "Nùs nhơm bol he dê pal pơn jăt tai tam gơl pa bồ tơngoh kơlôi sơnơng, broă lơh, tơrgùm uă ngan rlau jơh ai bơta bơtàu tơngguh dà lơgar dê in; mơkung đòm jăt mờng chài, kơnòl mờ broă lơh bơh ală dơ̆ pơrjum rềp ndo dê, ngan là ală dơ̆ pơrjum dơ̆ 07, dơ̆ 08 bơh Quôk hội khoă XV dê. Tơngai do, 2 gah neh pơgồp bal niam ngan rao bờh, tŭ do bol he pal pơgồp bal niam rlau tai; neh jơh nùs, geh kơnòl uă rao bờh, tŭ do pal jơh nùs, geh kơnòl uă rlau tai tài bơh bơtàu tơngguh dà lơgar dê. Bơh đơng lam bơh Mpồl Duh broă Đảng Dà lơgar dê, Ƀộ Cíñ trị, Mpồl Đơng lam Đảng Dà lơgar mờ Tổng Ƀí thư ồng Tô Lâm dê neh uă dơ̆ đơs là, broă pơgồp bal đah Cíñ phủ mờ Quôk hội pal lơh geh bơta ring bal nàng tă bơsong ală anih gơkòl, kal ke tàm bơtàu tơngguh lơh sa- mpồl bơtiàn, sền gàr niam dà lơgar, lơngăp lơngai mờ bơ̆t bơtàu ală anih lơh broă cíñ trị”.

Củ tịc Quôk hội yal, ală tơngume Dơ̆ pơrjum ờ bè ờs dơ̆ 09, kờp tus tơngai do, bàr gah sền bal neh ring bal ală tơnggume geh: sền swì ring bal 4 adăt; 5 jơnau lơh nền tàm pơrjum drơng broă lơh rơndăp tăp sèng, lơh sir kơrnoăt boh lam, gùng dà lơh broă ală anih lơh broă, mpồl lwh broă, mpồl ală anih lơh broă cíñ trị; sền swì lơh nền 4 tơnggume ndai gơ wèt gơnăp gơnoar, tàm hơ̆ geh tơnggume bè broă lơh kwang bàng; mơkung geh dồ jơnau yal Quôk hội in jăt jơnau sồr.

Đơs tàm pơrjum, Thủ tướng Cíñ phủ ồng Phạm Minh Chính đơs niam ngan mờ ưn ngài bơta pơgồp bal bơh Quôk hội, Anih duh broă Lơh kơnòl broă sùm Quôk hội, ală oh mi đơng lam bồ Quôk hội, Cau tờm kong kơnòl ală anih duh broă Quôk hội dê mờ Cíñ phủ dê; Ngai sơlơ geh bơta pin dờn, pơgồp bal, geh cồng nha bal mờ gơ̆p nàng lơh jăt bơnah broă dờng ngan; is ồn lơh jăt niam mờ geh cồng nha ală jơnau sồr bơh Đảng mờ Dà lơgar dê tàm lơh broă Quôk hội kung bè bơh Cíñ phủ dê.

Thủ tướng Cíñ phủ ồng Phạm Minh Chính đơs nền, jơnau kờñ sồr lơh bơh Mpồl Duh broă Đảng Dà lơgar, Ƀộ Cíñ trị, Mpồl Đơng lam Đảng dà lơgar dê, sồr lơh bơh Tổng Ƀí thư ồng Tô Lâm dê 2 gah pơgồp bal niam, lơh uă broă tàm dồ tŭ tơngai lơyah, geh cồng nha mờ niam bè bơta pal jăt mờ broă lơh.

“Bol he pơrjum tàm Dơ̆ pơrjum ờ bè ờs dơ̆ 09, tơnggŏ nùs nhơm geh broă lơh, geh broă den pal bơsong. Mờ neh lơh, bơsong pal tus gùng tus dà, geh cồng nha. Sền wơl ală dơ̆ pơrjum ờ bè ờs dipal mờ bơta geh ngan, bơsong geh broă bơh bơta geh ngan dê mờ bơsong geh jơnau kơ̆p kờñ bơh làng bol dê. Jơnau kờñ dơ̆ do Đảng dê sồr, bol he tơrmù dipal mpồl lơh broă jăt Jơnau lơh nền tàm pơrjum sồ 18, do là dùl dơ̆ tam gơl bơta yau gơgơs bơta pa bè mpồl lơh broă. Mpồl lơh broă tơrmù dipal rlau, kòn bơnus niam rlau. Tŭ mờ bol he ai lơh jăt ală jơnau lơh nền tàm pơrjum do, lơh jăt Jơnau lơh nền tàm pơrjum Dà lơgar mờ bơh Ƀộ Cíñ trị dê, ală jơnau đơs pơndŭt bơh Đảng dê den rơ̆p gơkòl tus ală jơnau cih bơh adăt boh lam dê mờ neh geh cih jăt bơta yau. Nùs nhơm bơh dà lơgar dê, bơh Ƀộ Cíñ trị dê den gơkòl tus bơnah lơi lơh wơl tus bơnah hơ̆, gơkòl tàm kâp lơi, kâp hơ̆ pal lơh wơl”.

Đơs sùm Dơ̆ pơrjum ờ bè ờs dơ̆ 09 geh tơnggume kwơmàng ngan, kal ke ngan mơya tài bơta bơtàu tơngguh dà lơgar dê, Củ tịc Quôk hội ồng Trần Thanh Mẫn sồr ală gah geh gơrềng pal pơn jăt tai tơrgùm uă ngan rlau jơh, lơh ngan jơh nùs, pơgồp bal niam, sơrbac mhar lơh gơs broă rơcăng jơh ală tơngume yal mờ Quôk hội in kung bè gàr niam lơngăp lơngai ngan, pơgồp bơnah lơh geh cồng nha bơh Dơ̆ pơrjum dê.