Lồi nam lài, Ƀộ Cíñ trị neh ai lơh jăt Jơnau lơh nền tàm pơrjum sồ 57 bè tam gơl pràn bơtàu tơngguh jak chài, măy mŏk, tam gơl pa bơceh lơh mờ tam gơl sồ dà lơgar. Tơnơ̆ hơ̆ tơn, tàm Hìu pơrjum Diên Hồng neh geh lơh Pơrjum gùt lơgar bơsram kơlôi sơnơng Jơnau lơh nền tàm pơrjum sồ 57, Tổng Ƀí thư ồng Tô Lâm neh geh jơnau cih đơs sồr lơh kwơmàng tàm Pơrjum mờ Củ tịc Quôk hội ồng Trần Thanh Mẫn kung geh jơnau yal mìng dùl tơnggume bè tơngume do. Đảng mpồl Quôk hội ai lơh jăt Broă rơndăp lơh sồ 3260 nàng lơh jăt Jơnau lơh nền tàm pơrjum sồ 57. Tàm dơ̆ pơrjum ờ bè ờs dơ̆ 09, Quôk hội neh sền swì, ring bal Jơnau lơh nền tàm pơrjum sồ 193 bè bàr pe gùng dà, broă lơh krơi is lơh gơlik geh bơta tam gơl pràn bơtàu tơngguh jak chài, măy mŏk, tam gơl pa bơceh lơh mờ tam gơl sồ dà lơgar. Do là jơnau lơh nền tàm pơrjum nàng kờñ bơsong ală broă tềng đăp măt, bè jŏ jòng rơ̆p tam gơl wơl ală adăt nàng lơh pràn broă jak chài, măy mŏk.

Đơs tàm Pơrjum, Củ tịc Quôk hội ồng Trần Thanh Mẫn đơs sùm, Jơnau lơh nền tàm pơrjum sồ 57 geh jơnau kờñ tus nam 2030, Việt Nam gơ wèt mpồl 3 lơgar lam lài tiah đah jum măt tơngai lik câu Á, mpồl 50 lơgar lam bồ dunia bè bơta pràn jak tam pơrlòng sồ mờ sơñio khà bơtàu tơngguh Cíñ phủ điện tử. Việt Nam kơ̆p gơn săp khà mpồl 3 lơgar lam lài tiah đah jum măt tơngai lik câu Á bè kơlôi sơnơng mờ bơtàu tơngguh bồ tơngoh jak kòn bơnus lơh is, anih tờm bơtàu tơngguh bàr pe gah, broă lơh sa mờ măy mok măy mŏk sồ. Củ tịc Quôk hội ồng Trần Thanh Mẫn sồr Duh broă sùm Mpồl duh broă Jơi bơtiàn, ală Anih duh broă Quôk hội, Cơldŭ lơh broă Quôk hội dê tơrgùm bơsram kơlôi sơnơng, lơh jăt ală tơngume tờm kwơmàng, bè: “Bơtàu tơngguh jak chài măy mŏk, tam gơl pa bơceh lơh, tam gơl là jơnau tờm ngan, ờ gơtùi pleh klàs nàng bơ̆t bơtàu Quôk hội pa ngan, làng bol lơh tờm, song dơ pă loh làng, jak broă mờng lơh, jak chài mờ geh cồng nha. Bồ tơngoh kòn bơnus lơh is rơ̆p gơgơs là cau dong kờl pràn ngan dong Quôk hội sền swì, ai geh ală jơnau lơh nền gùng dà broă lơh kwơmàng di ngan, lơh geh di tŭ jơnau sồr tàm rài kis ngan ngồn, tơngguh uă cồng nha jăt sền mờ tàm tơrbŏ niam rlau mờ cau tĕ khà mờ Làng bol. Quôk hội pal lòt lài tàm broă bơcri phan bơna sồ, ngui jak chài, măy mŏk bơto cau lơh broă jak drơng tam gơl sồ dà lơgar. Lơh jăt mhar, geh cồng nha ală Jơnau lơh nền tàm pơrjum, ală jơnau neh lơh nền neh ai lơh jăt gơ wèt mờ Quôk hội; bơto, pơlam bơta chài sồ, dong Cau ala măt Quôk hội mờ kwang bàng, kông cưk, viên cưk gơ wèt ală anih lơh broă Quôk hội dê ngui măy mŏk dồ bă geh cồng nha tàm lơh jăt kơnòl broă. Bơtàu tơngguh phan bơna sồ pa ngan, bơcri priă bơ̆t bơtàu bơnàng jăt ngui bồ tơngoh jak kòn bơnus dê lơh…drơng broă lơh Quôk hội dê”.

Củ tịc Quôk hội tơngkah, pal sơlơ lùp bơsram tai mờng chài mờ chồl tơngguh lơh broă bal kơlôi sơnơng mờ tàm jàu măy mŏk mờ ală dà lơgar jak chài tàm broă lơh bồ tơngoh jak kòn bơnus dê lơh is, măy mŏk sồ pa ngan tàm broă lơh nghị viện, nàng bơtàu tơngguh ală broă lơh bơsong mờ bơta geh ngan bơh Quôk hội Việt Nam dê.

Củ tịc Quôk hội yal, tàm dơ̆ pơrjum dơ̆ 09, tàm nhai 05 tus, Quôk hội rơ̆p sền swì ai jơnau đơs bè Adăt Jak chài, măy mŏk mờ tam gơl pa bơceh lơh; sền swì ring bal Adăt Lơh sa mờ măy mŏk măt mŏk sồ, nàng tă bơsong ală anih gơkòl, bơta gơ kơryan, pờ gùng ai bơtàu tơngguh jak chài, măy mŏk, tam gơl pa bơceh lơh, tam gơl sồ dà lơgar in. Cribơyai tàm pơrjum mìng dùl tơngume, Ƀộ trưởng Ƀộ Jak chài mờ Măy mŏk ồng Nguyễn Mạnh Hùng đơs là, tàm Jơnau lơh nền tàm pơrjum sồ 57, jak chài măy mŏk, tam gơl pa bơceh lơh là bơta lài ngan lơh nền, là tŭ jiơ niam nàng Việt Nam in gơgơs là lơgar bơtàu tơngguh: “Gơ wèt mờ bơta bơtàu tơngguh lơh sa sồr pal geh ală jơnau lơh nền gùng dà broă lơh gơcèng bơta tam gơl bơta yau gơgơs bơta pa mờ Jơnau lơh nền tàm pơrjum sồ 57 là dùl broă lơh tam gơl bơta yau gơgơs bơta pa loh làng ngan. Nùs nhơm sồr lơh hơ̆, geh pe tơngguem là jơnau kờñ tờm nàng bơtàu tơngguh dà lơgar. Nàng bañ gơtìp gơmù uă ir, nàng gơtùi tam gơl pràn, nàng gơtùi sơrlèt rlau bơta gơkòl tàm priă lơh geh di mơ den do là gùng lòt mìng dùl lơm. Den tàng bol he sền bè dùl dơ̆ tam gơl bơta yau gơgơs bơta pa gơ là jrô ơnàng ngan mờ tơl làm ngan. Việt Nam sùm lơh geh cồng nha bơtàu tơngguh pràn kơldang tŭ geh tam gơl gơgơs dùl dơ̆ tam gơl bơta yau gơgơs bơta pa jơh gùt làng bol mờ tơl làm".

Pơrjum mìng tơngume “Quôk hội sồ mờ ngui măy mŏk bồ tơngoh jak kòn bơnus dê lơh is tàm tam gơl sồ Dà lơgar dê” neh đơs nền bơta jơh nùs lơh ngan bơh Quôk hội dê tàm broă lòt lài tàm tam gơl sồ, ngui jak chài, măy mŏk nàng tơngguh uă cồng nha lơh broă. Ală jơnau kờñ dờng geh sồr lơh tàm Jơnau lơh nền tàm pơrjum sồ 57 mờ ală jơnau lơh nền tàm pơrjum gơrềng bal ờ mìng wèt tus broă lơh gơlik bơta tam gơl pràn tàm broă jak chài, măy mŏk, tam gơl pa bơceh lơh mờ tam gơl sồ dà lơgar mờ gam lơh geh bơnàng jă kơ̆ kơl jăp ai dùl Quôk hội pa ngan in, song dơ pă loh làng, jak chài rlau broă mờng lơh.