Củ tịc Quôk hội ồng Vương Đình Huệ đơs là, đơs tus cau ùr, dunia kung bè Việt Nam ndrờm lời ai ală jơnau đơs niam ngan rlau jơh. Củ tịc Hồ Chí Minh kung đơs nền “Dà lơgar hàng niam Việt Nam bơh cau ùr he, cau kơnòm kung bè cau kra, lơh ngan tàñ gơs mờ sơlơ niam bơnĕ, àng gơ crà”. Bơh rài yau, cau ùr sùm geh gơnoar broă kuơmàng ngan tàm broă tă pơgồp ai mpồl bơtiàn in bơtàu tơnguh mờ bơt bơtàu hìu bơnhă gơboh gơbài; tàm khat bơta lơi, tàm khat tiah lơi, cau ùr Việt Nam sùm tơnguh niam nùs nhơm “Khin cha – jak chài – lơbơn niam- tryăng tryồng” bè 8 akhar biàng mờ wa Hồ neh pà. Bal mờ bơta bơtàu tơnguh bơh rài kis pa dê, ală nùs nhơm niam bơnĕ hơ̆ pơn jat tai geh sơlơ tơnguh gơs ală tơl khà tàm rài pa là: Pin dờn – sền dờng màng is să tờm – lơ bơn niam – tryăng tryồng.

Củ tịc Quôk hội đơs nền, ală tơngai lơh broă Quôk hội mờ bơh bồ tơngai lơh broă Quôk hội khoă XV tus tŭ do, Quôk hội sùm geh bơta jòi git, tam gơl pa lơh geh cồng nha tơl làm. Tàm cồng nha hơ̆, ndrờm geh gơnoar broă bơh ală ùr kwang bàng Quôk hội dê, ală oh mi cau ùr tàm ală anih lơh broă bơh Quôk hội dê. Kuơmàng, tơngai lơh broă Quôk hội khoă XV geh khà ùr kwang bàng gal ngan rlau jơh tàm 10 tơngai lơh broă rềp ndo, geh 30,26%, khà do geh nghị viện ală lơgar jờng rơ ngan. Tàm hơ̆, geh 3 nă ùr kwang bàng geh jơng tàm Đảng dà lơgar, kwang geh jơng tàm Ủy ƀan Thường vụ Quôk hội, 32 nă kwang bàng là Phó Củ tịc, Phó Kwang atbồ, kwang geh jơng Duh broă sùm, kwang geh jơng lơh broă mìng dồ kơnòl broă ala mat Mpồl duh broă Jơi bơtiàn, ală Ủy ƀan, Kwang đơng lam bồ Cơldŭ lơh broă Quôk hội, kwang đơng lam bồ ală anih lơh broă gơ wèt Ủy ƀan Thường vụ Quôk hội.

Ală kwang bàng Quôk hội neh jơh nùs kơlôi sơnơng sră nggal, geh bơta git wă uă, geh jơnau đơs jơh nùs, geh jơnau đơs niam tàm ală dơ̆ pơrjum, tă pơgồp uă ai Quôk hội, anih lơh broă bơh Quôk hội, anih lơh broă gơ wèt Ủy ƀan Thường vụ Quôk hội dê in; ngui niam bơta ƀuơn nàng lam lơh niam rlau tai broă lơh ring bal ùr klau. Mpồl ùr kwang bàng Quôk hội neh bơyai lơh uă broă lơh ngan ngồn, gơ gơs dơ̆ cribơyai niam, dipal nàng ală ùr kwang bàng in geh tìp mat lơh kwèng, cribơyai mờng chài bè bơta chài lơh broă kwang bàng kung bè bơsram, đòm jat mờng chài bơh ală mpồl ùr nghị sĩ dunia dê tàm ală dơ̆ cribơyai uă lơgar mờ 2 lơgar.

Ala mat Quôk hội, Củ tịc Quôk hội ồng Vương Đình Huệ jờng rơ ală broă lơh ngan, ală cồng nha jak ngan bơh ală ùr kwang bàng Quôk hội lơh broă mìng dồ kơnòl broă ala mat dà lơgar mờ ùr kwang đơng lam bồ, atbồ kâp vụ bơh Cơldŭ lơh broă Quôk hội, Viện Kơlôi sơnơng lơh adat boh lam dê, đơs nền Quôk hội sùm pơlam lơh jat jơnau lơh nền bơh Đảng dê bè broă lơh cau ùr: “Sồr pơlam lơh jat niam Nghị quyết sồ 11 bơh Ƀộ Cíñ trị dê bè broă lơh cau ùr tơngai sơlơ tơnguh pràn tam gơl lơh sa mờ măi mok dà lơgar, Jơnau sồr sồ 21 bơh Ƀan Ƀí thư dê bè pơn jat tai sơlơ tơnguh pràn broă lơh cau ùr tàm bơta pa; lam lơh niam kơnòl broă, broă lơh bè lam lơh jat jơnau kờñ ring bal ùr klau, pơgồp bơnah lơh gơtùi ală jơnau kờñ bơtàu tơnguh kơ̆ kơljap tus nam 2030, lam lơh geh cồng nha broă rơndap lơh dà lơgar bè ring bal ùr klau tơngai bơh nam 2021 tus nam 2030. Bulah bơta ring bal ùr klau tus tŭ do lam lơh niam ngan, mơya tềng lơi hơ̆ den bol he kung gam pal pơlam lơh jat. Bol hi sồr ală kâp, ală mpồl lơh broă, ală oh mi sùm lơh jat bơh tàm jơnau git wă tus broă lơh, tàm niam chài boh bơr, tàm jàu kơnòl broă”.

Củ tịc Quôk hội pà git, mờr tus, Đảng đoàn Quôk hội sồr lơh rơndap broă, rơndap tap sèng, pơn jat tai tơnguh khà cau ùr, ngan là ùr kwang bàng Quôk hội lơh broă sùm. Tus tŭ do, Quôk hội neh lơh niam ngan broă rơndap tap sèng lài kwang bàng Quôk hội, ùr kwang bàng ală kâp mờ khà uă; pơn jat tai tơnguh bơta niam, cồng nha lơh broă bơh ùr kwang bàng Quôk hội dê. Củ tịc Quôk hội kung sồr pal pơn jat tai pơgồp bal mờ ală mpồl kông đoàn nàng sơlơ bơyai lơh tai ală broă lơh sền git, lòt sền, kơlôi sơnơng, sền sơ wì,… Bơdìh hơ̆ tai, Đảng đoàn Quôk hội kung pal sền gròi tus broă lơh ùr kwang bàng, sền gròi rài kis phan bơna mờ nùs nhơm ai cau ùr in, tàm hơ̆ geh broă lơh priă nhai; geh broă rơndap lơh tơnguh bơta niam, cồng nha bơh mpồl ùr nghị sĩ dê.

Củ tịc Quôk hội ai lơh pin dờn là, ală ùr kwang bàng Quôk hội rơp pơn jat tai gàr niam ală cồng nha neh lơh geh, geh ală bơta tă pơgồp rlau tai tàm broă lơh bơh Quôk hội dê, bal mờ gơp lơh geh uă cồng nha dờng màng nàng sơlơ lơh niam rlau tai bơhiàn pơn iờ să mờ wèt tus tơngkah 80 nam Quôk hội Việt Nam.