Là dùl tàm ală càr kong hoàc huơr kơn jơ̆ ngan tơnơ̆ dơ̆ mìu dà tih dà lìu pa do, sàh Tuy An Nam, càr Dăk Lăk gam pal dơ̆ lĕ bal lam lơh 2 kơnòl broă dờng, hơ̆ là: bơsong jơnau gơ lời wơl tơnơ̆ trồ tiah lơh aniai, gàr bè ờs wơl rài kis làng bol mờ rơcang ai dơ̆ tĕ khà mờr tus in. Ồng Nguyễn Văn Hoàng, Củ tịc Anih duh broă Làng bol sàh pà git, bulah gam uă ngan kal ke, mơya tĕ khà là kơnòl broă cíñ trị kuơmàng ngan.

Tàm tŭ tơngai bè do, sàh ờ mìng tơrgùm lơh wơl broă lơh sa, gàr bè ờs wơl rài kis làng bol in mờ gam rơcang wil tơl ală bơta pal geh nàng làng bol in lòt tĕ khà wil tơl, niam ờdo ờdă, di mờ jơnau cih bơh adat boh lam dê: “Bol hi kung neh tơng gơs ală mpồl sồr lơh, mpồl tĕ khà. Bol hi neh lơh gơs jơh lơm. Ală broă rơndap lơh kung neh lơh sir, gam kơnòl broă bol hi dê tŭ do là mblàng yal. Den bol hi rơp mblàng yal mờ pano, áp phích kung bè mblàng yal tàm anih pờ tơlik jơnau đơs sàh dê”.

Ờ mìng gơnoar atbồ ală kâp lơh bal, làng bol càr Dăk Lăk kung ai tơnggŏ loh làng nùs nhơm geh kơnòl bơh làng bol dê gơ wèt mờ broă cíñ trị kuơmàng ngan bơh dà lơgar dê. Ồng La Văn Thanh, ơm tàm thôn Hiệp Đạt, sàh Ea Mdroh yal, ồng sùm jat sền ală jơnau yal, jòi git nền nòn ngan bè dơ̆ tĕ khà nàng tus ngai là lam lơh wil tơl kơnòl he dê. Ồng Thanh kơp kơnờm: “Là dùl nă làng bol, añ kung sền gròi ngan tus ală broă bè tĕ khà. Kung ai tŭ tơngai ru nàng jòi git tàm ală anih yal tơnggit jơnau. Añ kơp kờñ ngan dơ̆ tĕ khà do rơp pồ geh ală cau đơng lam geh bơta jơh nùs mờ kờñ làng bol nàng lơh bè lơi làng bol in geh rài kis ngai sơlơ bơtàu tơnguh rlau”.

Đơs nền, dơ̆ tĕ khà cau ala mat Quôk hội khoă XVI mờ cau ala mat Mpồl duh broă Làng bol ală kâp là broă cíñ trị is ồn kuơmàng ngan, là dơ̆ nàng cau tĕ khà mờ làng bol lam lơh gơnoar lơh tờm bơh sră pồ, sac rơ wah ală cau ala mat geh pơn rơ jak, dipal ala mat ai bơta kơp kờñ, nùs nhơm làng bol dê in. Mò Cao Thị Hoà An, Phó Ƀí thư Duh broă sùm Tỉñ ủy càr, Củ tịc Mpồl duh broă Làng bol càr, Củ tịc Anih duh broă tĕ khà càr Dăk Lăk đơs loh: “Broă lơh tĕ khà là broă kuơmàng bơh dà lơgar dê mờ càr dê, pal gàr bơta làng bol lơh tờm, ring bal, di mờ adat boh lam, niam ờdo ờdă, tềm pềr mờ ngan ngồn là ngai chờ bơh jơh gùt làng bol dê. Sồr bol he pal lơh ngan mờ pơnđơl uă rlau tai. Bol he pin dờn là, rơp lơh gơs niam ală kơnòl broă geh ai tơlik”.

Đơs sùm kơnòl broă dơ̆ lĕ bal ờ mìng bơsong jơnau gơ lời wơl tơnơ̆ trồ tiah lơh aniai, mờ gam lam lơh uă kơnòl broă cíñ trị, ồng Lương Nguyễn Minh Triết, Ƀí thư Tỉñ ủy càr Dăk Lăk sồr ală kâp, ală gah broă lơh tơnguh nùs nhơm geh kơnòl, lơh broă sơrbac mhar, jak chài, “lơh broă uă rlau 2 dơ̆, 3 dơ̆”.

Is ồn, tàm tŭ tơngai lam lơh broă lơh gơnoar atbồ ƀòn lơgar 2 kâp, ồng Lương Nguyễn Minh Triết sồr kwang bàng kơlôi sơnơng nền nòn sră nggal, sơlơ tơnguh tai bơta tàm pơgồp bal, gàr di tŭ tơngai hơ pơrgon mờ bơta niam ală broă rơcang ai dơ̆ tĕ khà in: “Tơnguh cồng nha broă lơh pơgồp bal đah ală kâp, ală gah broă lơh, ală tiah, mờ kung bơt bơtàu broă lơh tam gơl sồ, ngui măi mok yal tơnggit jơnau nàng lam lơh geh cồng nha dơ̆ tĕ khà. Ală bơnah broă tàm broă lam lơh kờñ pal geh bơta tàm pơgồp bal nền nòn, geh cồng nha đah ală kâp, ală gah broă lơh, ală tiah jat gùng dà kờp sền loh làng, pleh gơ tàm rơndap rơndồ halà lời huĭ kơnòl broă. Jơh ală tài jơnau kờñ bal là lam lơh geh cồng nha dơ̆ tĕ khà cau ala mat Quôk hội khoă XVI mờ cau ala mat Mpồl duh broă Làng bol ală kâp tàm càr”.

Bơh ƀòn dờng, ƀòn drà dờng tus ƀòn lơgar, bơh tiah ƀuơn tus ală tiah gam uă kal ke tơnơ̆ mìu dà tih dà lìu, broă rơcang ai dơ̆ tĕ khà in tàm càr Dăk Lăk gam geh lam lơh mờ nùs nhơm crăp rơcang, geh kơnòl mờ lơh ngan uă. Mờ bơta lơh bal ndrờm bal bơh jơh gùt anih lơh broă cíñ trị dê, bơta ring bal, lơh jat jơh nùs bơh làng bol dê, càr Dăk Lăk gam wèt tus jơnau kờñ lam lơh geh cồng nha dơ̆ tĕ khà cau ala mat Quôk hội khoă XVI mờ cau ala mat Mpồl duh broă Làng bol ală kâp, tơngai lơh broă bơh nam 2026 tus nam 2031, ngan ngồn gơ gơs là ngai chờ bơh jơh gùt làng bol dê, pơgồp bơnah bơt bơtàu dà lơgar gơnoar adat boh lam sàh hội củ nghĩa bơh làng bol dê mờ tài làng bol.