Tàm anih lơh rơndap broă lơh ƀlàng dờng tiah tờm ƀòn dờng Gia Nghĩa, git nđờ jơt nơm măi mok gam jal mhar tờ, bồr, cò tơnring ù. Ồng Trương Công Tiến, kwang atbồ đơng pơlam broă lơh tơnau dà Gia Nghĩa, Kông ty Kổ phần bơt bơtàu Phú Hiển Vinh pà git, kông ty gam di tàm tŭ trồ tiah rô kơnrañ nàng tơnguh mhar broă lam lơh: “Tŭ do neh mut tus kàl prang, mpồl lam lơh rơndap broă bol hi dê pơgồp bal mờ cau tờm bơcri priă geh tơrgùm măi mok, phan bơna, cau lơh broă nàng tơnguh mhar tơngai lam lơh lam lơh, hơ pơrgon tus jơh ngai 31/12/2022 geh lơh gơs bơnah broă ù tiah gùt darmờ ală bơnah broă cò tơnring gam wơl”.

Ồng Hồ Sỹ Điệp, Phó Kwang atbồ Mpồl atbồ rơndap broă lơh bơcri priă bơt bơtàu càr Dăk Nông pà git, rơndap broă lơh ƀlàng dờng tiah tờm ƀòn dờng Gia Nghĩa geh kờp jơh priă bơcri 400 tơmàn đông, tơngai lam lơh bơh nam 2022 tus nam 2025. Priă bơcri ai nam 2022 in là 54 tơmàn đông. Bulah do là broă lơh tờm bơh càr dê mơya gơtìp uă ngan kòl yan bơh ai ù tus ring bal jơnau wac sềr, bơceh broă lam lơh, ai priă bơcri.. Tŭ do, ală kòl yan neh geh tă bơsong nàng drơng broă lam lơh rơndap broă in: “Mpồl neh lơh broă, sồr mpồl pơlam tơnguh mhar tơngai lam lơh. Ai broă lơh ai ù den tŭ do neh lơh gơs jàu ai cau tờm bơcri priă in nàng tus ngai 15/11 geh sơn đờm lam lơh”.

Nam 2022, kờp jơh priă bơcri dà lơgar bơh càr Dăk Nông dê là 2 rbô 783 tơmàn 517 tơlak đông. Kờp tus lồi nhai 10, càr hơ̆ sồng ai geh mờr 50% broă rơndap lơh. Jơnau lơyài uă ngan là tài tŭ lam lơh ală rơndap broă den sră nggal jŏ jòng mờ kòl yan tàm broă ai ù. Ồng Lê Văn Chiến, Phó Củ tịc Ủy ƀan Ñân zân càr Dăk Nông pà git, tơnguh mhar tơngai ai priă bơcri, càr neh tàm pơ dờn priă bơcri bơh ală rơndap broă lơh ờ gơtùi lơh gơs ai ală rơndap broă neh lơh gơs in; sồr ală cau tờm bơcri priă, ală cau tờm lơh rơndap broă tơnguh tơngai lam lơh tàm ală nhai prang; mờ kràñ cê tă bơsong ală kòl yan tàm broă tơm wơl priă ai ù.

Dăk Nông hơ pơrgon geh ai priă bơcri rlau 95% broă rơndap lơh priă bơcri geh jàu: “Nam do, Dăk Nông sơn đờm lam lơh broă lơh uă ngan, ală broă lơh geh priă bơcri dờng ngan, geh tus mờr nggùl khà kờp bơcri dà lơgar bơh nam dê. Ală broă lơh do sồr pal geh dùl tŭ tơngai nàng rơcang lài bơcri den tus tŭ do, jơh ală broă lơh gam rơ wah cau lam lơh rơndap broă mờ geh ai priă bơcri tàm nhai 11, nhai 12. Tŭ ală broă lơh do rơ wah cau lơh gơtùi den tơngai ai priă bơcri geh gơguh mhar. Mờ bol hi hơ pơrgon mờ Cíñ phủ là nam do geh ai rlau 95% priă bơcri dà lơgar.”