Ồng Nguyễn Quang Vinh ơm tàm mpồl 1, thôn 3, xã Nhân Cơ, kơnhoàl Dăk Rlâp, càr Dăk Nông chờ hờp ngan tŭ Rơndap broă lơh bơcri priă lơh gùng rơndeh ntoat mhar Tiah đah tô – Tiah đah jum dà lơgar hờ tiah đah mat tơngai mut gơl Gia Nghĩa (Dăk Nông) – Chơn Thành (Bình Phước) neh geh Ủy ƀan Thường vụ Quôk hội ring bal yal Quôk hội sền swì, lơh nền bơcri priă tàm pơrjum dơ̆ 7 nhai 5 tus. Ồng Vinh kơp kờñ ngan rơndap broă lơh gùng lòt do rơp gờñ geh ring bal, lam lơh, lơh gơs nàng gùng lòt, kă bro bơh làng bol Dăk Nông dê đơs is, Tây Nguyên đơs bal geh ƀuơn rlau. Ală bơta phan lơh gơs bơh suơn sre bè kơphe, tiêu, sầu riêng… mờ làng bol lơh broă sa bè ồng Vinh lơh gơs, rơp geh tac ƀuơn rlau, giă tac jơnhua rlau, lơh gơlik bơta niam nàng broă lơh sa, rài kis bơtàu tơnguh: “Añ kơp kờñ Quôk hội mhar ring bal rơndap broă lơh do. Tŭ do geh gùng rơndeh ntoat mhar lòt gan den ngan là broă pơndiang phan rơp mhaw rlau. Gùng lòt niam den broă lơh sa, rài kis bơtàu tơnguh rlau, lơh sa mờ măi mok, lơh sa suơn sre, đơs bal ală bơta phan rơp ƀuơn rlau. Gùng rơndeh ntoat mhar do rơp cèng wơl uă bơta kuơ ai làng bol in”.

Ồng Lê Văn Chiến, Kwang geh jơng tàm Mpồl lơh kơnòl broă sùm Tỉñ ủy càr, Phó Củ tịc Duh broă sùm Ủy ƀan Ñân zân càr Dăk Nông pà git, Dăk Nông đơs is, tiah Tây Nguyên đơs bal là tiah tam phan lơh gơs bơh suơn sre uă ngan drơng tac hờ lơgar ndai mờ drơng broă lơh gơlik phan. Do kung là tiah geh phan kuơmàng ngan ai 2, 3 gah lơh sa mờ măi mok in, pơn rơ ngan là gah bauxite-alumin-trà. Bulah bè hơ̆, Tây Nguyên kung gam là tiah lơyài bơtàu tơnguh lơh sa. Jơnau tờm ngan là tài phan bơna gùng lòt gam ờ hềt niam. Ờ geh anih ơhò ơm tàm dà lềng, ờ geh gùng rơndeh ồs, jơh gùt tiah do kờñ bơtàu tơnguh kờñ bơtàu tơnguh mìng geh kơp gơn tàm ală gùng ù gờl geh sền gròi, bơcri priă lơh.

Ồng Lê Văn Chiến đơs nền, gùng rơndeh ntoat mhar Tiah đah tô – Tiah đah jum dà lơgar hờ tiah đah mat tơngai mut gơl Gia Nghĩa (Dăk Nông) – Chơn Thành (Bình Phước) rơp pơgồp bơnah kuơmàng bơsong bơta kòl yan bè phan bơna gùng lòt. Rê hờ tiah đah jum dà lơgar, gùng rơndeh ntoat mhar do rơp tơrbŏ mờ Gùng rơndeh ntoat mhar Chơn Thành – ƀòn dờng Hồ Chí Minh. Sơ lơŭ wơl hờ tiah đah tô dà lơgar, do rơp là anih bơh chờm nàng lơh gơs gùng rơndeh ntoat mhar lòt gan gùt Tây Nguyên, bơh Dăk Nông, Dăk Lăk, Gia Lai, Kon Tum tơrbŏ bal mờ tiah tàm gùl lơgar mờ tơrbŏ tàm gùng rơndeh ntoat mhar tiah đah tô – tiah đah jum dà lơgar. Tàm tơrbŏ ring bal gùt tiah do rơp lơh gơlik ù tiah bơtàu tơnguh pa, bơta gơn kơnờm chồl pràn bơtàu tơnguh lơh sa – mpồl bơtiàn, ai Dăk Nông mờ tiah Tây Nguyên in. Mờ bơta kuơmàng bè do, càr Dăk Nông neh rơcang lài nền nòn, rơcang lài ală bơta pal geh nàng lam lơh rơndap broă: “Càr bol hi kung lam lơh ală broă lơh pal geh nàng rơcang lài lam lơh rơndap broă. Bol hi neh lơh ală sră nggal gơ rềng tus adat bo lam mờ rơcang lài priă jền jat jơnau sồr bơh Cíñ phủ dê là càr Dăk Nông tă pơgồp 1 rbô tơmàn đông den càr Dăk Nông neh rơcang wil tơl. Mìng is kơnòl broă dờng màng ngan tai là ai ù lơh rơndap broă den bol hi kung neh rơcang jơh”.

Jat rơndap ù tiah, Gùng rơndeh ntoat mhar Gia Nghĩa – Chơn Thành geh 6 bơnàng gùng. Tơngai tam pà bơcri priă jòng 128,8 kơi sồ, geh 4 bơnàng gùng lơh sir, ai ù lơh rơndap broă dùl dơ̆ 6 bơnàng gùng. Kờp ing priă bơcri ai rơndap broă lơh in mờr 25 rbô 540 tơmàn đông, tàm hơ̆ nggùl là priă bơcri dà lơgar, nggùl gam wơl là bơh cau bơcri priă kơlôi rơcang.

Mìng is tàm càr Dăk Nông, gơl gùng rơndeh ntoat mhar lòt gan jòng 27,8 kơi sồ (uă ngan là lòt gan kơnhoàl Dăk Rlâp), kờp jơh uă ù ai wơl mờr 526 lồ, pal rơndap wơl ƀòn ơm kis pa ai 252 hìu bơnhă in. Ồng Phan Anh Tuấn, Ƀí thư Huyện ủy kơnhoàl Dăk Rlâp, càr Dăk Nông pà git, lơh jat jơnau sồr bơh Tỉñ ủy, Ủy ƀan Ñân zân càr dê, jơh gùt anih lơh broă cíñ trị neh lơh bal nàng rơcang lài ai rơndap broă lơh in. Bơh gùng lòt rơndap broă lơh dê, kơnhoàl neh kờp sền, rơndap ù tiah 6 ƀòn ơm kis pa, 10 tiah tờ ù lŭ lơh gùng, 8 anih tuh sang. Kơnhoàl kung neh sồr ală gah broă lơh, ală xã pơgồp bal kờp sền, kờp tơrgùm ing bơta geh ngan bè ù tiah, chi che, phan tam, phan bơna tàm rơndap ù tiah lơh gùng, rơcang lài ai broă ai ù lơh rơndap broă in: “Lơh jat jơnau sồr bơh càr dê den bol hi neh lơh Mpồl hòi jà, mblàng yal mờ kung lơh 2, 3 mpồl lơh broă. Jơh ală tiah, ală Đảng ƀộ xã, sơnah ƀòn, thị trấn, mpồl kwang àng, kảñ sát, ling klàng, hơ̆ sồng mặt trận, mpồl cau ndrờm tus bal lơh broă. Do là dùl kơnòl broă dờng, jơh gùt anih lơh broă cíñ trị pal lơh bal, sồr lơh jơh nùs, lơh bè lơi lơh gơlik bơta ring bal dồ nùs bơh làng bol dê”.

Dăk Nông neh rơcang lài, jơh nùs rơcang ală bơta pal geh nàng tŭ rơndap broă lơh Gùng rơndeh ntoat mhar Gia Nghĩa – Chơn Thành geh ring bal rơp mhar geh lam lơh. Broă Dăk Nông rơcang lài ai rơndap broă lơh in neh ai gŏ bơta kơp kờñ bơtàu tơnguh lơh sa- mpồl bơtiàn pràn ngan bơh càr dê.