Cih dờp tàm tŭ tơngai pa do, Rơndăp broă lơh 8 gơ wèt Broă lơh Jơnau kờñ Dà lơgar bơtàu tơngguh lơh sa- mpồl bơtiàn tiah làng bol jơi bơtiàn dồ êt nă cau mờ tiah bơnơm geh đơs là dùl “bơta bơtàu tơngguh uă ngan” tŭ geh ală kes priă mờ broă lơh is lời ai lơh jăt ring bal ùr klau in. Bulah bè hơ̆, jăt Tiến sìh ồng Phạm Thái Hưng- cau gĭt wă jrô broă pơlam broă lơh dong kờl dê, den lơh ngan do kung gam “ờ hềt tơl sơl”. Ồng mblàng sền, Rơndăp broă lơh 8 tŭ do mìng geh pơgăp 1,4% kờp jơh priă jền bơh jơh gùt broă lơh dê, geh bal ală rơndăp broă lơh mờ rơndăp broă lơh dềt ndai. Khà tam pà bè hơ̆ là dồ êt ir nàng àñ ơnòng dùl kơnòl broă dờng. Tiến sìh ồng Phạm Thái Hưng, đơs sùm: “bè sền bal ờ hềt sền ngăc halà ờ huan ngan gŏ bè pơgồp bal ùr klau”.

Bơta geh ngan do gơ tơlik dùl bơta lòng dờng, tài bơh dilah mìng gơn kơnờm tàm dùl rơndăp broă lơh dềt rah rài bal mờ priă jền dồ êt, den broă lơh lơh jăt ring bal ùr klau tàm tiah làng bol jơi bơtiàn dồ êt nă cau mờ tiah bơnơm kal ke ngan gơtùi lơh geh cồng nha bè kơ̆p gơn. Bơta geh ngan hơ̆, Tiến sìh ồng Phạm Thái Hưng đơs là pal geh bơta tam gơl jơh bè broă lơh tàm tŭ tơngai tus. Ồng đơs sùm, dilah bol he ờ tam gơl broă lơh, den kal ke gơtùi lơh geh jơnau kờñ neh sồr lơh tàm broă lơh ring bal ùr klau. Ồng sồr, là: Pơgồp bal ùr klau tàm jơh ală rơndăp broă lơh, ală rơndăp broă lơh dềt mờ ală tơngume bơnah bơh broă lơh dê. Jăt ồng, do ờ mìng là kơnòl bơh is Mpồl Tam klăc Cau ùr Dà lơgar Việt Nam dê halà bơh Rơndăp broă lơh 8 dê, mờ pal là kơnòl broă sùm sùm, pal “gơmŭt jrô tàm tơl đong priă, tơl broă lơh” bơh jơh ală broă lơh. Nàng broă pơgồp bal ùr klau ờ mìng ơm wơl tàm jơnau sồr do halà jơnau đơs mờ bơr gời lơm, Tiến sìh ồng Phạm Thái Hưng sồr pal geh bơto pơlam loh làng bơh ală ƀộ, gah đơng lam lơh rơndăp broă lơh, rơndăp broă lơh dềt, mờ bơta pơgồp bal đơng lam bal bơh Cơldŭ lơh broă Pơgồp bal đơng lam Broă lơh dê. Ồng đơs sùm là pal tam gơl pa gùng dà lam lơh dùl bă ngan ngồn mờ rềp mờ mùl màl rài kis dê.

“Gĭt nền wơl ù tiah ƀòn lơgar mờ cau ai lài. Gơ wèt mờ ală broă lơh bè tơngguh uă pràn jak mờ mblàng yal jơnau, pal tam gơl gùng bơh broă lơh jăt ù tiah ƀòn lơgar kal ke ir tus lơh broă jăt cau ngan ngồn kờñ pal dong kờl; Tơngguh uă cồng nha mblàng yal jơnau. Pal tơngguh tai mờ lơh sồ jơh, mơya kwơmàng rlau là pal ai tơl priă jền ngan ngồn ai ală mpồl mblàng yal jơnau kơnờm tàm mpồl bơtiàn in”.

Mùl màl tŭ do, tàm uă tiah, bol he geh lơh ală mpồl mblàng yal jơnau, pà tô ri gam geh hòi là rơnàng pòr pờ tơlik jơnau đơs…mơya cồng nha mblàng yal jơnau gam ờ huan ua pràn ngan. Jơnau bơh tài gơbàn uă ngan là tài bơh ờ geh priă jền nàng lơh broă sùm mờ lơh broă. Tiến sìh ồng Phạm Thái Hưng kung ai gĭt loh là Ƀộ Priă jền ờ hềt cih bơnah dong kờl priă jền do tàm Jơnau pơlam sồ 55, lơh ală ƀòn lơgar ờ geh priă jền nàng lam lơh, is ồn là tàm tiah sar tiah ngài. Ờ mìng kàr hơ̆ gời lơm, ồng gam ai gĭt ai ală bơta ờ hềt dipal tàm broă lơh pơlam tàp.

“Broă lơh pơlam tàp bè ring bal ùr klau tŭ do gam gơ ơm tàm bơta jơngkah ndang ờ tơl ndang; jơngkah ală tơngume geh wih geh wơl, lơh đah bơdìh gời lơm; ờ tơl ală mờng chài mùl màl, ală broă lơh bơceh lơh. Kờñ pal tam gơl tus tơngguh uă pràn jak lơh broă jăt ală tŭ halà ală broă lơh pơlam tàp is rah rài, nàng ngan ngồn bơto ai mpồl kwang bàng ală kâp in bơta chà pơgồp bal ùr klau geh cồng nha tàm broă lơh pah ngai”.

Bè bơta tờm ală broă kờñ pal ai lài tàm tơngai tus, bơdìh mờ broă pơn jăt tai lam lơh geh cồng nha ală broă lơh bè sền gàr pràn kơldang deh dùh, Tiến sìh ồng Phạm Thái Hưng dan rề ơnàng tai ală tơngume bè ai pà dà sàng goh mờ lơh hìu jă brê, is ồn lời ai cau ùr mờ kơnòm dềt in. Jăt ồng đơs do là jơnau kờñ ngan ngồn tàm rài kis, gơrềng tơn tus pràn kơldang mờ bơta niam kis bơh mpồl cau lơbơn lơño do dê, mơya mùl màl tàm rài kis tŭ do kung gam sơl dùl bơta lòng dờng uă ƀòn lơgar tiah bơnơm, tiah sar tiah ngài.

Nàng ală jơnau dan gơtùi lòt mŭt tàm mùl màl rài kis, Tiến sìh ồng Phạm Thái Hưng hòi jà Mpồl Tam klăc Cau ùr Dà lơgar Việt Nam pal rơcăng lài pơgồp bal niam mờ Cơldŭ lơh broă Pơgồp bal đơng lam Broă lơh Jơnau kờñ Dà lơgar mờ ală ƀộ, gah geh gơrềng, nàng kờñ jơnau ùr klau geh pơgồp bal dùl bă jrô ơnàng mờ ngan ngồn tàm ală rơndăp broă lơh mờ bơnah broă pa. Dilah ờ pơgồp bal gơtùi, den kờñ ngan pal gàr sùm dùl mpồl lơh broă is, halà gơtùi ơn tàm bơnah broă bơtàu tơngguh mpồl cau lơh broă bè dùl broă lơh dipal mờ gơtùi lơh jăt ngan ngồn.