Tàm dơ̆ pơrjum dơ̆ 7, Mpồl duh broă Làng bol càr Lâm Đồng khoă X tơrgùm cribơyai, lơh nền gơ wèt mờ 32 jơnau yal mờ 21 jơnau rơcang cih jơnau lơh nền tàm pơrjum, tàm hơ̆ uă jơnau lơh nền tàm pơrjum cèng bơta kuơ, jŏ tơngai bè: Jơnau lơh nền tàm pơrjum bè broă rơndap lơh priă jền 5 nam bơh nam 2026 tus nam 2030; Jơnau lơh nền tàm pơrjum bè kơnòl broă bơtàu tơnguh lơh sa – mpồl bơtiàn 5 nam bơh nam 2026 tus nam 2030; Broă rơndap lơh bơtàu tơnguh lơh sa – mpồl bơtiàn nam 2026… Bal mờ hơ̆ là uă Jơnau lơh nền tàm pơrjum gơ rềng tus broă gàr lơngăp lơngai rài kis mpồl bơtiàn mờ rài kis làng bol dê.

Sơrlèt gan uă kal ke, bơta lòng nam 2025, lơh sa càr Lâm Đồng pơn jat tai gàr sùm khà gơguh niam đau mờ 16 tàm 19 broă jàu lơh gơtùi mờ sơrlèt rlau broă rơndap lơh ai tơlik; kờp jơh rề dia dà lơgar tàm càr kờp dŭ geh rlau 31 rbô 200 tơmàn đong, gơguh 17% pơndrờm broă rơndap lơh dà lơgar jàu. Broă lơh sa suơn sre pơn jat tai ai gŏ gơnoar broă chồl tơnguh lơh sa càr dê; ală gah năng lượng lơh geh wơl, lơh sa mờ măi mok bauxite alumin pơn jat tai tă pơgồp kuơmàng ngan tàm gơguh lơh sa bal bơh càr dê. Ồng Tiêu Hồng Phúc, Phó Củ tịc Mpồl duh broă Làng bol càr Lâm Đồng pà git, càr gam pơn jat tai tă bơsong ală bơta kal ke nàng wèt tus tam gơl pràn tàm bơtàu tơnguh lơh sa mpồl bơtiàn: “Tơnơ̆ tŭ tơmut bal mpồl lơh broă sră pơ àr gơnoar atbồ ƀòn lơgar 2 kâp tàm tŭ lơh broă den bơh sơn rờp neh lơh geh uă cồng nha kuơmàng. Bulah bè hơ̆ kung gam uă ngan bơta gơ kòl kờñ pal geh pơn jat tai tàm bơyai, pơn jat tai cribơyai mờ ai tơlik ală broă lơh nàng tă bơsong. Bè hơ̆ den tàng tàm dơ̆ pơrjum ờs mờng dơ̆ do den Duh broă sùm Mpồl duh broă Làng bol càr ờ lam lơh lùp mờ hơ jơnau lùp”.

Tàm dơ̆ pơrjum bơh Mpồl duh broă Làng bol càr Gia Lai dê, cau ala mat sàh Tuy Phước Bắc đơs, tàm dơ̆ càl rbut dờng dà tih dà lìu pa do, càr Gia Lai geh 5 nă cau chơt, 11 nă cau gơtìp sồt să, rlau 32 rbô nơm hìu gơtìp dà bam, cò pơr do. Cau ala mat sồr gah broă lơh sa suơn sre mờ tiah ơm kis lơh loh bơta geh halà ờ yuh dà tih bơh ală tơnau dơng dà lơh gơbàn ngơr bam, sền sơ wì pràn jak mpồl yuh tơlik dà tih tŭ do, kơnòl atbồ mờ ai tơlik lài ală broă lơh drơng wơl jŏ jòng.

Hơ jơnau lùp, ồng Cao Thanh Thương – Kwang Lam bồ Sờh Broă lơh sa suơn sre mờ Tiah ơm kis càr Gia Lai đơs nền, ờ geh broă yuh tơlik dà lìu tàm dà dờng Hà Thanh. Tiah dà dờng do ờ geh tơnau dơng dà; bàr tơnau dơng dà dờng tàm tiah đah mat tơngai lik càr dê là Núi Một mờ Định Bình tàm dơ̆ dà tih dà lìu pa do ndrờm ờ hềt bềng dà mờ broă tam pà dà bơh tơnau dơng dà dê mìng lơh gơ rềng tus dà dờng Côn. Ồng Cao Thanh Thương kung đơs bơta ờ niam tàm broă yuh tơlik dà lìu bè bơta bơt bơtàu sơgràm jat kềng gah dà dờng, tam tờm keo tàm tiah yuh tơlik dà lìu lơh hat hiòng dà hòr; dùl gơl bơtơt kìng dà Hà Thanh neh bơcah git nđờ jơt thơk tài bơta kơn jơ̆ bơh dà dê mờ bơnah tiah kềng gah. Bè gùng dà jŏ jòng, ală tiah pal kờp sền broă rơndap lơh ntrờn làng bol jat tơl kâp trồ tiah lơh aniai. Ồng Cao Thanh Thương pà git, tŭ do gah broă lơh sa suơn sre neh ai tơlik 3 broă lơh: “Nàng gàr niam broă yuh tơlik dà tih, Sờh neh tă pơgồp jơnau đơs ai Anih duh broă Làng bol càr in geh broă rơndap ù tiah bè tiah yŭ dà tih dà dờng Ha Thanh, bulah bè hơ̆, priă bơcri uă, kờñ pal geh tŭ tơngai. Tềng đap mat, sờh neh tă pơgồp jơnau đơs Anih duh broă Làng bol càr dê bè broă tuah wàs rbòng dà yuh tơlik dà tih. Dơ̆ 2 là pal lơh bơtơt sền gàr ală ƀòn làng bol ơm kis. Dơ̆ 3 là pal sền sơ wì, bơsong bơta sơgràm rbòng yuh tơlik dà tih. Do là 3 broă kuơmàng kờñ pal lam lơh mơ”.

Tàm dơ̆ pơrjum lồi nam, Mpồl duh broă Làng bol càr Quảng Ngãi đơs, càr neh lơh gơs jơh 24 broă jàu bơtàu tơnguh nam 2025 dê, mờ kung git nền loh làng 3 bơta gơ kòl dờng kờñ pal geh tă bơsong nàng lơh gơlik bơnàng jă tam gơl pràn tàm tơngai bơh nam 2025 tus nam 2030. Hơ̆ là broă lơh gơguh lơh sa ờ hềt kơnhăp kơ̆ tŭ rề dia gam gơ wèt tàm bàr pe bơta priă jền; tac phan hờ lơgar ndai gơmù; lơh sa suơn sre tơrbŏ bal ờ pràn, lòt nhơl ờ hềt ndrờm pal mờ bơta pràn. Phan bơna kuơmàng bè gùng lòt, logistics, anih ơhò ơm tàm dà lềng mờ ală gùng tàm tơrbŏ bal ală tiah gam ờ hềt ndrờm bal, tơngai ai ù lơh rơndap broă, ai priă bơcri dà lơgar lơyài, uă broă lơh niam chài – bơto bơsram – lơh sơnơm neh ờ diơng.

Mut tàm tŭ tơngai bơtàu tơnguh pa, càr Quảng Ngãi tơlik jơnau sồr tam gơl pràn kơldang rlau. Ồng Nguyễn Hoàng Giang – Củ tịc Anih duh broă Làng bol càr Quảng Ngãi đơs: “Mờ nùs nhơm geh lam lơh sùm là lơh broă mhar rlau – pràn rlau – jơh nùs rlau; bơsong broă tus gùng tus dà, đơs pal gơ jat bal mờ lơh, Anih duh broă Làng bol càr Quảng Ngãi rơp tơrgùm tơl bơta priă jền, bơtàu tơnguh bơta pràn, bơta ƀuơn, cồng nha neh lơh gơtùi bal mờ broă bơsong bơta ờ niam, bơsong bơta gơ kòl, pơnđơl pràn lơh gơtùi jơnau kờñ bơtàu tơnguh lơh sa – mpồl bơtiàn nam 2026, lơh gơlik bơnàng jă kơ̆ kơnhăp ai tơngai bơh nam 2026 tus nam 2030 in”.