Củ tịc Quôk hội ồng Trần Thanh Mẫn đơs loh: do là dar pơrjum bơh sơnrờp tàm nam 2025 dê, geh lơh tàm nùs nhơm jơh gùt lơgar chờ hờp Đảng, chờ hờp Sơnam pa mờ bơyai lơh ală broă lơh chờ hờp sơma pa sa tềp bơhiàn dà lơgar nam Ất Tỵ, tơngkah kir sơnrai 95 nam Ngai tơnggơs Đảng Kộng sản Việt Nam. Mờ Quôk hội bal mờ Mpồl duh broă Làng bol ală kâp kung bơyai lơh ală broă lơh tơngkah kir sơnrai 79 nam Ngai Tĕ khà bơh sơnrờp pồ Quôk hội Việt Nam. Đơs sùm bơnah broă lơh tàm nam 2025 là uă ngan, Củ tịc Quôk hội đơs loh, tàm qúy I nam do tơrgùm bơyai lơh Dơ̆ pơrjum ờ bè ờs dơ̆ 09: “Bol he pal tơrgùm, tơrgùm pràn ai Dơ̆ pơrjum ờ bè ờs in tàm lồi nhai 02 tus. Dơ̆ pơrjum do, Quôk hội rơ̆p ờ gŏ kờp tŭ tơngai mờ kờp lơh bè lơi lơh sir nàng ring bal tam gơl ală adăt, jơnau lơh nền tàm pơrjum Quôk hội dê drơng ai broă Tơn jơh Jơnau lơh nền tàm pơrjum sồ 18 bè tơrmù dipal mpồl lơh broă; lơh broă geh cồng nha, lơh broă gơtùi, cồng nha tàm tơngai tus”.

Anih duh broă Lơh kơnòl broă sùm Quôk hội neh sền swì jơnau yal broă lơh làng bol kơ̆p kờñ bơh Quôk hội dê nhai 12 nam 2024. Lam bồ Mpồl lơh broă Làng bol kơ̆p kờñ ồng Dương Thanh Bình pà gĭt: Cau tĕ khà mờ Làng bol ring nùs bal ngan pơn jăt tai sồr lơh jăt Jơnau lơh nền tàm pơrjum sồ 18 bè rơndăp tăp sèng tơrmù dipal rơndăp mpồl lơh broă tàm ală anih lơh broă cíñ trị dê. Cau tĕ khà mờ Làng bol kơ̆p gơn gờñ geh dồ mpồl rơndăp mpồl lơh broă ală anih lơh broă Đảng, Dà lơgar, ală mpồl cau bơh Dà lơgar tus ƀòn lơgar tơrmù dipal, pa ngan, lơh broă gơtùi, geh cồng nha.

Anih duh broă Lơh kơnòl broă sùm Quôk hội neh tă pơgồp jơnau đơs tàm jơnau rơcăng cih Jơnau lơh nền tàm pơrjum ală gah cih nền cê broă bơyai lơh tìp măt cau tĕ khà bơh cau ala măt Quôk hội mờ cau ala măt Mpồl duh broă Làng bol dê. Uă jơnau đơs bơh kwang bàng Anih duh broă Lơh kơnòl broă sùm Quôk hội dê gam kơlôi sơnơng bè Mpồl duh broă sùm Anih duh broă Mặt trận dà lơgar Việt Nam kâp xã bơyai lơh Pơrjum tìp măt cau tĕ khà. Cau drơng kơnòl Anih duh broă Kơrnoăt boh lam dê ồng Hoàng Thanh Tùng đơs bơta geh ngan bè do: “Mpồl duh broă sùm Anih duh broă Mặt trận dà lơgar Việt Nam kâp xã ờ di là tiah lơi kung lơh broă geh cồng nha mờ ndrờm bal ờ, ngan là ală tiah tàm tiah sar lơgar ngài, tiah gam uă kal ke. Den tàng cih kră kơldang in bơyai lơh pơrjum tìp măt cau tĕ khà tàm ù tiah kâp xã mờ jàu kră kơldang in tàm jơnau lơh nền tàm pơrjum ai Mpồl duh broă sùm Anih duh broă Mặt trận dà lơgar Việt Nam kâp xã in sùm là anih lơh broă đơng lam, pơgồp bal mờ Mặt trận dà lơgar kâp kơnhoàl mờ ală anih lơh broă, mpồl lơh broă tìp măt cau tĕ khà den digơlan geh bàr pe jơnau ờ lơh geh jơnau sồr, gơrềng tus cồng nha dơ̆ tìp măt cau tĕ khà”.

Tàm dar pơrjum, 100% kwang bàng Anih duh broă Lơh kơnòl broă sùm Quôk hội neh ring bal Jơnau lơh nền tàm pơrjum ală gah cih nền cê broă bơyai lơh tìp măt cau tĕ khà bơh cau ala măt Quôk hội mờ cau ala măt Mpồl duh broă Làng bol dê. Jơnau lơh nền tàm pơrjum cih bè gơnoar mờ kơnòl bơh ală anih lơh broă, mpồl lơh broă dê tàm broă tìp măt cau tĕ khà; lơh broă, broă lơh broă, tơnggume tìp măt cau tĕ khà; Tơrgùm, tơrgùm jơh jơnau đơs, jơnau dan bơh cau tĕ khà dê; is ồn là cih kơnòl bơh anih lơh broă, mpồl lơh broă, mpồl cau dê nàng bơsong jơnau đơs jơnau dan bơh cau tĕ khà dê, yal loh làng cồng nha bơsong jơnau đơs jơnau dan bơh cau tĕ khà dê mờ jăt sền broă bơsong jơnau đơs jơnau dan bơh cau tĕ khà dê.

Ală kwang bàng Anih duh broă Lơh kơnòl broă sùm Quôk hội kung yal ală bơta ờ hềt dipal kờñ geh ală anih lơh broă geh gơnoar geh broă lơh geh cồng nha tàm tơngai tus bè phan kă bro gơguh giă; bơta kòl gùng, rềs àr gùng lòt; jơnau kă bro, jun pơndiang, prăp pồn, ngui phàu tìs mờ adăt boh lam…Phó Củ tịc Quôk hội ồng Nguyễn Đức Hải sồr mhar ai Adăt Ù tiah nam 2024 mŭt tàm rài kis: “Bol he gam lam lơh jăt Adăt Ù tiah lòt mŭt tàm rài kis làng bol chờ hờp ngan. Mơya broă là gơrềng tus broă tam gơl giă ù; gơrềng tus dờp gơnoar ngui ù ală tiah…tŭ do gam gơkòl uă ngan sră nggal. Bol he ai tơl bơta broă lơh lơh sră dờp gơnoar ngui ù, bơta do gơ sồr bơta tơrgùm pơgồp bal bơh ală kâp dê. Jăt tàm bơta dùl adăt pa, broă dong kờl pa jăt ngui mờ làng bol gam ơm kơ̆p”.

Anih duh broă Lơh kơnòl broă sùm Quôk hội sồr Cíñ phủ sồr ală ƀộ, gah geh gơrềng, gơnoar ătbồ ală tiah sền gròi broă lơh rơcăng phan kă bro drơng sa tềp bơhiàn dà lơgar dê; Ƀộ Gùng lòt rê jun pơndiang tơngguh tai ală broă lơh lòt sền, lùp sền broă lơh jăt cih yal giă pơndiang, lir sră cih giă pơndiang. Ƀộ Kwang àng sok sền kràñ, tơrmù ƀà jơnau pơhìn rềs àr gùng lòt, ngan là tŭ ală broă lơh jun pơndiang năc, phan kă bro rơ̆p gơguh jơnhoa nàng di tŭ drơng sa tềp bơhiàn dà lơgar dê.