Củ tịc Quôk hội ồng Vương Đình Huệ đơs nền, tơl broă lơh nền bơh Quôk hội dê ndrờm ơn làng bol mờ mpồl lơh sa kă bro ơm tàm bơta lơh tờm. Kông ñân mờ cau lơh broă là cau tờm kuơmàng ngan tàm bơta git gơp lơh broă ring niam, kơ̆ kơljap mờ gơguh jak, là cau gơ wèt mpồl geh tam gơl bơh jơh ală adat boh lam dê tàm ròt ală kơrnuat boh lam. Broă Quôk hội, Ủy ƀan Thường vụ Quôk hội, ală anih lơh broă bơh Quôk hội dê, ală anih lơh broă, mpồl lơh broă geh gơ rềng geh tŭ nàng tìp mat, iat bơta kơp kờñ bơh cau lơh broă dê nàng ngai sơlơ lơh sir adat boh lam là bơta pal geh mờ geh kuơ dờng màng ngan: “Bol hi sền do là dơ̆ tìp mat cau tĕ khà mìng dùl tơngume kuơmàng, nàng geh tìp mat, geh iat mờ geh cribơyai mờ ală kwang bàng kông đoàn, đoàn viên kông đoàn, cau lơh broă, ala mat ai mpồl cau lơh broă gal ngan in geh mờr 50 tơlak nă cau tàm làm gùt dà lơgar, do là mpồl lơh broă tơn, lơh sa tơn, lơh gơlik phan bơna tơn ai mpồl bơtiàn in mờ tă pơgồp kuơmàng ngan tàm broă lơh bơtàu tơnguh lơh sa- mpồl bơtiàn bơh dà lơgar dê, bal mờ hơ̆ do kung là ală cau kong gơ rềng geh tam gơl bơh jơh ală adat boh lam dê tàm ròt kơrnuat boh lam Việt Nam”.

Cribơyai tàm pơrjum, broă lơh hìu ơm ai kông ñân in là dùl tàm ală tơngume geh gal ngan cau lơh broă sền gròi. Bi Nguyễn Việt Anh, đoàn viên Tổng kông ty Kổ phần Ƀưu cíñ Viettel gơ wèt Tập đoàn Ƀưu cíñ Viễn thông ling klàng đơs là: “Rài yau, hìu ơm bal uă ngan, tiah lơi geh tiah lơh sa mờ măi mok, geh uă kông ñân den tiah hơ̆ geh hìu ơm bal. Mơya tus tŭ do, dà lơgar bol he neh bơtàu tơnguh rlau, mơya uă tiah lơh sa mờ măi mok, kông ñân digơlan geh tus git nđờ rhiang, nđờ rbô nă kông ñân. Dilah sền tàm hìu ơm bal den tŭ do ờ hềt gơtùi drơng tơl hìu ơm bal. Den tàng lơh gơ rềng tus cau lơh broă”.

Hơ bè tơngume do, Củ tịc Quôk hội ồng Vương Đình Huệ pà git, do là bơta ờ niam đah broă tam gơl pa lơh sa mờ măi mok dà lơgar. Tiah geh broă lơh, tiah lơh sa mờ măi mok uă mơya ờ geh hìu ơm bal nàng ơm: “Dilah broă bơtàu tơnguh gah broă lơh tàm tiah drà mhar rlau, tàm tŭ bơta tam gơl gơs tiah drà lơyài rlau den rơp gơbàn bơta ờ niam là ờ geh broă lơh bè hìu ơm. Mơya sơ lơŭ wơl, dilah bol he tam gơl gơs tiah drà mhar rlau den digơlan geh ală hìu mờ ờ geh cau lơi ơm, lơh gơs ờ geh cau blơi. Den tàng broă do gam gơ rềng tus rơndap ù tiah. Tŭ do, Cíñ phủ, Thủ tướng kung gam đơng lam kràñ cê ngan broă lơh rơndap ù tiah càr. Bơta rơndap ù tiah tiah drà, rơndap ù tiah ƀòn lơgar, lơh bè lơi nàng gơtùi tơrgùm ring bal 2 broă do”.

Kung tàm dơ̆ cribơyai do, cau lơh broă neh tơlik jơnau lùp ai Kwang đơng lam bồ Quôk hội, Cíñ phủ, ală Ƀộ, gah broă lơh dà lơgar geh gơnoar in bè mpồl broă gơ rềng tus bơta niam phan sa; ală broă dong kờl, broă lơh gơ rềng tus rài kis phan bơna, nùs nhơm bơh cau lơh broă dê, đơng pơlam dà lơgar mờ lơh niam wơl sră pơ àr gơnoar atbồ; ală broă lơh krơi is bơh cau lơh broă dê; bè bơta pal geh tàm lơh broă, sàu sa gùl tŭ jơ lơh broă. Củ ñiệm Ủy ƀan Mpồl bơtiàn bơh Quôk hội dê, Củ ñiệm Ủy ƀan Khoa họk mờ Kông nghệ, Củ ñiệm Ủy ƀan kơrnuat boh lam, Ƀộ trưởng Ƀộ Y tế, Ƀộ trưởng Ƀộ Giáo zụk mờ Đào tạo neh hơ jơnau lùp bơh cau lơh broă dê.

Đơs pơn dut dơ̆ cribơyai, Củ tịc Quôk hội ồng Vương Đình Huệ đơs, ală jơnau đơs bơh đoàn viên, cau lơh broă dê neh đơs di bơta geh ngan tàm rài kis, broă lơh, bơta kơlôi sơnơng, bơta gròi sền bơh đoàn viên, cau lơh broă gùt lơgar dê mờ ală bơta ờ niam tàm broă lam lơh jat broă lơh, adat boh lam lơh đoàn viên, kông ñân, viên chức, cau lơh broă gam ờ suk, bè bơta broă lơh, priă lơh geh, tơnguh bơta chài, broă lơh dong kờl hìu ơm, broă lơh ƀảo hiểm xã hội, ƀảo hiểm y tế, broă lơh gah broă krơi is: “Cồng nha bơh dơ̆ cribơyai dê rơp pơn jat tai ai gŏ nùs nhơm tam gơl pa, lơh broă jơh nùs bơh Quôk hội dê tài bơta kuơ làng bol dê, bơh mpồl kông ñân dê; mờ kung đơs nền gơnoar broă rơcang lài, jơh nùs bơh mpồl lơh broă Kông đoàn Việt Nam dê tàm broă tus bal bơt bơtàu Đảng, bơt bơtàu gơnoar atbồ. Bol hi pin dờn là, tềng đap bơta đơng lam bồ dipal, jak chài bơh Đảng dê, bơta tàm pơgồp bal jơh nùs, ring niam mờ bơta lơh bal, jơh nùs bơh ală kâp, ală gah broă mờ jơh gùt anih lơh broă cíñ trị dê, bơta ring bal, dùl nùs bal, pơn đơl pràn mờ bơta jơh nùs bơh làng bol, cau lơh broă dê, pơgồp bal mờ mpồl lơh sa kă bro ngan là bol he rơp gơtùi sơrlèt gan ală kal ke, bơta lòng”.

Tàm dơ̆ cribơyai, Củ tịc Quôk hội ồng Vương Đình Huệ, ală Phó Củ tịc Quôk hội neh pà phan ai 20 nă đoàn viên kông đoàn jak ngan, đoàn viên, cau lơh broă geh rài kis kal ke in.